Responsive Ad Slot

Assam rama Hmar Autonomous Council demand le inzawmin inpawltlangna nei

Thursday, February 20, 2020

/ Published by Simon L Infimate
Hmarkhawlien, February 20, 2020, Virthli (ONP): Assam rama Hmar Autonomous Council demand le inzawmin Cachar district a Hmar hnam ṭhuoitu Hmar Inpui, Barak Valley Hmar Indigenous People's Forum, Cachar Hill Tribe Headmen Association le hnam ṭhuoitu hlun iemanizat hai inhmuna le inpawlkhawmna hun liemtah February 15 - 17 sung khan nei a nih.

Cachar a Hmar khuo pawimaw le ram ṭhenkhat Khawmunlien, Tuikuol, Vapuol, Ngaibanthar (Khawtlir) le a se vela khuohai sirna le kanna khawm nei sa ani bawk. Hi huna hin khuo lal (headman) ṭhenkhat hai leh Hmar political demand issue a inhrilhrietna hun nei a nih.

Tarik ni 17 khan Barak Valley Hmar Inpui President Pu El Rejoy keihruoina hnuoiah ''Sharing and Discussion on Hmar demand for Separate Autonomous Council in Assam'' ti thuah inṭhungna hun Hmarkhawlien, Assam a hmang a nih. Hmar Autonomous Council le inzawma sawrkar le inbiekna nuhnung tak January 7, 2020 report chu Pu Lalawmpui Faihriem (delegate Assam Peace Talk) a’nthawk ngaithlak a nih. Inbiek nawk a ni hmaa la ennawn ding thil ṭul umhai chungthuah chipchier taka hriltlangna hun hmang a ni bawk.

Hi huna hin Hmar Inpui Barak Valley ṭhuoitu hai le Cachar Hill Tribe Headman Association Secretary, Pu Lalzawmthang bakah Assam Peace Talks delegates a'nthawk Pu Roger L. Joute le Pu Chawnghmunlur Varte hai an ṭhang.

Thukhat vuoa ei hmalakna sukhrat nawk zuol ani theina dingin an hma tieng Consultation on Proposed Hmar Autonomous Council in Assam - Concept and Structure ti thupui hmanga nei vat remti a nih. Chun, Hmar Inpui Barak Valley inrawinain March thlabul hin Cachar a Hmar khuo headman hai le inhmuna hun ursun taka program hmang tum a nih.
Don't Miss
© all rights reserved
made with by Simon L Infimate