Responsive Ad Slot

SHC huomsunga khekringna chungchanga thupek

Thursday, October 10, 2019

/ Posted by Simon L Infimate
Aizawl, 10 October, 2019, Virthli (ONP):
Sinlung Hills Council (SHC) General Election hmasatak chu hung tlung ding November ni 5, 2019 hin SHC huomsunga khuo 31 a polling station 38 ah nei ding a ni a, inthlang hi himtak le tlamuongtaka nei a ni theina dingin Aizawl DC le District Magistrate ni bawk Pu Vanlalngaihsaka chun khekringna (loudspeaker) hmang dan ding chungchangah thupek a'n suoa, mi thukhawm zan dar 10 a'nthawka zîngtieng dar 6 chen thuneituhai kuomah phalna la hmasa lovin loudspeaker amani P.A. system reng reng hmang phal a ni nawh.

Hi thupek hin magistrate bakah police le Armed forces hai huom naw'ng a ta, thupek sût a ni ringawt naw chun sawrkar order insuo ni October ni 4,  2019 a'nthawk thlahni sung huom/aw'ng a tih.

Thupek bawtsiet hai chu dan anga hrem an ni ding thu, sawrkar thusuok chun a tarlang.

Vawisun khan SHC election le inzawma nomination thelût thei hun sung chu zantieng dar 3 khan a lo tawp tah a, hriet thei chinah biel 12 ah mi 38 laiin nomination an thelût a nih.

Nomination paper hai hi zingah October ni 11, 2019 hin enfie nîng an ta, inhnukdawk theina hun tawp chu October ni 14, 2019 a nih.

SHC huomsunga hin vote nei pasal- 10,509 le nuhmei-10,405 a rengin mi 20,914 an um a, polling station 38 lai a um a nih.

Vote hi November ni 5, 2019 zing dar 7  le zantieng dar 4 inkar thlak nîng a ta, hi ni vêk hin vote tiemna nei nghal nîng a tih.

Election process hi November ni 8, 2019 ah zo fel hman tum a nih.

Tuta SHC interim period hi November ni 8, 2019 ah a tawp ta ding a nih.

State a sawrkar lai MNF le HPC chun seat insemin MNF in seat 7 an changa, HPC in seat 5 an chang thung. Court thupek leiin HPC candidate hai hin independent in nomination an thelût niin, ei thulakna chun a hril.

Hriet thei chinah Congress in Saipum constituency ti lo constituency dang 11 ah party danghai leh thawk hmunkhatin nomination an thelûta, BJP in 2 le Independent pangai mi 13 an um nia hriet a nih.
Don't Miss
© all rights reserved
made with by Simon L Infimate