Responsive Ad Slot

INDIA PUMPUI HUOPA SAKHUO DANGA INLET KHAPNA DAN LE BJP SAWRKAR

Monday, August 12, 2019

/ Posted by Simon L Infimate
1. Thuhma

NDA sawkar 2.0 chun Parliament meeting nawk hun ah sakhuo danga inlet khapna dan, Freedom of Religion Bill an i ti, Anti-Conversion Bill ei i ti chu an putlut tum thu an puonglang ta a. Hi dan thar ding hi ziekfel a ni vawng tah ti thu chen a vuong dar nasa hle. Chun Anti-Conversion Bill India pumpui huopa an hung zam ta chun, ei ramthar board sukbo hung tul tang a ta, ei missionary popo ei kokir hung ngai tang a ta, Isu Krista thucha ropui ei 'pending' a tul el awm de, tia lungngai pawl ei um bawk.



Awleh, Anti-Conversion Bill le inzawma vawisuna India ngirhmun ei hril hma-in Census 2011 zuk lut zawk ei tih.

2. Census 2011

Census 2011 sirsana India rama sakhuo lien pathum hai chu a hnuoia ei hung tarlang hai hi an nih:

A. Hindu 96 crores le ti met an um a.

B. Muslim 17 crores le ti met an nih.

C. Christian 2 crores le ti met ei nih. Christians 2,78,19,588 ei nih.

3  India state a Christian population zuk tarlang sang ei tih

Nagaland ah mi zaah 87% Christian an nih. Mizoram hi 87% Christian umna a nih. Meghalaya hi 74% Christian. Manipur hi 41% Christian. Arunachal Pradesh hi 30% Christian. Kerala 18% Christian. Tamil Nadu 6% Christian. Tripura 4% Christian. Jharkhand 4% Christian. Orissa 2% Christian. Chattisgarh 1% Christian. Delhi 0.8% Christian. West Bengal 0.7% Christian. Gujarat 0.5% Christian. Madhya Pradesh 0.2% Christian. Himachal Pradesh 0.1% Christian. Rajasthan 0.1% Christian. Uttar Pradesh 0.1% Christian umna a nih.

South India

South India (Kerala, Tamil Nadu, Karnataka, Andhra Pradesh le Telangana) ah Christian 1.28 crore bawr an um a. Chu chu India Christian zaah sawmli le paruk ang a nih.

Northeast 

North East state hieng Assam, Nagaland, Mizoram, Meghalaya, Manipur, Arunachal Pradesh le Tripura state a hin India a Christian zaah sawmhni le pariet ei um.

Northeast a chu Arunachal Pradesh ti lo state dangah Anti-Conversion law zam a la ni nawh. Arunachal a sakhuo danga inlet khapna dan hi an la bawzui chuong nawh.

A bak po chu state dang dang hieng Uttar Pradesh, Haryana, Delhi, Goa, Maharastra, West Bengal le state dang hai ah an um.

4. Sakhuo danga inlet khapna dan hi India independence hma khawm khan British lal ramin a i enkai phak ve chin states thenkhat ah an lo zam ve a. Chuong state hai chu a hnuoia hin ei hung tarlang

A. Raigarh State Conversion Act 1936

B. Patna Freedom of Religion Act 1942

C. Sarguja Religion Act 1945

D. Udaipur State Anti-Conversion Act 1946

5. Kum 1950 Constitution a Article 25 kha Freedom of conscience (Mani sie le tha hrietna hmanga ieng sakhuo khawm zawm theina), right to profess, practise and propagate religion, ti zepsa-na hmun a nih. Sakhuo danga inlet hi conversion an ti a. Kir nawk kha reconversion an tih. Chu khapna dan chu Anti-Conversion law annawle Freedom of Religion Act an tih.

42nd Amendment, 1976 in ei Constitution ah thumal pawimaw deu, "Secular" a belsa a. Chu chu sakhuo bik neilo India tina a nih. Ei ham a tha em em.

Pu Nehru hun lai khan Parliament ah Indian Conversion (Regulation and Registration) Bill 1954 putlut a ni a. Christian missionaries hai license nei dan le sakhuo danga inlet hai registration thaw dan ding ngaituo a lo nih. Amiruokchu, kha bill kha Lok Sabha ah an hnawl leiin dan puitling a tling zo nawh.

Chun kum 1960 khan Backward Communities (Religious Protection) Bill putlut a ni nawk a. Hindu hai Christian le sakhuo danga an inlet dodalna dan a nih. Amiruokchu, Lok Sabha ah an hnawl leiin dan puitling a tling ve nawh.

Chu zova Freedom of Religion Bill 1979 putlut a ni a. Force, fraud le inducement hmanga sakhuo danga inlettir chun an lettirtu hrem ni raw seh, tiin an khekpui a. Bible le Pathien lekhabu sem khawm khap an lo tum a nih. Amiruokchu, selkaltu pawlin an do nasa em leiin hi bill khawm hi Parliament in a lo reject.

6. Sakhuo danga inlet khapna dan hmang zingna state hai chu a hnuoia hin ei hung tarlang:

A. Orissa Freedom of Religion Act 1967

Kum 1967 khan Orissa in Anti-Conversion Act a lo pass a. Chu dungzui chun force, fraud le inducement hmanga sakhuo danga inlet khap a lo nih. An luttirtu chu hrem thei a nih. Reconversion khawm hrem thei dan a um. Sakhuo danga inlet hai laluttu Pastor in thuneitu DC an hriettir a tul. Dan a bawsiet chun kum khat jail intang theina a ni a. Annawle Rs 5,000 fine theina a ni bawk.

Kum 1999 khan Australian missionary Graham Staines le a nau pasal pahni hai chu Manoharpur khuo, Keonjhar district, Orissa ah Bajrang Dal supporter haiin a hringin an raw hlum. Rev Graham Staines hi leprosy natna nei hai sukdamtu a nih. CBI in hi case hi an sui a. A thawtu hai man an nih. An ringleader Dara Singh chu damsung jail intang dingin Supreme Court in a lo rel tah. Orissa MP pakhat Pratap Sarangi khawm a lo inhnamhnuoi ve tia sopuitu an um bawk.

B. Madhya Pradesh Freedom of Religion Act 1968 

Kum 1968 khan Madhya Pradesh chun Anti-Conversion Act a lo pass ve a. Chu dungzui chun force, fraud le inducement hmanga sakhuo danga inlet khap a lo nih. An luttirtu chu hrem thei a nih. Reconversion khawm hrem thei dan siem a nih. Sakhuo danga inlet ding chun Pastor in thuneitu hai an hriettir a tul. Christian i ni naw chun meidiel i fe ding titu khawm man thei an nih. Dan bawsiettu kum khat jail intang a tih. Rs 5,000 fine theina a ni bawk.

C. Gujarat Freedom of ReligionvAct 2003

Kum 2003 khan Gujarat in Anti-Conversion Act a lo pass a. Chu dungzui chun force, fraud le inducement hmanga sakhuo danga inlet khap a lo nih. Reconversion khawm hrem thei a nih. Sakhuo danga inlettu chun an let hmain thuneitu hai an hriettir hmasa a tul. Dan a bawsiet chun kum thum jail intang theina a nih. Rs 50,000 fine theina a ni bawk.

D. Chattisgarh Freedom of Religion Act 2006

Kum 2006 khan Chattisgarh in Anti-Conversion Act a lo pass a. Chu dungzui chun force, fraud le inducement hmanga sakhuo danga inlet khap a lo nih. Reconversion khawm hrem thei a nih. Sakhuo danga inlettirtu chun thuneitu hai an hriettir a tul. Dan a bawsiet chun kum khat jail intang theina a nih. Rs 5,000 fine theina a ni bawk.

E. Himachal Pradesh Freedom of Religion Act 2007

Kum 2007 khan Himachal Sawrkar chun Anti-Conversion Act a lo pass a. Chu dungzui chun force, fraud le inducement hmanga sakhuo danga inlet khap a lo nih. Reconversion khawm hrem thei a nih. Sakhuo danga inlettu chun an let hmain thuneitu hai an hriettir hmasa a tul. Dan a bawsiet chun kum hni jail intang theina a nih. Rs 25,000 fine theina a ni bawk.

Amiruokchu, kum 1978 a inthawk khan Arunachal Pradesh ah sakhuo danga inlet khapna dan an lo nei tah. Anachu an hmang nawh. Pastor in thuneitu hai an hriettir a tul a. Dan bawsietu chu kum hni jail annawle Rs 10,000 fine.

Chun Rajasthan ah sakhuo danga inlet khapna dan kum 2008 khan an lo siem tum a. Amiruokchu, President in a pawm nawh.

Tamil Nadu ah sakhuo danga inlet khapna dan kum 2002 khan an lo siem ve a. Anachu an thaibo tah.

Zuk hril zawm pei ei ti ie:

(1). Orissa in Anti-Conversion Act a lo zam hmasatak a. Kum 1967 BJP lungril put hai inlal laia an lo zam an tah. Congress a hung inlal khan anti-conversion law kha an thaibo chuong nawh. Tuta inlal mek BJD hai khawm hin thaibo tulin an ngai nawh.

(2). Kum 1968 khan Madhya Pradesh in Anti-Conversion Act a lo zam ve a. BJP inlal laia an lo zam a nih. Congress a hung inlal khan anti-conversion law kha an thaibo chuong nawh. Tuta inlal mek Congress party hai khawm hin thaibo tulin an ngai nawh.

(3). Kum 1978 khan Arunachal Pradesh in Anti-Conversion Act a lo pass ve a. Anachu a bawzuitu Rules an remkhawm nawh. Chuleiin kha dan kha an hmang thei nawh.

(4). Tamil Nadu a khawm 2002 khan Anti-Conversion Act an lo pass a. Amiruokchu, an thaibo tah.

(5). Gujarat a khawm 2003 khan Anti Conversion Act an lo pasi.

(6). Chattisgarh in kum 2006 khan sakhuo danga lut khapna dan a lo pass ve. Anachu President in a sign nawh.

(7). Himachal Pradesh a khawm kum 2007 khan Anti-Conversion Act an lo pass tah. Congress sawrkar i pass a nih.

(8). Rajasthan in kum 2008 khan sakhuo danga lut khapna dan a lo pass ve. Anachu President in a sign nawh.

(9). Kum 2008 khan Uttarakhand khawma a lo pass ve.

(10). Jharkhand in kum 2017 a inthawk khan Anti Conversion Act a lo nei ve tah. Kum 2018 khan Christian pali chu Podkher khuo ah indiklotakin Police in an man.

7. Sakhuo danga inlet khapna zam ve lo Uttar Pradesh a chu "Ghar Wapsi" sirsana sakhuona hmangsuol an suok zeu zeu.

Kum 2015 khan VHP hai Religious Awakening Front in "Ghar Wapsi", Homecoming ti thupuia hmangin Uttar Pradesh ah a sopui a. Hindu Christian a inletna sangli le Muslim a inletna sangkhat hai chu Hinduism huomsunga a huoilut nawk.

Kum 2018 khan Rev Dipendra Prakash Maleywar chu indiklotaka intumin Muzaffarnagar khuo ah Police in an man. Rev Maleyar hi forcible conversion suonlamin Anti-Conversion Law zam nawna Uttar Pradesh ah man a nih. Sec 151 CrPC an besan hlak. Christian sakhuo a lut thar sawmpakhat haiin an nuom thua an lut thu le force le inducement hmangna a um nawh ti Police hai an la hril.

8. RSS, Bajrang Dal le VHP

Hindu kulmut le BJP political party hai vote innghatna RSS, Bajrang Dal le Vishwa Hindu Parisad, VHP hai hin an i suktling BJP party chu sakhuo danga inlet khapna dan India pumpui huop thei ding bill Parliament ah in putlut tir an tum zing a. BJP chun Hindu kulmut le an ruoltha NDA coalition partner hai leia hi chen chen tlung an nih ti an hriet bawk. RSS, Bajrang Dal le VHP hai chau sirsana sawrkar siem thei an nawh, ti kum 1996 a inthawk khan BJP khawma a hung man fuk ta leiin, sakhuo danga lut khap ding le ding naw thua hin BJP thuoitu hai lu a suk hai hle. A san chu BJP in an Manifesto ah sakhuo danga inlet khapna chuongthu hi an inchuonsa nawh.

9. Supreme Court

Supreme Court rorelna chu dan ang thapa ngaitu BJP thuoitu an tam lem tah. National Anti-Conversion Bill Parliament ah pass a ni chun a sawiseltu haiin Supreme Court ah khing an tih, ti chu BJP thuoitu hai tawngbau a nih. Chuonga khing a lo ni pal chun Orissa le Madhya Pradesh hai Anti-Conversion dan le inzawma Rev Stanislaus Case (1977) a Supreme Court rorelna kha sukdikna hun hawng ning a tih. Chu chu BJP lu sukhaitu a nih. Chun Anti-Conversion law hi, "Matter under the domain of state under State List in Schedule VII of Indian Constitution", tiin Parliament i pass tah India pumpui huop thei National Anti-Conversion Act chu a thaibo thei bawk.

10. Thukharna

Vawisun hin India state paruk ah Anti-Conversion Law zam zing a nih. Chuong hai chu Orissa, Madhya Pradesh, Gujarat, Himachal Pradesh, Jharkhand le Uttarakand state hai an nih.

Ram Mandir le Anti Conversion Bill hai hi BJP ta dingin, "A hen that lays golden eggs", ni zing a tih. Centre-Right party BJP hin a khatin a ngirsuok thei hma po chu an vote zawngna khawl pawimawtak ni zing an tih. Chuleiin a sister organisations RSS, Bajrang Dal le VHP suklawm tumin conversion by force or fraud or inducement khap tumin hma la ngei a tih.

Amiruokchu, ieng le khawle Ram Mandir chu bawl ning a tih ti an sopui nasa taluo leia kum 1996 a ni sawm pathum chau sawrkar an chel kha an la theinghil hmel nawh. Kha tum khan political ruol le pai pawimawzie an hung hriet tan a. Kum 1998 a inthawka kum 2014 chena an "Coalition politics" leiin BJP chun kum nga sawrkar puitling an siem thei ta a nih. Kha coalition dharma kha sirsanin tukum chu an khatin an ngirsuok thei ve tah.

Ram Mandir chungthua khawm Supreme Court rorel an nghak nuom ta a. Chu leiin Lok Sabha le Rajya Sabha a party popo consensus la lovin an khatin Anti-Conversion Bill an pass ngam ring a um nawh.

India rama MP hai term kum nga chau a la ni zing.

Ziektu-

Dada le Jojo-pa,
Hmarkhawlien, Cachar, Assam

11.8.2019
Don't Miss
© all rights reserved
made with by Simon L Infimate