Responsive Ad Slot

Dr. Chaltonlien Amo in Tipaimukh biela School le electric chungchanga zawna a siem

Thursday, February 20, 2020

/ Posted by Simon L Infimate
Imphal, February 20, 2020, Virthli (ONP): Manipur Assembly Session fe mek a um ah Dr. Chaltonlien Amo, Hon'ble MLA & Chairman, PAC chun vawisun khan Tipaimukh biel sunga school chungchang le electric chungchang ah Manipur Assembly ah zawna a siem.
Dr. Chaltonlien Amo chun Tipaimukh biel sunga High School le Upper Primary School haia teacher a bikin Science le Math Graduate Teacher posting mek hai hming list chu Education Minister an dawn bakah school danga utilized a um teacher hai hming list a hni bawk a nih.

Dr. Amo zawna dawnin Education Minister chun teacher hai hming list le postingna hmun peiin, sanction post 272 um laiin teacher 176 chau an um thu le hieng teacher 176 lai hin teacher 45 hai chu school danga sawr/utilized anni thu a hril. Dr. Amo chun dawnkir in Assembly Constituency pakhat ve niin School 28 lai umna ah Science Teacher -5 le Math Teacher-2 lai chau um chun iengtin am inchuklai naupang hai inchuktir hne'ng an ta tiin Assembly Hall ah a khekpuia. Teacher an um naw leiin naupang admission thaw ding khawm an um naw thu, Senvon High School a khawm nikum inchuklai naupang 300 lai zet an nei laiin tukum mi 32 vel chauin admission an thaw thu hai a hril langsa bawk a nih.



Dr. Amo chun, iengleia teacher 45 hai utilized anni am, a biel nekin biel dangin teacher an hmu rawn nasan, teacher hai chunga action lak ani ding am ti hai zawnna a siem bakah Manipur Law & Order a tha ei ti si chun IRB/Police lak teu teu nekin Teacher lak teu teu chu a tha lem naw maw? ti zawna hai a pek a. Minister chun house member popo in tha an ti tlang leiin an hma tienga siem le sukfel ning a tih tiin a dawn a nih.

Electric meivar chungchanga Dr. Amo chun khuo electric meivar la tlung nawna le tlung ta hai list a hni baka, electric meivar la tlung nawna khuo hai intlungtirna dingin hmalakna a um am ti hai le electric tlungna dinga hmalakna fe mek hai le an zo hun ding hai zawna a siem bawk a nih. Power Minister chun dawnin, electric ban le hrui keina sin hai a fe meka, March 2020 sunga zo hman vawng dingin a hril a nih.

Dr. Amo chun February 26, 2019 khan House ah zawnna pangngai hi lo siem tah in, kha huna khan Power Minster in March 2019 a zo fel vawng ding a ti a, tuta March 2020 a ti nawk hi ringtlak ani ding am ti le Tipaimukh biela khuo hai popo electrified/meivar tlung vawng tah anga hril hi Minister in a hriet naw lei ani thu le a hmuna inspection thawa fe officer hai khel letder report-tu hai chunga action la dingin a hril bawk a nih.

Don't Miss
© all rights reserved
made with by Simon L Infimate