Responsive Ad Slot

Nk. Rejoyce Hmunhring doctor panpui nawk; hma a sawn pei

Sunday, August 25, 2019

/ Posted by Simon L Infimate
Silchar/Hringchar, August 25, 2019, Virthli (ONP): Nk. Rejoyce Sumneitling Hmunhring d/o Pu Lalchawlthang Hmunhring, Mauchar, NC Hills Jinam Valley, Assam chu zanikhan Silchar ah doctor panpui nawk a nih.

Nk. Rejoyce hi taksa hrisel nawna leia thluok tieng buoina nei leia invet ang el le rannung hai ang el a khawsa tah, an insung lum a khawm an umpui thei ta lo, ripte bawl peka khawsa el ani a, Virthli (ONP) fethlengin Dr. Lalṭhakim Hmar le Tv. Zatea HN Zate hai hmalaknaa ṭhangpuina kutdaw ani hnungin doctor panpui theia hung um a nih.


Zanikhan Doctor panpui ding hin Nk. Rejoyce chu mi tlawmngai mi 5 ha'n Silchar tlungpuiin Dr. Lalṭhakim Hmar in iengkim a lo thawpui nawk a nih. Doctor chun a hrana ripte a sie zing a ni chun, ran lungril a la nei zing ding thu le insunga lalut ta dingin a lo hril. Nk. Rejoyce a sanghai hi an la naupang deu leiin hmunkhata hang khawsa tlang ding chun veng a la um deu leiin a unu Vuli (a nauhai an changkang met tah leiin) in ah thlakhat vel hang sie sin phawt dinga ti a nih.

Zanikhan lekha hai sukfel zo hnungin, Missionaries of Charity Home, Tarapur, Silchar ah sie dan ding ngaituo nghal ani a, thuneitu hai chun thlahni chu an sie thei ding thu an lo hril. Hi Charity Home a hin a thlawn tawpin a um thei dinga hril niin a umpuitu ding nuhmei pakhat a ngai ding thu an lo hril bawk a nih. A umpuitu ding sukfel hma po chu a unu Vuli kuoma lo um hri phawt a ta, mihriem pangngai khawvela keilût tan tum met met ta ding, thil inthaw tir le tir met met tan ta dinga hrilhriet an nih.



Silchar hmuna lo buoipuitu Dr. Lalṭhakim Hmar chun a hma nekin hma a sawn hle ta thu a hril a, a hma khan chu a ke chain a thlunga hung pui ani a, tuta vel chu thlung ani ta naw thu a hril bawk.

Zanita Nk. Rejoyce doctor panpuinaa sengso po chu Rs. 9,970/- niin doctor pan hmasak khan Rs. 7,480/- seng a lo ni ta bawk. Mi inpe le tlawmngai haia inthawka sum thawkhawm a ni leiin, a hmangna ding taka hmang le langthlang taka hmangna hai popo inchik le suklang pei tum a nih.

[Hriet ding pawimaw: Mihriemna thil ah enkawla um mek le a sung hai/a'nhnaipui hai khawm an lungril ding ngaituoin lungsiet an um hle a, mihriem inzaumna hrie a in thlalak le chanchin suklanga um hai hi hmangaina leia in ṭhangpui intuona thil lei a nih ti hrie a, insukmuolphona tienga mi lo ngai pek lo hram dingin tiemtu hai ni leh ei in ngen a nih. - Virthli (ONP)]
Don't Miss
© all rights reserved
made with by Simon L Infimate