Responsive Ad Slot

Dr. Chaltonlien Amo in PAC Chairman sin a tan

Thursday, September 19, 2019

/ Posted by VIRTHLI
Imphal, September 18, 2019, Virthli (ONP): Manipur Financial Year 2019-2020 a dinga Public Account Committee(PAC) Chairman dinga ruot- Dr. Chaltonlien Amo, Hon'ble MLA, 55-Tipaimukh A/C chun vawisun September 18, 2019 khan a Office-ah kai tanin a sin a lo chel fel tah. Dr. Amo chun hi huna hin a official hai- Manipur Legislative Assembly a Addl. Secy., Dy. Secy., Under Secretary le Central a inthawk Pr. Accountant General, Senior Deputy Accountant General le Deputy Accountant General hai ko khawmin hma lak dan dinghai hriltlangna a neipui tawl.


Mi tamtak hriet nuom Ruling party ni si loa, hi chen Congress member ni zing sia PAC Chairman hi iengleia tling thei am ana? ti zawna a dawnna a chun ,Dr. Amo chun Manipur Legislative Member mi 60 hai lai election hi nei a ni thu a hril a. Dr. Amo chun Public Account Committee(PAC) hi Manipur Legislative Assembly in a ruot reng, Finance Committee hai laia a lien tak a ni thu a hril a. Opposition le Ruling party hai inkawpa inthlangna hi nei a ni thu . Committee members 7 thlangna a hin a tling ve thu le, chu hai lai a Senior tak ani leia a ni dan ding reng (by convention) a Chairman dinga ruot a ni thu a hril.

PAC Chairman a tling le inzawmin, Financial Committee- PAC hin  ieng sin tak am ana an thaw ding? ti Virthli Palai a zawna Dr. Amo in a dawnna a chun an sin ding chu Accountant General Office in Department tin audit a thaw hai, thil indiknaw le thil felhlel um hai Finance Committee a an hung putlut huna hai, Finance Committee hin enfietu sin an thaw ding thu, department in a thaw ding a thaw naw dam, sum tamtak lak dawk ni sia , sin thaw loa um dam, sawisel tul hai sawisel ding le sawrkar ah action lak ding tul hai an lak ding thu a hril a. Tuiruong Leilak bawl mek a um hi entirnaa hmangin tuchena zo loa a um nasan hai bawzuina le enfelna sin thaw dingin an fe thei thu a hril bawk. Manipur sung khawlai hmun khawm nisien, sin thaw mek a um hai inspection tul hai iengtiklaikhawm inspection thaw dingin an fe thei thu a hril a. A tul chun Manipur puotienga khawm study tour neiin mi thaw dan hai, mi hmalak dan hai va en dingin phal an ni thu a hril.
Don't Miss
© all rights reserved
made with by Simon L Infimate