Responsive Ad Slot

Zo Kutpui hmang: Inremna le muongna um theina dinga hmalak a pawimaw: Zoramthanga, CM Mizoram

Thursday, February 13, 2020

/ Posted by Simon L Infimate
CCPur, February 13, 2020 (HT): Mizoram Chief Minister Zoramthanga chun, Zohnathlak hmun hran hrana um han tuta ei tlung chena inthawk hmasawn pei dan ding ngaituo a pawimaw tiin a hril a. Inremna le muongna dinga hmalakna chu tu ngirhmuna thil pawimaw tak a ni thu hrilin, Manipur a Zo hnam hran hran hai lai inremna le inunauna ṭhalem a um theina dinga theitawpa hma a lakpui thu a hril.

Hi thu hi Mizoram Tourism department le Zo Kutpui Organizing Committee, Manipur ṭhangruola February 12, 2020 nia Kawnpui, CCPur hmuna “We Are One” ti thupui hmanga Zo Kutpui hmangnaa khuolliena ṭhanga thu a hrilnaa Mizoram CM in a hril a nih.

Mizoram CM chun, Manipur a lekha inchuka lo um, a graduate zo kum 1966 a inthawk ramhnuoimia lo ṭhang a ni leiin Manipur a hung hunah Police le inhnawtthlur hlak ni hai sienkhawm kum 2020 a Manipur a hung inzin ṭum hin chu Police in venghimna ṭha tak an pek ta thu a hril.

Unau ei nih ti inhriet a, hmatieng kal pen tlang a hun ta thu hrilin, Zohnathlak hai ṭawng hranhran um chu a pawina a um naw a, sienkhawm mi ṭhehrangtu a ni ding a ni nawh tiin a hril.

A hril peinaah, Naga issue chingfel dinga vawi tam tak a fe ta thu, Manipur, Nagaland, Meghalaya sawrkar hai remtina loa inremna siem a ninaw ding thu le sawrkar le mipui ditna anga inremna siem dan lampui a um thu a hril a.

Hi thua hin Zohnathlak underground le overground dang dang hai leh Aizawl ah inhmuin, tu hnam hming khawm hmang loa UPF indin a ni thu, Aizawl chu Zohnathlak hai Jerusalem a ni dungzuiin hmalakna Aizawl a inthawk ṭan a ni a, mawphurna pek a ni dungzuiin CCPur, Manipur a cheng hnam tum tum hai khawma pawmpui dinga ngenin, chu thila inhnik loa hel hai bei chu sawrkarin a huphur teu nawh tiin a hril.

Sawrkar kona chu Pathien kona anga ngaia inremna siem dinga insingsa seng dingin underground le overground hai a fiel a, tu ngirhmun enin inrem taka um a hun tah. Hmalakna Bangladesh le hmun dangah sunzawm ning a ta, iemanichen zo a ni hnungah Aizawl-ah khawmpui lien nei ning a tih tiin a hril a, chu huna mitin ṭhang thei dinga ṭhang la dingin mitin a fiel.

Zanita Zo Kutpui hmangnaa hin V. Hangkhanlian, Minister, Agri. Vety & AH, Govt. of Manipur Chief host in a ṭhang a, Robert Romawia Rayite, minister, Mizoram functional president in a ṭhang a, T. Thangzalam Haokip, MLA, Chairman, Hill Areas Committee, Manipur, Vungzagin Valte, MLA, Chairman, MTDC Manipur; Ginsuanhau Zou, MLA, Chairman, MANIREDA Manipur; Dr. Chaltonlien Amo, MLA Manipur; TN Haokip, MLA Manipur le JC Ramthanga, IAS, Additional Chief Secretary, Mizoram hai Special Guest in an ṭhang a, ADC Chairman le Member, Churachandpur hai Special Invitee in an ṭhang.

Robert Romawia Royte chun, Mizoram a khawm Manipur a inthawk Zohnathlak contribution hriet tham tling tam tak a um thu, Mizo movement hun lai Arakan a inthawk ralthuom laklutnaah Manipur a inthawk khawmin mi 8 vel an ṭhang thu a hril a.

Manipur-a Zo Kutpui hmangna dinga Mizoram sawrkarin a sponsore chu Mizoram history a dingin state puotienga hun hmangna dinga budget a hmang hmasa takna a ni thu hrilin, hi thil hi inpumkhatna ditna leia state budget a inthawk Rs. 10 lakh phursuok a um a nih tiin a hril.

March 17 le 18, 2020 hai khin Bangladesh-ah Zo Kutpui hmang ning a ta, April thla bul khin Tahan ah nei nawk ning a ta, Indi ram state tum tuma hmang ding hai khawm Mizoram state in a sponsor ding a ni a, chuong hai hmang chun nikhat chu Zohnathlak hnam hran hran hai lai inpumkhatna a hung intlun ngei a beisei thu a hril.

Zo Kutpui hmangnaah Political party politics an rawlnaw a, hiengang hun hi kum 10 vel bek hmang hunah indaidanna nasa takin a hung tlawm ngei ding a nih tiin, inpumkhatna pawimaw thu uor takin a hril.

Chief Host V. Hangkhanlian chun, a constituency sunga Zo Kutpui hmang dinga remruotna um chu lawmum a ti thu hrilin, Mizoram sawrkar sponsor ni sienkhawm budget indainaw um po bieltu MLA a ni dungzuiin a tum ding thu a hril.

Zanita hun hmangna hi Jona Hringngen le Khumi Gangte han an keiṭhuoi a, ṭawngṭainaa hun hawngna Rev. Dr Lalhmuoklien, President, CCPur District Goodwill Council in a nei a, hun hmang sung hin hnam tum tuma Cultural Troupe han hnam lam inentirna an nei bakah Custume Parade nei a ni a, Mizoram le tuolsung a inthawk hlasakthiem dang dangin hla an sak.
Don't Miss
© all rights reserved
made with by Simon L Infimate