Pherzawl, August 15, 2020, Virthli(ONP): India ram hmun dang dang ah India Independence Day hmang a ni ang bawkin Pherzawl District a khawm DC Office Complex, Pherzaw-ah 74th India Independence Day hmang a nih. Hi huna hin Pi Mannuamching, IAS, DC, Pherzawl district chu khuolliena thangin, India hnampuon keipharna neiin parade hai salute lakna neiin thuhrilna hun a hmang.
Khuollien chun India ram zalenna dinga hringna lo chan ta hai inzana pein, tulai hripui inleng Covid-19 donaa nasataka a hmatawnga thang medical staffs, officials hai le police duty hai chunga lawmthu a hrila, Covid dona hi a la zo nawa, thang nasa nawk zuola la tlang dingin fielna a siem bakah Pherzawl District sunga COVID-19 a positive an la um naw thu a hrilsa bawk a nih. Pherzawl District sunga nuhmei naupang inchuklai hai ta dingin Parbung Higher Secondary School ah Girls Hostel khum 50 um theina ding bawl ani ding thu DC in a puong bawk a nih.
Hi huna hin chawimawina inhlanna hun hmang niin Covid-19 frontline workers hai chawimawi anni bakah Pherzawl District sunga Class-X exam a 1st le 2nd Divison a passed hai po ZEO, Pherzawl in chawimawina certificate le sumfai an hlana, State Level Talent Search Examination a hlawtlingna chang PMS School, Lungthulien a inchuklai naupang pahni chawimawi anni bawk.
Covid leiin kum dang angin mipui pungkhawm ani nawa, SP, Pherzawl District, sawrkar official hai, khawtlang thuoitu, pawl thuoitu, inchuklai naupang le hun nei hai ang chau an thang a nih.
