Responsive Ad Slot

ICI Kristien Thalai Pawl 36th General Conference hlimtlang taka hmang zo

Monday, February 17, 2020

/ Published by Simon L Infimate
Zairawn, Feb 17, Virthli (ONP): Independent Church of India Kristien Ṭhalai Pawl Inkhawmpui Lien a vawi 36-na (February 14-16, 2020) Zairawn, Jiribam a innghat chu hlawtling taka hmang niin zanizan khan a lo ṭumṭiek tah.

Zani Pathienni zingkar KṬP Day ursun takin inser a ni a, Upa Dr. Zawlthanglien Changsan, Chairman, CKṬP in Flag keipharna a nei zoin Presbytery tin le City Church a KṬP ṭhuoituhaiin Flag keipharna an nei a, KṬP Anthem " Lal Iengkim Thawthei" ti hla sakna nei a nih. General Conference nei a ni sung hin Pastor Dr. James R. Ruolngul; Associate Evangelist at Large, Upa Evan John; Secretary Finance, Rev. BL Sandam; Executive Secretary, Rev. Dr. JL Songate le Youth Coordinator, Rev. HP Runremthang haiin Pathien thutak hrilna hun an hmang.

Rev. Alan L. Thiek, Secretary, CKṬP in report a pek dungzui chun hi inkhawmpuia fe mikhuol reception a inzieklut danin Zairawn khuo a tlung po chu 1,300 an ni a, inlan a thang 650 niin mikhuol fekhawm popo chu 1,950 an ni a, Inkhawmpui lien palai 148 an fekhawm bawk a nih.

Pathienni zan inkhawm hun ah inkhawmpui sunga inruolsiekna chi dang dang a lawmman puongna le semna nei a nih. Hlapawlpui inelna Buonglienkung Music Award a pakhatna chu Guwahati City Church in an laka, Trophy le Sumfai cheng ₹ 20,000 inhlan an ni a, Meghalaya West le Assam Hills Presbytery haiin a pahnina le a pathumna an lak bawk a nih. Best Choir Conductor in Tv. Ebenezer Khawbung, Meghalaya West Presbytery thlang a nih.

Solo competition Rev. Thangngur Music Award 2020 chu Tuiá¹­haphai Presbytery anthawk Grace Ramhlukim chu a thiemtak niin lawmman in sumfai cheng ₹ 20,000 le Chawimawina thilpek inhlan a ni a, Assam Hills a inthawk Elina Riengsete le Vangai Presbytery a inthawk Sophia Lalparmawi haiin a pahnina le a pathumna lawmman an dawng a nih.

One Day for Christ (ODC) pe ṭha tak lawmman chu Lamphel ICI Ṭhalai hai inhlan an ni a, Guwahati City Church chu Overall Activity lawmman inhlan an nih. Hi huna hin Intermediate Solfa exam a hlawtlingna chang mi 4 hai kuomah Certificate inhlan an ni bawk.

Youth Co-ordinator (YCO) nilai mek Rev. HP Runremthang chu a term a tawp ta leiin YCO thar Upa Evan John leh charge inhlansawngna hunser ICI Moderator le Executive Secretary hai hmuhawia nei a nih.

Program hmang a ni zoin KṬP Anthem sak a ni a Rev. Lalnghillo, P/S, Jiribam Presbytery in Conference kharna le malsawmna a hril zoin hun suktawp a ni a. Hun hnina ah Rev. H.P. Runremthang Night hmang niin hla ruoi ṭhe a ni a, hun hlimum takel hmang a nih.

Inkhawmpui Lien hmang hun sung hin Rev. Thangngur Music Awardee, Presbytery dang dang anthawka hlasakthiem hai le ICI Central Choir haiin hla a rawngbawlna an nei hlak bawk a nih.

Inkhawmpui Lien hmangna hall hi a lien dan chu 150 feet a sei ani a, a khang chu 100 feet a sei niin inkhawmpui sung hin mipui an bit mur zing a nih. Chun, Inkhawmpui Lien hmang a ni sung hin mikhuol hai ta dingin Medical Booth khawm hawng niin, inkhawmpui hun sunga damnawhai ta dingin Ambulance iengtiklai khawma hmang thei dingin Shri. Ashab Uddin, Jiribam MLA in a hung tum bawk a nih. 37th General Conference 2021 chu Assam Hills ah innghat a tih.


Don't Miss
© all rights reserved
made with by Simon L Infimate