Responsive Ad Slot

HPC(D) General Headquarters in Hmar Inpui GHQ lekha a thawn

Thursday, September 12, 2019

/ Posted by VIRTHLI
CCPur, September 12, 2019, Virthli (ONP): Mr. Stanley Hmar, Secretary, Info & Publicity HPC(D) General Headquarters: Sinlung chun Hmar Inpui (Hmar Supreme House) General Headquarters chu Thudik Puongna - II ti thupuia hmangin lekha a thawn. HPC(D) tobul le vawisun chena a ngirhmun indiktak chu Hmar mipui laia tlangzar makmawa a hriet leiin Virthli a hung insuo a nih.



To,

The President/General Secretary
Hmar Inpui (Hmar Supreme House)
General Headquarters, Churachandpur, Manipur

Subject: Thudik Puongna - II
“Chuongchun, khelhril banin mani venghai kuomah thu indiktak hril seng ro, inpengtuo seng ei ni sih a.” ~ Ephesi 4:25

Hmar hnam sung, abik taka a chawipawlhai laia HPC(D) tobul le vawisun chena a ngirhmun indiktak hi Hmar mipui lai hin tlangzar hi makmaw a hung ni ta leiin, mimal hming suklang a tulna chungchangah, insukmuolpho tumna a ngailo dingin mipui ei inngen hmasa a nih. THUDIK LE INDIKNA’N EI HNAM LAI ROREL MAWL RAW SEN.

Abik takin Mizorama unau Hmarhai chun India danpui besana mania roinrelna (Autonomous Council) suol suok tumin 19th October, 1985 khan HMAR CONFERENCE tiin Vaitin khuo, Mizoramah programme siem ani a, conference thupui khawm “HMAR POLITICAL FUTURE” ti a nih. Chu hmalakna fe pei chun Mizoram Hmar Association indinin, 9th December, 1986 chun Sakawrdai ah Hmar Convention ko ani nawk a. Chu Association chu Political Party-a inletin, Hmar People’s Convention (HPC) a hung ni ta a nih.

Autonomous District hnina Memorandum hmasatak, October 5, 1987 kum khan Mizoram Sorkarah pek ani nghe nghe. Hringna hlu tamtak chana nasataka Mizoram Sorkar le HPC an innawrna chun INREMNA THUTHLUNG July 27, 1994 khan HPC le Mizoram Sorkar chun an lo ziek ta a nih.

27th July 1994 inremmna chu Mizoram Sorkarin tamtak a ngaitha leiin, 1995 chun HMAR PEOPLE’S CONVENTION (DEMOCRATIC) / HPC(D) chu Pu Lalhmingthang Sanate, President nina hnuoiah a hung pieng suok ta a nih. HPC(D) chun General Headquarter le Executive Council hai neia fumfe taka pawlpui dan neia hma lain, Mizoram chau ni lovin, hieng Manipur, Assam a haia India danpuiin a mi phalpekna zula, “Ram, Khuo le Tui Humhala Vawnghim Tlat” chu a thupui laia lientak a hung ni ta pei a nih. HPC(D) sunga ngaidan inkal leiin President Group le Chairman Group a  inthein a hung um ta a. HPC(D) Chairman Pawl chu United People’s Front (UPF) a member niin, (L) Lalropui Famhoite, Commander-In-Chief khawm UPF Chairman lo cheltu le a chel lai zinga boral a nih. HPC(D) Chairman Group ((L) H.Zosangbera inrawina hnuoiah) chun Mizoram Sorkar leh Thuthlung (Agreement) ziekin, 13th April, 2018 chun Home Coming & Arms Laying Down Ceremony chu CTI Sesawng, Mizoram ah neiin, (L) H.Zosangbera, Chairman, HPC(D) le Arvind Ray, Chief Secretary, Govt of Mizoram chun thuthlung an lo ziek a nih.

HPC(D) DAN (CONSTITUTION) LE THUREL THENKHAT:
A chunga ei tarlang ta angin HPC(D) chu United People’s Front (UPF) sunga pawl pawimaw a ni zing leiin, Manipur tienga a hmadawm chu Mizoram Chapter leiin chawl thei chi a la ni chuong naw a, Assam tieng khawm 2013 khan Assam Sorkar leh Cease Fire neiin HPC(D) Assam Region tia hmalakna  a fe ta pei a, HPC(D) Gen.Headquarters le Executive Council le inzawm zing an nih. HPC(D) GHQ Executive Council inthung nuhnungtak 21st May, 2018, Resolution No:3   chun “…Hun lo taka Pu Lalropui Famhoite, C-in-C, HPC(D) in a mi lo boral san hi party chun inpamum kan ti hlea, a sin chel hlak Commander-In-Chief hi thunawk um hma po chu la ruot lo tha kan ti a. Organisation fephung pangai angin Party chu la fe pei a tih…” ti a nih.

Hieng anga HPC(D) hmalakna, Manipur, Mizoram, Assam haiah fepui mek a ni a. Mizoram Chapter zo thawkkhat anga a um mek lai le HPC(D) General Headquarters a Commander-in-Chief, Pu Lalropui Famhoite’n hun lo taka ami boral sanna chu remchanga lain, HPC(D) Executive Council inthungna nuhnung tak 21st May, 2018 thurel “…Organisation fephung pangai angin party chu la fe pei a tih…” ti ani lai zingin Mr L.T Hmar @Lalthanglien, Working Chairman le Mr L.Sanga Hmar @Lalthansang, Defence Secretary, HPC(D) hai pahni chauin, mani tanghmasiel taka HPC(D) Executive Council an lo SUSPENED thu April 3, 2019 khan Hmar mipui hrieta thu belchieng dawllo Mr L.T Hmar-in thusuok a hung siem el kha Executive Member dang po pohai hmusitna le pawlpui dan kala hmalatu a ni zie Hmar mipui le khawvel hrietin an puong ani kha. HPC(D) Inawpdan (Consititution) Article 5 (B) Clause (ii) dungzui chun, “…Executive Council Member hmun thuma thea hmun hni (2/3) in an remti tlang chauin Dan (Constitution) chu suk danglam/siemthat thei ning a tih…” ti a nih. Hi suspend chungchang hi council member mi sawm (10) chun an hrietpui der nawh.

HMAR INPUI GHQ A AFFILIATED BODY CHUNGCHANG:
Tarik 8th September, 2019 khan Mr Isak Hmar, Secretary, HPC(D) Manipur Region chun Social Media fethlengin Affiliated chungchangah Hmar Inpui kuoma lekha a thawn thu hmu ani a. Thudik tak le dan umsa chu hieng ang hi a nih. Hmar Inpui Inawpdan (Constitution) Chapter X, Articles 21, Clause (ii) chun “…Hmar Inpui hnuoia Affiliated Body dinghai chu General Assembly a sukfel ning a ta, Region haia Affiliated Body ding hai chu Regional Conference a sukfel ni ve thung a tih. Region haia Affiliated body hai chu Region-in Headquarter ah fie le feltakin an hriettir ngei ding a nih…” ti a ni a. Hi dan dungzui chun HPC(D) Manipur Region July 24, 2018 a indin chau hi Hmar Inpui, Manipur Region-in, Regional Conference fethlengin Hmar Inpui, General Headquarters ah Affiliated  a nina iengtik hun khan am an hriettir a? 2018-2019 sung hin Hmar Inpui, Manipur Region, Regional Conference a um hrim am? HPC(D) General headquarters chu 2000 AD kuma Hmar Inpui-a Affiliated Body a lo ni dai ta hi zani lai chaua Faction suok thar HPC(D) Manipur Region (L.Sanga Hmar Gang Group) inti hai hin theinghil ngai talo dinga an inchik tlat a va tha awm de.  Hmar Inpui Affiliated Body hrim hrim chu suspend ding a lo ni khawma Hmar Inpui hrietpuina thang lo chun mani hmatawk tawka hmalakna hi  invetthlak le ei varna’n tuipui ral a khel nawzie suklangna ani leiin zawngsak chi ni naw nih.


PAWL THAR INDIN CHUNGCHANG: 
Ei tarlang ta po po haia inthawk khan ngaituona fimtak le na nei ta ding chun hrilfie nawn ngai lova pawl thar le pawl hlui chu thehran thei ni ta ngei a tih. Hmar Inpui Inawpdan (Constitution) Chapter-X, Articles 21-Clause (iv) chun, “…Hmar Inpuiin a hrietpui (recognised) pawlhai ang bawka thiltum thuhmun nei, pawlthar indin chu Hmar Inpuiin pawm thei ta naw nih…” ti  a ni angin, July 24, 2018 a Dictatorship hmanga HPC(D) Manipur Region indin thara um hi pawm chi ding khawm an der nawh. HPC(D) General Headquarters chu Hmar Inpui Affiliated Body a nina le hmathlir seitak neia 1995 kuma lo indin a nina chu fe pei a ta, mi pakhat, pahni ditdana suk chawl le sukhring thei a ninaw zie mipui le Hmar Inpui khawma hriet a tha.

HMATIENG PEIA HPC(D) THILTUM:
1. Hmar People’s Convention  (Democratic) / HPC(D) General Headquarters thiltum chu India Danpui (Sixth Schedule) hnuoia Mizoram, Manipur, Assam haia Pi-le-Puhai huna (from time immemorial)  inthawka a ram del chin humhal le Tawng, Culture, sukhmasawn le chawisang a nina dinga hmalak.

2. HPC(D) hming chawia  pawl, mimal khawm nisien indiknaw taka hnam inpumkhatna suksie zawnga hmalatu le hnam sukhmingsietu chu pawlpui hmelma a ngai ning an tih.

3. Hmarhai chanvo suksie zawnga Political Issue indiknaw taka fepuitu le Hmar Political Issue dodal zawnga Hnam dang le inlaichinna siemtu hrim hrim chu HPC(D) hmelma ning an tih.


Pathien le Hmar hnam tadingin,

Sd/-
(MR. STANLEY HMAR)
Secretary, Info & Publicity
HPC(D) General Headquarters: Sinlung

Copy to:
1) The President/General Secretary HYA: GHQ.
2) The President/General Secretary HSA: GHQ.
3) The President/General Secretary HAA: GHQ.
4) The President/General Secretary HNU: GHQ.
5) The President/General Secretary HCLF: GHQ.
6) The President/General Secretary HLS: GHQ.
7) The President/General Secretary HWA: GHQ.
8) The Chairman/Secretary HACS: GHQ


Sd/-
(MR. STANLEY HMAR)
Secretary, Info & Publicity
HPC(D) General Headquarters: Sinlung





Don't Miss
© all rights reserved
made with by Simon L Infimate