~ John L Pulamte
Pathien zâr le ei sawrkârpa hma lâkna zârin, ei tûlai khawvêl buoina le inzawmin, khuol rama zu umhai inṭhuoi suokna rûnpui chu nasa takin a fe mup mup zing a. A hung tlung ta le la hung ding mêk khawm an um zing bawk.
Ei sawrkârpa kut chu sawr kâr nghâkhlain ei kutdaw nghâk tawp a, a tâwpa chu ei sawr ta khawng khawng. Theida a um naw hle.
Tiena Israel-haiin Aigupta ram chu an ram nêka hnienghnâr lemna hmun a nih tî hre hai sien khawm, an mikhuolna ram a ni mieu leiin an thla a ngam thei naw a, thlo ruol lovin an ram tieng panin Aigupta ram an ṭînsan ang khan, thlang sâppui le kawr le vâi rama zu chêng ei u-le-nâuhaiin an mikhuolna ram chu râl ṭitna hmun a lo chang ta tî hrein, corona hripui inlêngna ram chu râusanin, hmun him lemna, manî khuo le vêng tieng ṭuon zâi an rêl mêk zing. An pieng le murna ram tieng ngâina chun nasa taka hîpin a ko a, a kutin a hûi a nih. Covid-19 râl hrâng ṭit-um tak kârah, lungril rik ṭeu pum le beidawng takin manî hmun le ram tieng tlung kâr nghâkhla em em le rin tak sîin an hung pan mêk a, nî dang anga lo hmuoktu ding khawm nei zo ta lovin, mal ngâwi ngâwiin, manî inlum khawm chang zo ta lovin, riekmaw anga invâiin, châwlkâr hni lâi zet ding chu an thlang lo rûn in rê dup le ngâinatum lo tak chu an lo bêl hrî a ngâi ta a nih.
Nî danga an khuolzin hung inlâwi le chu a dân a dang ta ngêi el. Nî dang chu pasalṭha ram suokin sa hrâng lu a hung hâwn angin, an sûng le kuohai lung lâwmna ding dâm chu an hung hâwn hlak a. Tu ṭum ruok chu thangko angin chanchin ṭha lo le thîna thu thang dâm chu an hung hâwn lem ta a nih. A va mangangthlâk ngêi! Mani khuo le vênga tak ngiel khawm chawngpuah an insa ngam ta naw deu thaw a, corona hripui nunrâwngin mikhuol nîna suoi, ser hmêl se tak chu an chalbâwka nam kâipêkin, hmûsitumna pânser hmu hmai ruol lo langsâr tak el chu a hnutsiepêk a. Chu chû thil chun nasa takin nghâwng a nei naw thei nawh. Manî khuo le tuia ngêi khawm âr khuol angin an thla a ngam ta naw a, mikhuol angin a sukkiltawi zo a, bufâi lâia lungte hlek ang ela inngâina lungril inhnuoi tak a'n neitir naw thei naw a nih.
Mi tam tak chu in sûng khawsak inhawi lemna ding ngâituona leiin, manî inlum khawm thlâkhla thei ta loa khuol rama va ram suok an ni a. Chuonghai hung inlâwi chu pasalṭha ram suok hung inlâwi ang hi an ni a, thi le hring inkâra sa pui sa hrâng va'n hmasawnpui a, hliemna pânser nasa tak kâia kut ruoka in hung inlâwi lût ang hi an ni a, a hrilhaithlâkpêk a nih. Lo lunginsiet a, an thla chen khawm lo huolpêk hi an phu hlie hlie a nih. A thei lem chun nâupa tlân hmang hung inlâwi a pân thuomhnaw ṭha ṭha a lo inbeltir le ran ruol lâia a thâu thâu a lo that ang khan, lungsie takin ei lo lâwm lût ve hi an phu a nih.
Nâupa tlân hmang hman khâng tawp khan a pa'n a lo lâwm lût chun, nâupa tlân hmang khawm ni lo, mani in sûng ngâituona leia hmêl hriet lo rama rimsikna tinrêng tuor huoma va ram suok an nî leiin, châwmâwi khawm an phu ka ti hiel. Corona hripui râwng tak laka him dama in an la hung tlung thei dâm hi chu, a lâwmna siempêk khawm a âwm a, an phu rêng a nih.
Ei Bible-in "Vângduoina diriemtu chu thi mawl raw se" a lo ti a, chûleiin an vângduoina hi hmusitin lo diriem nâwm ei nîu; chuong naw chun Pathien lunginsenna chu ei chungah tla hlau râwi a tih.
Einî North East mî chu Pathien zârin ei vângnei a, sawrkârin a mi buoipui vawng a. A ram ṭawng hmanghai meu hman sawrkarin a ui-in-âr naw a, an ram tieng seng panin ke lâwngin mêl tam an lâwn a, a sûr a sa hnuoiah sûn zân ti lovin an puonthuohai intêlin an nâu le tehai leh an inkei kâwi dul dul a. A ṭhen lam lakah phîngṭâma thî dâm an um a, sâwl leia thî le hrî le hraia thî tam tak an um bawk a nih. An chanin mâi hna chan khawm a tluk zo ta naw a, zuk hrilkhîpui ding khawm um lo rak khawpa chan sie hi an nih. Lungsiet an um em em.
Einîhai chu ei vângnei bîk. Tienlâia Israel-hai ang elin Pathien zârin ditsak ei hlaw a, a mi ṭhuoitu ding mei le sûm khawm ngâi lovin engine (khâwl) hmangin ei Kanân ramah a mi ṭhuoi tlung a. Lâwmthu hi bat loa hril mawl mawl nghâl ding hi ei ni ringawt el.
Indopui lâia silaimu lênglak kâra râlzâmhai angin corona hrî ṭibaium tak lênglak kâra hung râlzâmhai hi, nâute'n thil ṭîum a hmua thlaphâng taka a ṭap rawng rawng lâi chu a nû chun lo hmuin, lunginsiet le duot taka kuoa a pawm vawng vawng ang hin, hmangai tak le duot taka kuoin, lungsie takin lo pawm vawng vawng ei tîu.
LÂWM LÛTNA:
Khuol ramah corona kut lum tuora thlafam chang a,
In vângkhawpuiah ruong leh hung inlâwi lût lo a,
In sakhmêl mâwi ditum tak lo hmuok ding kan la nei chêu hi kan lâwm a,
Chu nêka thil hlû le lâwmum chu Vânkhup hnuoiah thil dang ieng am um chuong a t'a?
In lakhah phût le beisei kan nei naw a,
Kan beisei sun chu in sakhmêl hmû kâr mawl hi a nih.
Corona thlipui nunrâwng tak inlêng vêl kârah,
Khuonu zâra him le dam taka ei vângkhawpui in hung inlâwi lût hi,
Lâwmin lungriem mitthli leh lungsie takin,
WELCOME HOME tîin kan lo lâwm lût chêu.
Pathien zâr le ei sawrkârpa hma lâkna zârin, ei tûlai khawvêl buoina le inzawmin, khuol rama zu umhai inṭhuoi suokna rûnpui chu nasa takin a fe mup mup zing a. A hung tlung ta le la hung ding mêk khawm an um zing bawk.
Ei sawrkârpa kut chu sawr kâr nghâkhlain ei kutdaw nghâk tawp a, a tâwpa chu ei sawr ta khawng khawng. Theida a um naw hle.
Tiena Israel-haiin Aigupta ram chu an ram nêka hnienghnâr lemna hmun a nih tî hre hai sien khawm, an mikhuolna ram a ni mieu leiin an thla a ngam thei naw a, thlo ruol lovin an ram tieng panin Aigupta ram an ṭînsan ang khan, thlang sâppui le kawr le vâi rama zu chêng ei u-le-nâuhaiin an mikhuolna ram chu râl ṭitna hmun a lo chang ta tî hrein, corona hripui inlêngna ram chu râusanin, hmun him lemna, manî khuo le vêng tieng ṭuon zâi an rêl mêk zing. An pieng le murna ram tieng ngâina chun nasa taka hîpin a ko a, a kutin a hûi a nih. Covid-19 râl hrâng ṭit-um tak kârah, lungril rik ṭeu pum le beidawng takin manî hmun le ram tieng tlung kâr nghâkhla em em le rin tak sîin an hung pan mêk a, nî dang anga lo hmuoktu ding khawm nei zo ta lovin, mal ngâwi ngâwiin, manî inlum khawm chang zo ta lovin, riekmaw anga invâiin, châwlkâr hni lâi zet ding chu an thlang lo rûn in rê dup le ngâinatum lo tak chu an lo bêl hrî a ngâi ta a nih.
Nî danga an khuolzin hung inlâwi le chu a dân a dang ta ngêi el. Nî dang chu pasalṭha ram suokin sa hrâng lu a hung hâwn angin, an sûng le kuohai lung lâwmna ding dâm chu an hung hâwn hlak a. Tu ṭum ruok chu thangko angin chanchin ṭha lo le thîna thu thang dâm chu an hung hâwn lem ta a nih. A va mangangthlâk ngêi! Mani khuo le vênga tak ngiel khawm chawngpuah an insa ngam ta naw deu thaw a, corona hripui nunrâwngin mikhuol nîna suoi, ser hmêl se tak chu an chalbâwka nam kâipêkin, hmûsitumna pânser hmu hmai ruol lo langsâr tak el chu a hnutsiepêk a. Chu chû thil chun nasa takin nghâwng a nei naw thei nawh. Manî khuo le tuia ngêi khawm âr khuol angin an thla a ngam ta naw a, mikhuol angin a sukkiltawi zo a, bufâi lâia lungte hlek ang ela inngâina lungril inhnuoi tak a'n neitir naw thei naw a nih.
Mi tam tak chu in sûng khawsak inhawi lemna ding ngâituona leiin, manî inlum khawm thlâkhla thei ta loa khuol rama va ram suok an ni a. Chuonghai hung inlâwi chu pasalṭha ram suok hung inlâwi ang hi an ni a, thi le hring inkâra sa pui sa hrâng va'n hmasawnpui a, hliemna pânser nasa tak kâia kut ruoka in hung inlâwi lût ang hi an ni a, a hrilhaithlâkpêk a nih. Lo lunginsiet a, an thla chen khawm lo huolpêk hi an phu hlie hlie a nih. A thei lem chun nâupa tlân hmang hung inlâwi a pân thuomhnaw ṭha ṭha a lo inbeltir le ran ruol lâia a thâu thâu a lo that ang khan, lungsie takin ei lo lâwm lût ve hi an phu a nih.
Nâupa tlân hmang hman khâng tawp khan a pa'n a lo lâwm lût chun, nâupa tlân hmang khawm ni lo, mani in sûng ngâituona leia hmêl hriet lo rama rimsikna tinrêng tuor huoma va ram suok an nî leiin, châwmâwi khawm an phu ka ti hiel. Corona hripui râwng tak laka him dama in an la hung tlung thei dâm hi chu, a lâwmna siempêk khawm a âwm a, an phu rêng a nih.
Ei Bible-in "Vângduoina diriemtu chu thi mawl raw se" a lo ti a, chûleiin an vângduoina hi hmusitin lo diriem nâwm ei nîu; chuong naw chun Pathien lunginsenna chu ei chungah tla hlau râwi a tih.
Einî North East mî chu Pathien zârin ei vângnei a, sawrkârin a mi buoipui vawng a. A ram ṭawng hmanghai meu hman sawrkarin a ui-in-âr naw a, an ram tieng seng panin ke lâwngin mêl tam an lâwn a, a sûr a sa hnuoiah sûn zân ti lovin an puonthuohai intêlin an nâu le tehai leh an inkei kâwi dul dul a. A ṭhen lam lakah phîngṭâma thî dâm an um a, sâwl leia thî le hrî le hraia thî tam tak an um bawk a nih. An chanin mâi hna chan khawm a tluk zo ta naw a, zuk hrilkhîpui ding khawm um lo rak khawpa chan sie hi an nih. Lungsiet an um em em.
Einîhai chu ei vângnei bîk. Tienlâia Israel-hai ang elin Pathien zârin ditsak ei hlaw a, a mi ṭhuoitu ding mei le sûm khawm ngâi lovin engine (khâwl) hmangin ei Kanân ramah a mi ṭhuoi tlung a. Lâwmthu hi bat loa hril mawl mawl nghâl ding hi ei ni ringawt el.
Indopui lâia silaimu lênglak kâra râlzâmhai angin corona hrî ṭibaium tak lênglak kâra hung râlzâmhai hi, nâute'n thil ṭîum a hmua thlaphâng taka a ṭap rawng rawng lâi chu a nû chun lo hmuin, lunginsiet le duot taka kuoa a pawm vawng vawng ang hin, hmangai tak le duot taka kuoin, lungsie takin lo pawm vawng vawng ei tîu.
LÂWM LÛTNA:
Khuol ramah corona kut lum tuora thlafam chang a,
In vângkhawpuiah ruong leh hung inlâwi lût lo a,
In sakhmêl mâwi ditum tak lo hmuok ding kan la nei chêu hi kan lâwm a,
Chu nêka thil hlû le lâwmum chu Vânkhup hnuoiah thil dang ieng am um chuong a t'a?
In lakhah phût le beisei kan nei naw a,
Kan beisei sun chu in sakhmêl hmû kâr mawl hi a nih.
Corona thlipui nunrâwng tak inlêng vêl kârah,
Khuonu zâra him le dam taka ei vângkhawpui in hung inlâwi lût hi,
Lâwmin lungriem mitthli leh lungsie takin,
WELCOME HOME tîin kan lo lâwm lût chêu.
