Responsive Ad Slot

HSA Guwahati 37th Freshers' Social Meet-cum-General Election 2019 puithu taka hmang

Sunday, September 1, 2019

/ Posted by Simon L Infimate
Guwahati, August 31, 2019, Virthli (ONP): Hmar Students' Association (HSA) Guwahati Joint Hqtrs. chun vawisun khan NEZCC, Shilpgram, Panjabari, Guwahati hmun-ah 37th Freshers' Social Meet-cum-General Election 2019 puithu takin an hmang. Hi huna hin Khuollienin Pu Ngamrothang Hmar, Executive Member, North Cachar Hills Autonomous Council (NCHAC) a thang. Hun hmangna hi Tv. Lalthutlung Zate le Nk. Elizabeth Thiek han hnetakin an keithuoia, hun hawngna hla "Dar ang lengna" mipuiin sakna an nei zoin Upa L. Infimate in hun hawng tawngtaina a nei a, Tv. Daniel Khawral, Preseident, HSA Jt. Hqtrs. Guwahati in lawmlutna thucha hrilna a nei.

Khuollien Pu Ngamrothang Hmar, EM, NCHAC in thu a hrilna a chun Pathien ti hi a pawimaw tak anih tiin a hril a, ei hringnun hmangna a hin Pathien ti dek pumin kal chawi hlak ei tiu tiin a hril a, inchuklai fekhawm hai chu nu-le-pa ha'n Guwahati a an inumtir nasan hre a, mani thil tum ah chieng dingin le tum neia lekha taimataka inchuk dingin an fui tawl a. A hril peina a chun mani inringzona (self confidence) nei dingin inchuklai fekhawm hai an fui a, mani a inringzona nei dingin le inringzona ei nei chun ei hlawtling hlak ding a nih tiin a hril a, mani thiem zawng, mani inhnikna zawng hai hre a kam peta thang la sau sau ding ei nih tiin a hril .Vawikhat vawihnih hlawsam leia lunghnuol ding ei ni naw a, thaw fan fan ding ei ni lem anih tiin a hril. Guwahati a lekha inchuk dinga um phak chin hai hi mihai ngaiven an ni thu, mi tamtakin an thlir zing thu hai hrilin hlawtlingna chang a mani khuo a hai inlawi tum seng dingin an fui tawl. A mimal le an sungkuo chanchin hrilna neiin harsatna tamtak a inthawka seilien a ni thu, sikul tha a hai a kai phak naw thu, Guwahati a hai sikul kai a lo tum hlak thu le a kai theinaw zie thu hai a hril a, harsatna a tuok hai chu chaupui el lova chona petu an ni lem thu hai a hril. Hlawtlingna hi awlsam deua chang thei an naw zie thu le harsatna a tuok hai chu chona (challenge) a hmangin hringnun a hmang dan hai hrilin Pathien zar chauin EM khawm vawihni lai a tling thu a hril bawk. A hril peina a chun thil ei thawna tinreng ah- lekha inchuktu nisien, sum dawngtu le thil dang dang a fak zawng khawm ni unla, thaw mei mei nawng ei tiu, ei thaw tak tak chun ei hlawtling hlak ding a nih tiin a hril a. Hun vawng dik a pawimawizie thu hrilin hun vawng that tum hlak ei tiu tiin hi huna fekhawm inchuklaihai kuomah hun hlut zie ursun takin a hril. Thu a hril zoin HSA Guwahati thuoituhai hai kuomah thilpek inhlanna a nei nghal bawk.

Hi huna hin Rev. Dr. H.M Songate in freshers hai ta dingin tawngtaipekna le infuina thucha hrilna a nei a. Lekha inchuktu han taimakna, tuorselna le tumruna neia inchuk ding an ni thu, sin inrim le rimsikna hai pawisa lova hling le buor hai nerthlenga sin thaw ding an ni zie thu hai ursun takin a hril a, thil tum fel tak nei dingin an fui tawl. HSA Guwahati Adviser- Pu Thanghlun Hmar, IRS in thu a hrilna a chun thil ei thaw hrim hrim hi titak deuin thaw hlak ei tiu, mei mei hi ban ei tiu a, thil iengkim ei thawna a hin lungril le ngaituona seng ei tiu a, chu chun hlawtlingna ei chang hlak ding a nih tiin a hril a. Lekha an chuk laia a thang lak dan hai, nu-le-pa sukbuoi lova mani a intodel tum tlat mi a ni thu, harsatna a palthlang dan hai le thangthar inchuklai hai ta dinga chona pe theitu ding a mimal tawnhriet hai hrilna a nei a. Hi huna hin Tv. David Keivawm, President, ISF, NC Hills le KSO, Guwahati hai khawma thuhrilna hun an hmang ve.

Tukum 2019 hin Freshers mi 80 lai an um a, hi huna thang mi 21 han inhmelhrietna le self introduction an nei a. Mr & Miss HSA Guwahati Freshers 2019 dingin Tv. Immanuel Varte le Nk. Cecilia Songate thlang an nih. Hi huna hin Tv. Eric Ralsun, Gen. Secy., HSA Guwahati le Tv. Daniel Khawral, President, HSA han khuollien Pu Ngamrothang Hmar chawimawina thilpek inhlan hunser an hmang a, Nk. Lalditpui Hmar keithuoina hnuoiah Guwahati HSA members inchukna tienga tha thaw zuol hieng Sara Darngawn (HSLC), Rachel Sielhnam (HSSLC), Rosangpui Khawbung (Degree), Dorothy Hmar (P.G) hai kuomah Meritorious Award inhlanna nei a ni a, Essay writing result puonglangna le lawmman semna hunser Judge han an nei bawk.

Hi hunser hmang huna hin Upa L.K. Varte Presiding Officer keithuoina hnuoiah Kum 2019-2021 sunga HSA Guwahati thuoitu ding hai thlangna nei a ni a, thuoitu dingin hieng hai hi thlangtling an nih:
President- Tv. Lalramvulzing
Vice- President- Tv. Daniel Khawral
Gen. Secy. - Tv. Eric L. Ralsun
Asst. Gen., Secy.- Stalone Lalhnethang
Fin. Secy.- Nk. Loicy F. Tusing
Treasurer- Nk. Lalditpui Hmar

Thuoitu thar han Oath taking an nei zovin Pastor Robert Vanlallien in tawngtaipekna a nei a. Vote of thanks Tv. Lalramvulzing, Vice- President, HSA Guwahati in hrilna a nei a, HSA Guwahati Cultural Troupe han hnam lam mawi tak el inentirna an nei bawk.

Freshers Meet hmang huna hin Guest Artiste Nk. Lorinda Varte, Tv. B. Lalsanglien Inbuon han hla mawi tak tak sakin mipui an inawia, Nk. Rotlingpui Khawbung, Nk. Christina Darngawn, Nk. Mary jone hai khawma hla in mipui fekhawm hai an inawi. Hi huna hin Ruoi inhlanna Upa Lalmalsawm Hmar in a nei zoin, ruoi inhnik tak el hlimtlang takin kiltlang a ni a, Pastor Vanlalsang Khuptong in hun khar tawngtaina a nei zoin hun dit khawp lo takin suktawp a nih.

Don't Miss
© all rights reserved
made with by Simon L Infimate