Tuiṭhaphai/CCPur, Virthli (ONP): May 22, 2020 sun dar 11:00 AM khan Rengkai, Tuiṭhaphai, CCpur hmun ah 2nd HPC(D) Reformation Day -cum- The 2nd Death Anniversary of (L) Pu Lalropui Famhoite, C-in-C, HPC(D), GHQ & Chairman, United People's Front (UPF/SoO group) hunser ursun taka hmang a nih.
Hun hmasatak ah “Ṭhangruolin, lungruolin, hnam tadi’n pen ei tiu”, ti hla sak ani a, Jimson Hmar, Public Relation Officer (PRO), HPC(D), GHQ in hunhawng ṭawngṭaina le Pathien kuoma inhlanna a nei zoin program ṭan a nih.
Hi hunser le inzawm hin Alan Hmar, Defence Secretary, HPC(D), GHQ in thuhrilna a neina a chun “HPC(D) Reformation Day” hung suok dan le inṭan dan tak hrilna a neia, “HPC(D) Reformation Day” ti hi kum 2018 laia HPC(D), GHQ le HPC(D), Manipur Region inṭhedar hmaa, pawl khata umkhawm vawng laiin Rengkai hmun ah HPC(D) Council Meeting Agenda-ah Rising Day/Founding Day/Reformation Day hi nei ve ngei ṭha a ti thu a lo putlut le resolution thlak ngeia pawmpui ani thu a hril a. A hril peina a chun Raising/Founding/Reformation Day ti hi hnam dang organization haiin an nei deu vawng a, ursun le phuisui takin an hmang hlak a. HPC(D) ruok chun, “Rising Day/Founding Day/Reformation Day” tia inser ding mumal tak a lo nei ve naw leiin, “Day” nei ve ngei a lo nuom hlak thu le ‘Day’ inser hun a hin “Hnam Sipai” sungah HPC(D) thiltum (Aims & Objectives), hmathlir le pawl fe pei dan ding inhrilhriet tharna huna hmang hlak ding le Hmar puonzar le HPC(D) Flag keipharna nei ni hlak sien, ti rawtsuoka hung um tah le a date (a ni) thu ah “May 22” hi hmang ani nasan tak khawm HPC(D) inṭan hlim a inthawka a thuok tawp chena hnam tadinga inpe le hnesaw taka “Hnam Sipai” enkawl hlaktu (L) Pu Lalropui Famhoite, C-in-C, HPC(D), GHQ a thi ni (date) “May 22” hi ni sienla tiin lungruol taka rel tlang a lo nih thu le (L) Pu Lalropui Famhoite hi HPC(D) tading chun “Father of the HPC(D)” nina title pek hiel khawm a phu hle thu hai a hrillangsa bawk.
LK Hmar, C-in-C, HPC(D), GHQ khawmin thuhrilna hun neiin, Hnam inpumkhatna le inthuruolna hi HPC(D) chun a dittak ani a, hnam inpumkhatna ding hin mipui khawma mawphurna lientak ei nei a nih tia hrilin Hnam Sipaihai khawm hnama an inpekna ah ringum tak le taima taka inpe thar nawk dingin a'n fui bawk.
HPC(D), GHQ tadinga hunser pawimaw tak el hi hmang ani zoin Saikot, CCPur hmun ah (L) Pu Lalropui Famhoite thlan hmun ngeiah fein Hmar Army thupui “Thi leh ruom khatah, dam leh tlang khat ah” ti thupui insamin Condolence Salute le Hmar Puon keipharna hai ursun taka nei a nih.
# File Photos
