Haflong, September 13, 2019, Virthli (ONP): Zani zingtieng dar 10:00 AM khan Hmar Inpui NC Hills & K.A. Region le Dimasa J.N.H Apex Body hai inbiekna Disgao Lodge-ah an nei. Hi inbiekna a an hriltlâng tak chu Revenue Department in Ni 04.09.2019 a Muolhoi khuo khawhnawm tienga Railway lam hnuoia Ram Patta nei hai Ram Patta renew thei ta lo dinga thu an suo le inzawma inbiek tlângna hi nei a nih. Revenue Department in lekha an suona a chun hi Patta holder hai hin a ram hnai vêla khuo a bikin Dimasa khuo Longren a'nthawk NOC lekha an lak naw lei tiin thusuok hin suonlam a siem a nih. Hi ram hi hunsawttak a'nthawka lo del tah, huon puitling tak tak hai khawm lo siem a ni tah a, hienga lekha a hung suok el hi, a ram neituhai chau nilo in mipui khawm an chi-ai hlê a nih. Hi chungthua hin Hmar Inpui NCH & KA Region in hma la nghâlin Dimasa Apex Body (JNH) leh inbiekna hi nei nghal niin hi inbiekna a hin Council thuneituhai inhmupuina neia sukfel vat dinga hriltlâng a nih. Thil iengkim inhrepaw taka hma lâk tlang a á¹ul thu hrillin inbiekna suktawp a nih.
