Responsive Ad Slot

Simtuiluong khawsuok hmun tin ram tin a um hai ṭhangtlângin In an bâwl pêk

Wednesday, May 27, 2020

/ Published by Simon L Infimate
Muolhoi, May 27, 2020, Virthli (ONP): Vawitûk khan Simtuiluong khawsuok hmun tin ram tin a umhai ṭhangtlângna in Pu Lalchawivung Pudaite, Dintharveng, Muolhoi, Haflonga um a In bâwlpêka lo um chu hawngna le inhlânna hunser Pastor Riengthovung Riengsete in a nei.
   
Hi in hawngna program hi Pu Lalringum Riengsete in a keithuoi a, In neitu tieng Pu Lalchawivung Pudaite, Pi Nemnei Pudaite le Pu Ramsan Pudaite ha'n insûng tieng aiawin lawmthu hrilna hun an hmang.
     

Pu Lalringum Riengsete in inbâwl dân le ngaituona a hung suok dân hai hrilin, Sum hung thawkhawmtuhai anthawka hmu (received) le hmangna (expenditure) hai Report fel takin a pêk a, Upa Hlikam Riengsete in Infuina thucha hrilin, Upa Lalbiekthang Khawbung in Infuina thucha, tawngtai pêkna le Thingpui Ruoi inhlânna hun hmangin hlimtakin dâwntlâng a nih.
 
Hi inhmun - Muolhoi , Zion Vêng a inbâwlna hmun hi Pu Ngamrothang Hmar, EM, NCHAC in an harsat zie hre a a thlâwn tawpa a pék (gift) a nih. Chun Simtuiluong Khawsuok WhatApps Group hmanga Lockdown sum harsat zuol lai tak khawm nisien, Pu Lalchawivung Pudaite chêng mêkna in enin iengtinam thangpui dan a um ding aw ti a hriltlângna nei a ni hnungin, Simtuiluong khawsuok WhatApps Group a active member tamtakin tha ti tlâng a ni hnung ah hma lak tan a nih.
   
Simtuiluong khuo hi NC Hills (Dima Hasao) district, Assam a Hmar khuo laia upa pâwl tak, Undivided Assam- Naga Hills a ni lai, kum 1924 lai vêl a famtah Pu Lalpuivung Khawbung Riengsete in a lo indin tah a nih. Assam- Nagaland ramri hnai a um niin, khuo inhawi le hnienghnâr tak, kohran le sawrkar thawktu thahnem tawk tak lo piengna khuo suongum a lo nih.
     
Kum 2003 a, unau Dimasa le kâra hnam buoina leiin, khuo hi inpâm tak puma râusan le khuo dang dang, state dang dang a indar a um tah anni leiin, sum hung thawlâwm ve nuomhai tadingin Pu Lalringum Riengsete, ICICI Bank Account No. hmangin hmuntin- ramtina um tah Simtuilong Khawsuok hai anthawkin tangka sum pék theina kawt hawng tan a nih.
     
Ni 14/5/2020 (Ningani) khan IN hmun hai inthiel faiin, pil cho tan a ni a, hi Inbâwl Kaisan a thang nuom hai chun thuomhnaw hieng- Thingât (Material donation) Cash dam / account a hai dâm sum hung lût hai ah bul lo tan pei a nih. In bâwlna a hmang ding thingât size dang dang Pu Rolientluong Khawbung anthawkin thahnem tawk tak a hung pek suok an thawk A ban (post) phun phawt a nih. Hieng hai bâkah mi thahnemngai hai anthawk pawisa sum Cash le Bank Account transfer-a hai hung lût peiin hmasawn pei a ni a, 14/5/2020 (Ningani) a bul tan chu 26/5/2020 (Thawleni) khan zo fel thei a nih. A bawlna hin Ni 13 sûng sinthaw a ni a, hi Inbâwl pêkna Kaisan a hin ni sawm pathum sûng tha 127 (Zasawmhni pasari) inthawk a nih.

Pawisa sum hung thawkhâwmtuhai chu hieng ang hin mimal/ sûngkuo Simtuiluong khawsuok hmun hran hran a um le, khuo hran hran anthawkin hieng ang hin an hung thangtlângna leiin zo thei a nih :-

1. Muolhoi, Haflong anthawk = mi /sungkuo 26
2. P Hnachangzawl (New Simtuiluong) anthawk = mi 9
3.Phainuom, Sinlung Hills Mizoram anthawk =  mi 10
4. Saipum, Sinlung Hills Mizoram anthawk = mi 6
5. Saiphai, Sinlung Hills Mizoram anthawk = mi 3
6. Khongsai, Haflong anthawk = mi 2
7. Boro Arkap, Jinam Valley anthawk = sungkuo 1
8. Sakawrdai, Sinlung Hills Mizoram = mi 1
9. Karbi Anglong, SP office le Police station anthawk = 2
10. Aizawl, anthawk = 1
11. Tripura anthawk = 1
12. Kokrajar, Assam anthawk = 1
13. Bihar anthawk = 1
14. Shillong anthawk = sungkuo 1
15. Simtuol Youth Club Simtuiluong = 1
16. United Kingdom (UK)anthawk = sungkuo 1

Total = mi/ sûngkuo = 68 (sawmruk le pariet) zet thangtlâng/ thawkhâwm anthawk Rs. 70,145/- (Chêng Singsari Za sawmli panga) zet dêngbûm a bâwl a nih.

Hi Inbâwlna hin Pu Zarzolien Pudaite, Muolhoi Kanaan veng, Pu Rolientluong Khawbung, Muolhoi, Kanaan veng le Pu Sumsanglal Thiek, Muolhoi Dinthar veng hai pathum hi sinthaw hun sûng ni sawm pathum sûng zet hi sin dang zawng lovin inchat lovin, hma an lak a, chuong ang bawkin Upa Lalbiekthang Khawbung le Pu Chawnga Thiek hai khawma theitawp an suoa, chun Pu Lalringum Riengsete in a bul anthawk a tawp chen in sinthawna kawng le Sum lut hai popo iengkim feltak in a enkawl pek a, Office tieng sin buoi hle karah hma a lak pekna chung ah lawmthu an hril bawk a, sin le ngaituona siem a hmalatu tak a thang hai lawmum an ti hle. Hieng anga khuo le vêng inngainatna le inlunginsiettuona hi um pei sien, thang la hung thar pei dinghai khawma 'Simtuiluong Khawsuok' hmuntin -ramtin a um dar ta hai khawm ni inla, inlainat a inngaina zing dingin "Simtuiluong Khawsuok Whatapps Group"  hmingin ditsakna an hung inhlân a nih.

Don't Miss
© all rights reserved
made with by Simon L Infimate