Responsive Ad Slot

SHC huomsunga khuo 4 Saitual district-ah um nuomlo

Friday, August 16, 2019

/ Posted by Simon L Infimate
Aizawl, 16 Augutst, 2019, Virthli (ONP): Sinlung Hills Council (SHC) huomsunga khuo 4- North Khawlek, Vanbawng, Lamherh le Suangpuilawn hai chun vawisun khan thusuok siemin Saitual district a um an nuomnaw thu an puong.

Khuo pali Joint Village Council, All NGOs le political parties thusuokin a tarlang danin sawrkarin gazette an suo hma a'nthawka Joint Village Council, Joint Students' Union, Tuivai Group YMA le SHC ha'n Saitual district sungah rinlût lo dinga an ngenna le biel mipuihai ditdân le ngaidânhai ngai pawimaw loa Saitual district-ah rinlût anni chu an ditnaw thu le an lungawinaw takzet thu an hrila, hi ruohmangna hi an rang thei anga hlip/sukdanglam dingin sawrkar thuneituhai an ngen.

Khuo 4 hai chun Aizawl district huomsunga la um zing an nuom thu hrilin, an ditdân sukpuitling pek ngei dingin sawrkar an ngen bawk a nih.

Sawrkarin an thilphût hi August ni 23, 2019 hma ngeia a sukhlawtling naw chun Joint Village Council huom sunga mipuiin a ṭul dan angin hma an lak sunzawm ding thu, an thusuok a chun an tarlang.

August ni 9, 2019 a Chief Minister Zoramthanga keihruoina hnuoia nei Council of Ministers inṭhung chun district thar pathum- Saitual, Khawzawl le Hnahthial hai huom chin ding khuohai a lo pawm fel tah bakah official gazette a khawm insuo a ni tah a, Aizawl district a lo um hlak SHC huomsunga khuo 9 hieng Phuaibunga, Khawlian, NE Tlangnuam, Daido, Zawngin, Suangpuilawn, Lamherh, Vanbawng le North Khawlek hai chu Saitual district a kawp dingin rinlût an nih. 
Don't Miss
© all rights reserved
made with by Simon L Infimate