Responsive Ad Slot

The Pathway School in Annual Meet 2019 an hmang

Wednesday, December 4, 2019

/ Posted by Simon L Infimate
Tuithaphai, December 4, 2019, Virthli (ONP): Tulaia Churachandpur khawpui sunga School tha a an ihril le nu-le-pa tamtakin an nauhai seilienna dinga an idit le mi tamtakin admission an thaw rawp na hlak- 'The Pathway School' chun vawisun khan an school campus, Nehru Margh ah Annual Meet 2019 hlim le lawm takin an hmang. Hi huna hin Chief Guest dinga ti Ms. Amrita Sinha, SP, CCpur chu remchang nawna leiin a hung thei nawa, a aiin  Hasby Haokip, Addl. SP, CCpur a thang a, Guest of Honour in Shri. M. Rameshwar Singh, National Member, Committee for Combating Atrocities against Members of Scheduled Castes, Ministry of Social Justice and Empowerment, Govt. of India a thang.

Hi huna Chief guest in thu a hrilna a chun hun hlut zie hrilin a vawng dan thiem dingin inchuklaihai an fui a, an lekha inchuk hi high school a tawp el loa inchukna insang lem beiseia nu-le-pa han an inchuktirna san hre a thei tawp suoa Higher secondary, College le Universay a hai chen inchuk thei dinga thang la dingin an fui tawl. Hriselna hi a hlu a tangka sum tam takin a man naw thu hrilin an hriselna vawng tha dingin a hril a, fak le dawn thuah fimkhur dingin le hriselna ta dinga tha lo kamcherek fa mei mei loa nu-le-pa haiin hmangai tak le duot taka an buotsai pek fak le dawn  hai fa hlak dingin an fui tawl a, nu-le-pa hai khawma an nauhai thatnawna le an thil thaw suol hre lova nuom tan a tan lo dingin an fui a, hotuhaiin zilna an pek huna hai hriethiem hlak dingin an fui tawl bawk. Hi huna Guest of Honour in thu a hril huna technology in hriselna le inlaichinna a suksiet dan hai ursun takin a hril a, nunchang pawimawizie thu hrilin ei tum ram tlung ding chun mani nunchang vawng that a pawimaw anih tiin a hril a, vawisuna ei hun hmang dan hin zinga ei hmakhuo ding tamtak a hril a, chuleiin ni khata darkar 24 ei nei hi hlawk tak le thiem taka hmang hlak dingin inchuklaihai an fui tawl.

Hi hunser hmang huna hin Rita Vanlalchhanhimi, Headmistress, The Pathway School anthawkin thuhril tawi ngaithlak niin Chief Guest in Year Book 2019 tlangzarna a nei a, Guest of Honour in Student of The Year le Overall Champions Trophy inhlanna a nei.

Program hmang  ani sung hin student han  Lam hmunuom um tak tak el, drama le Skit '' Impact of Mobile phone" inentirna hun an nei a, mipui mit a tlei hle. School Choir le hlasak thiem dang dang han hlain mipui fekhawm hai an inawi hle bawk. Hi hunser vawngtuhai chu inchuklaihai niin saptawng an thiemin hun keithuoi dan an hnesaw hle . Hun khar tawngtaina Rev. M. Letkhogin in a nei zoin dit khop lo takin hun suktawp a nih.

Don't Miss
© all rights reserved
made with by Simon L Infimate