Responsive Ad Slot

Dr. Chaltonlien Amo in biel fang; Work inspection nei

Saturday, February 1, 2020

/ Posted by Simon L Infimate
Parbung, February 1, 2020, Virthli (ONP): Tipaimukh MLA Dr. Chaltonlien Amo chun January 22-31, 2020 hun sung khan Vangai tlang, Tuiruong dung le Hmarbiel a khuo thenkhat hai fangin works chi tum tum thaw a um mek zofel tah le la zofel lohai kanna le enfelna sin a thaw. Hi huna hin  mipui mamaw  Water Tank, Community hall le a dang dang khuo thenkhat a bawl le siema um mek hai inspection a nei a, works chi tum tum hai hi khuotin-ah a velin sem ruol pei ani ding thu a hril.

Hi huna hin Dr. Amo chun siem mek a um- Taithu le Patpuihmun inkara Tuiruong Leilak le Tipaimukh Road (NH-2) hai khawm enfelna sin thawin a biel mipuihaiin an sawr tangkai vat dan ding lampui ngaituoa hma lak pei a tum thu a hril . Electric chungchangah nikum Christmas hma ngeia MSPDCL han a biel sunga electric meivar tlungnawna khuo hai tlung vawng dinga ti, an intiemkamna hlen loa an um chu pawi a ti thu hrilin, khuo thenkhat a haia electric meivar ngiet leia protest an nei chu a ta dinga tha petu ani ding thu le mipuihai thlawpna chu a pawimawizie thu hrilin February thla a Assembly nei ding a hin nasataka a khekpui ding thu a hril.


Dr. Amo chun khuo a fangna haiah Khawtlang thuoitu, VA, HKI le SKI hai inpawltlangna le inrawntlangna hun a hmangpui a, mipui a inthawka zawna siema umhai dawnna neiin hma lak pei dan ding hai hriltlangna nei a nih.

Dr. Amo in a biel a fang huna hin Tipaimukh biel sunga Huon neihai ta dinga an huon rahai zawrsuok thei dan ding lampui khawm ngaituoa hma lak pei a tum thu a hril a. Ama ngeiin Doctor sin a thawlaia Patpuihmun rama a Atkawra bil siem fangna neiin huon ra tamtak zawr suma inchangthei hai chu a zawr dan ding lampui sawrkar ah intlunin bawzui pei a tum thu Virthli Palai a hril.

Don't Miss
© all rights reserved
made with by Simon L Infimate