Jiribam, October 23, 2019, Virthli (ONP): Tarik 20, October 2019 zân dar 6:30 vela siettuok, Pu. Thanzuol of Dolakhal a In kâng le inzawmin, HYA Jiribam JHQ chun sawmdawlna sin thaw dingin thuthlûkna alo neia, chu le inzawm chun vawisun khan Jiribam biel sunga khawtin hai fangin, mipuihaiin siettuok hai sawmdawlna ding tia an lo thawkhawm hai chu HYA Jiribam JHQ in auto truck thuoiin an khawn khawm.
Sawmdawlna sum le puon hai hi in neitu hai kuoma inhlanna nei nghal ani a. mipuihai tlawmngaina zarin sum le puon tam tak dawldawk a nih. Thahnemngai taka thangpuina petuhai chunga HYA Jiribam JHQ chun lawmthu a hril tak meua, chun HYA tlawmngai pawl han inhnik tak el theitui an dawnna man ding Pu. Chonga of Hmarkhawlien in phal takin a hung thaw leiin HYA chun a chunga lawmthu a hril baka Branch tina HYA/VAL hai chunga HYA Jiribam JHQ chun lawmthu a hril tak meu a nih.
