CCPur, March 24, 2020, Virthli (ONP): Government of Manipur, Director of Health Services thusuok dungzui chun vawituk khan Thangmeiband, Imphal West District a um nunghak kum 23 a upa chu Covid-19 positive a ni thu a puong. Ama nu hi University of Bristol, England a MBBS inchuk lai a ni a, March 19 khan Manipur hung vuong lut nia hril a nih. Tuhin JNIMS Isolation Ward a sie mek a ni a, final test thaw ding ti a la nih.
Manipur ah Covid-19 a positive hmu ani le inzawm hin CCPur phairuoma vengbuk tin deuthaw chun hma la tharin, Covid-19 laka mimal le vantlang invenghimna dingin sawrkar thusuok hai chu zawm dingin mipui ngenna hai an siema, khuo thenkhat a chun khuo/veng dang mi lut le suok an khap hmak bakah lampui hai an pinga, duty chen sie pawl an um bawk a nih. Manipur puotienga inthawka lut ding hai chun VA hai inhriettirna pek ding, a tul hle naw chun mi ina leng le inpan hai khap ani a, tuol suok mei mei, naupang khawlai suok le inhnel hai chen an khap tawl tah a nih.
Chun, Covid-19 le inzawm bawkin NC Hills, Assam a Muolhoi khuo khawmin puotieng mi lut an khap ta bawk a nih.
