Responsive Ad Slot

HYA, Barak Valley JHQ Lawmthu Hrilna

Friday, May 8, 2020

/ Published by VIRTHLI
Date 05/05/2020 khan Pu Lalramhlun Khawbung @Ramboi Khawbung S/O Pu Sangkhum Hmarkhawlien chu Guwahati a inthawka Hmarkhawlien  pan dinga hung chu Shillong le Jowai inkarah tuoksiet tuokin hliem nasatak a tuok thu  Meghalaya Police haiin ama phone hmangin a nuhmei an hung hrila (ring dan chun a mobile hi a sie naw a, call list a inthawkin a last call an hung dial nawn ni dinga ring anih) chu thu chu an upa hril nghalin an upa chun thuchieng hriet tuma a hung call-tu hai number ah a call kir chun a hmuna hin a boral nghal thu le a ruong hung ngaiven dinga Shillong Civil Hospital hung pan dingin an hung hrila. Ama hi KTM bike a hung niin ringdan chun motor dang leh an inbaw/insuk ni dinga ring anih.

Hi thu hriet ani le inruol hin tulai boruok enin Hmarkhawlien a inthawka Shillong pana a ruong zu buoipui chu thiltheilo ang deu thaw, Covid-19 leia a ramphek ei buoi ani leiin inthlahrung um tak siin HYA Barak Valley chun Shillong tienga ei unau Shillong HYA le Val-Upa hai hei bierawnin a thei ang anga hma mi lapui dingin inzak inphak dawn lovin ei zuk ngen tawpa. Shillong hi abik taka RED ZONE a sie ani leiin fe-le-hung vel harsatak karah an theitawp suoa hma lo la dingin tawngbau thlamuong um takin an mi lo thlamuonga, lungril beidawng inrum a sawk zangkhai takzet el.

Chu chanchin an hriet le inruol chun HYA Shillong thuoituhai chun chawllo chatlo in a ruong laka Hmarkhawlien tienga thak dan ding ngaituoin hma an mi lak pek nghala, theitawp suo a hma an mi lakpuina zarah a ruong chu 6th May 2020 zan dar 8 velin an insung, Hmarkhawlien ngeiah sawmlut anih.

Hi chungthu a hin HYA Barak Valley chun Unau Shillong a Hmar nauhai, a biktakin HYA thuoituhai chungah nasatakin a lawm hle a, lawmthu hi phone hmanga biek thei thei kuomah lawmthu hril nisienlakhawm a telpuia lawmthu hril hi batah an ngai leiin Social media fethlengin lawmthu kan la hung hril anih.

Shillong HYA hai kan lawm takzet cheu a, kan chunga inthatna hi iengtik khawm ruolzo nawng kan ti cheu a, ei Pathien hringin a tul ang peiin rul lem raw se cheu. HYA vulzing raw se.

In áš­hatna dawngtu hai


Joseph Pulamte
President
Hmar Youth Association
Barak Valley Joint Hqrs.
Assam.

Don't Miss
© all rights reserved
made with by Simon L Infimate