Responsive Ad Slot

CORONAVIRUS: CHINESE DOCTOR HUOISEN DR LI WEN LIANG KHA!

Monday, March 16, 2020

/ Published by Simon L Infimate
Nikum December 30, 2019 khan China ram Wuhan khawpuia an doctor Li Wen Liang in a university classmate hai le an hohlimna hmun private Whatsapp group, an WeChat group ah hieng hin a lo post:

"Kan hospital ah damnaw pasari kan enkawl a. Huanan seafood market a thilzawr an fak leia damnaw an ni hmel. An natna hi kum khat laia SARS natna ang deu kha a nih. Fimkhur ei tiu. Enkawl ding hieng ang damnaw in lo nei pal a ni chun, invenghimna thuomhnaw ha zie hlak ro. Inkaihmat thei a nih".

Chinese ophthalmologist Dr Li Wenliang le a ruolhai mi pasari chu a zingnawk Chinese Police haiin Thana ah an thuoi a. Ramtin an indawnkuol. Public lai thuvuongva meimei thedartu angin an intum. An hospital authority khawma disciplinary action an lak. "Thu indiklo" thedar ta ngai lo dingin an vauhrep. An Whatsapp group WeChat an thaibo pek a. Sin a inthawka hnawtdawk khawm an um.

Dr Li Wen Liang hai thil sopui chu January 7, 2020 khan SARS COV 2 ei hung ti tung ta a nih. Coronavirus leiin January 9, 2020 khan Chinese papui pakhat Wuhan Hospital ah a va thi. Amiruokchu, chu thina chu an ip tlat. Chu zova Wuhun khuosuok mi dang dang an hung thi pei a. Chuleiin January 22, 2020 khan China chun an ramah Coronavirus hripui an leng ti thu khawvel a hril ta hlawl a nih. Thlakhat zo January 30, 2020 khan Dr Li Wein Liang hai natna hri lo sopui  kha WHO chun natna hripui angin a hung puong ta a nih. Coronavirus natna a na patient pakhat a enkawlna ah February 7, 2020 khan Dr Li Wen Liang ngei khawmin chu natna chu a thipui ve ta a nih. A maksan a nuhmei naupai lai le a naupa ei tuorpui. Doctor pasari Coronavirus natna pai damnaw an enkawlna ah natna hri in a kai tawl leiin an thi ve tah. Invenghimna N95 mask kha January thla lailung lai khan an dawng ve chau a nih. Mipui lung a sen em em a. Chuleiin China sawrkarin phut tharin inrangtakin a sun a zanin damnaw enkawl le invenghimna sin a hung thaw ta chur chur a nih. Tuhin chu a re thawkkhat tieng an tah.

Coronavirus Covid 19 hung suok dan sui ding chun China hai animal farming history tlawmte zuk zepsang ei tih.

Kum 1970s lai khan China mipui 360 lakhs bawr chun tam leiin an hringna an lo chan a. Fakkhawp bu le hme hmu lova thi deu vawng an nih. Chuleiin Communist sawrkar chun pasie le daikil khawra um hai chu sakap le ran enkawl theina private farming permission a pek tawl a. Wild animal trade chen a hung sopui ta a nih. Domestic animal le wild animal hieng baak, saphu, ar, mazu, rul, sakei, sihal, mengte ti hai chen a hringa inchawk le zawr theiin a hung um pha ta a nih. Wildlife farming industry chu sawrkar le GDP ta dingin a hung tangkai ta em em a nih.

Amiruokchu, kum 2002 laia China rama SARS natna hri kha hieng ran le ransa zawrna hmun le bazaar Huanan Wholesale Seafood Market sunga mengte zawrna hmuna inthawka suok a nih tiin an hung suidawk a. Insukfaina sin an hung uluk ta bek bek a nih.

Amiruokchu, a ruk a rala ransa vai le sa zawrtu an um hlak leiin khawtlang hriselna a suksiet thei a. A ruka ransa zawrtu hai laka fimkhur zozai thei a ni naw hun a um. Ran ek, ran zun, ran thisen inthielfai lo le ran damnaw thataka enkawl lo hai leiin bazar hmun thenkhat chu tirdakumin a hung inchang ta a nih.

Kum 1976 khan China rama Ebola natna a lo suok a. Baak an lo intum. Mi 14,693 in an hringna an lo chan. Kum 2002 khan SARS an sopui a. Baak bawk an intum. Mi 774 in hringna an lo chan.

Kum 2003 khan H5NI an lo sopui nawk a. Ar an lo intum. Mi 455 in hringna an chan. Kum 2009 khan HINI Swine Flu an lo buoipui nawk a. Mihriem 1,23,000 velin an hringna an chan. Kum 2014 khan Ebola an sopui nawk a. 2018 khan Nipah virus an sopui bawk.

Tuta Coronavirus khawm hi Saphu zawrna Huanan Wholesale Seafood Wholesale Market, Wuhan, China rama inthawka suok ni dingin an ring. A tir a Wuhan Hospital a damnaw admit a um mi sawmli pakhata sawmhni pariet hai khan hi bazaar a inthawk hin sa an lo van chawk ve. January 9, 2020 nia Coronavirus natna leia thi hmasatak pa khawm khan hi bazaar a inthawk hin sa a lo van chawk ve, an tih.

Virus scientist hai hril dan chun Coronavirus natna hri hi baak in a pai hlak virus ang deu hi a ni a. Baak a inthawk bazaar a zawr saphu ah a kaitung a. Huanan Wholesale Market a saphu zawrtu a inthawkin saphu sa inchawtu hai pum ah a kaitung pei a nih. Chinese kum thar lai tak a ni leiin chu hri chun mi dang dang a hung kaihmat ta pei ning a tih.

Tuchena Coronavirus leia thi ta po chu 6,400 vel an tling tah. India a khawm 110 cases confirmed ani tah. Maharastra ah confirmed po 33 an tling tah. Assam, Manipur, Meghalaya le Mizoram chu a la him. Amiruokchu, hi natna laka inthawk hin thataka invenghim a tul. Kut le ke dettol sabon in sukfai ran ding. Inkhul le insim chang bau hip hlak ding. Khawsik le inkhul hai chun mi pungkhawmna hmun fe lo ding. Inzin mi hai fimkhur hle tul a tih.

Chinese doctor mihuoisen Dr Li Wen Liang a thil sopui kha a hun lai khan sawrkarin lo uksak vat hai sien chu hi chen chen hi tlung lo ding ei nih. Coronavirus hri intan dan zawngdawk theina hun pawimaw em em kar thum zet China sawrkarin a lo sukchavai leiin hi hri hin mi tamtak a kaihmat ta a nih.

1943 laia Bengal a famine kha bufai nei naw lei nilovin bufai siethata a umna hmun a lo hrie lo an tamlem leiin kha zat zat in hringna an lo chan pha a nih. Mipui damna thei information indik thedar vat vat hi a pawimaw hle a nih.

Dr Li Wen Liang, Rest in Peace!

-Ziektu

Dada le Jojo-Pa,
Hmarkhawlien

15.3.2020
Don't Miss
© all rights reserved
made with by Simon L Infimate