Responsive Ad Slot

Muoldam Khuoin Meady Patta An Lawm

Friday, September 20, 2019

/ Posted by VIRTHLI
Muoldam, September 19, 2019, Virthli (ONP): Vawisun Thlaram ni 19 hin Cachar district-a Hmar khuo Muoldam chun Meady Patta sawrkara inthawka an hmu chu, ruoi leh ursun takin an lawm.

Lawmna huna hin Cachar phaia Hmar hnam thuoitu hieng HNU President Dr. Vanlallien Pulamte (Khuollien) Fiel Bîk -  Hmar Inpui President Pu El. Rejoy Hmar, ICI Cachar Presbytery Secretary, ICI Jiribam Presbytery Secretary, Headman Association Cachar President le ICI bieltu Pastor hai an thang bawk.

Muoldam Farming Co-operative Society (MFCS) Ltd. Secretary Pu L.R. Thiek chun Meady Patta an hmu theina dinga an hmalakna kimchang takin a hril a. Hnam le kohran thuoituhai khawmin hieng ang hlawtlingna Muoldam khuoin an chang hih lawmum an ti thu an hril táwl.



MEADY PATTA Muoldam khuoin an hmu hi Bigha 1000 zet niin, sawrkar ram man ang chun Bigha khat hi Rs. 3 Lakhs a nih.



MEADY PATTA umzie chu hi hin hril a nih:
https://youtu.be/KA3k3lJ8qiQ

Muoldam khuo hi in 52 vel chéngna a ni a. Meady Patta hi sungkuo tinin an chang seng a nih. A umzie chu sung tinin ram nuoi 5 man neka tlawm lo an nei seng a nih. Chuong a ni chun, Hmar khawvela khuo intodeltak ni ngei an tih.

Muoldam khuoah hin kuva incháwk ding a um naw a, lekhaziel khawm an zawr chuong nawh. In 52 khuoah hin ziel hawp mi 3 an la um a, Tobacco Free Village ni an tum thu hriet a nih.

Lawmna program hi zîng dar 11 a'nthawk zantieng dar 3:15 chen hmang a ni zoin lawmna ruoi kîltlang a nih. In 52 khuo inchawng ni hin vawksa Kg. 81, arsa Kg. 17 le ngasa kg 5 lai zet buotsai a nih.






Don't Miss
© all rights reserved
made with by Simon L Infimate