Responsive Ad Slot

APSC Mains Exam 2019 a English Compulsory Paper in-prepare dan

Friday, August 23, 2019

/ Posted by Simon L Infimate
A. Thuhma

August 25, 2019 khin APSC chun ACS/APS Mains Exam a General English Paper a huoihawt ding a ni a. Chu le inzawm chun General English Paper pe ding Hmar candidate hai ta dingin time management tips tlawma-zawng hung tarlang ka ti ie.

APSC Combined Competitive Exam 2019 a General English Paper hin marks zathum a phur a. Chu chu subject intak ei i ti tak General Studies marks zat tawp a nih. Darkar thum a zo a tul ve.

Chuleiin English Subject a hin marks insang hmu a pawimaw bek bek. Hun khawm General Studies a ei i pek zat pek ve tum hlak ei tiu. General English hi HSLC level mei mei a nih. An tak bek bek nawh. Anachu, mark hmu insang ei tlawm. A san chu hun vawngdik harsa ei ti hlak a. General English 300 marks ah 180-220 marks hmu thei chun ST candidate ta dingin iemanichen subject danga ei thawthatnawna a suk zangkhai thei a. Subject danga ei zieksuol hai ei hrukbit thei bawk. Chuleiin, a awl ti el lovin, tha deuva inbuotsaia English ah marks hmu insang tum ei tiu. Written English le Talking English hi hnuoi le van ang an nih ti kha hriet zing a tul.

Awleh, ACS/APS Mains Exam a English Compulsory subject hi hei biechieng tum ei tiu:

B. APSC CC Mains English Compulsory question pattern

General English a questions popo hi buk sariin ei the thei a. Chuong buk sari hai chu a hnuoia hin ei hung tarlang:

1. Precis writing

Precis hin mark sawmli a phur a. Chu chu English subject a mark 13% a nih. 40/300. Chu umzie chu English subject ziek hun sung darkar thuma 25 minutes chau precis ziekna dingin hun ei nei. Chu chu time management a nih. Precis hi hrietchieng tumin 15 minutes hun ei hmang a. Chu sung chun title ding, key words, a seidan ding 1/3rd randomly a check a tul. Highlighters dam hmanga a lu a inthawka a mawng tiem suok hnungin irrelevant po po dehawna, a pawimaw hai an umna ding taka remkhawm zo pha hadam deuva 10 minutes hun sunga precis hi zieklut a tul. Hun lo hmang rawn met khawma topic dang le in adjust a tul. Title pek ding kha theinghil lo a tha.

2. Essays

Essays hin mark zakhat a phur a. Chu chu English mark 33% a nih. 100/300. Chu umzie chu English subject ziek hun sung darkar thuma 60 minutes chau essays ziekna dingin hun ei nei. Essays hi pahni an indawn hlak a. Pakhat ah 50 marks a nih. Pakhat zieklut hun sung ding chu 30 minutes. Social issues, culture, environment, polity, etc an inthangsa tir ngun el. Floating thoughts popo remkhawmnan essay pakhat ah 20 minutes bawr hmang chun 10 minutes la um povin ei tetdawk le remkhawm hai ei zieklut thei. Essays paruk a pahni thlang a ni a. Ei chem fena zawng ei choose thei.

3. Passage 

Passage hin mark sawmnga a phur a. Chu chu English mark 16% a nih. 50/300. Chu umzie chu English subject ziek hun sung darkar thuma 30 minutes chau passage ziekna dingin hun ei nei. Questions pakuo a um hlak. 15 minutes vel hmangin passage kha hrietchieng ei tum a. Questions hai tiem malamin passage ei tiem nawk a. Chu zova question tina dawnna ding umna keywords hai passage ah ei mark a. A dung a khangin ei tetkuol zo pha 15 minutes hmangin questions pakuo hai a zaiin ei dawn thei. Time limit kha hriet zing ding. Sana en deu zing a tul. Mani own words a ziekdawk kha a tha tak. Question tawpna tak summary ziek rawh ti kha ei hei dawn hmasa phawt a. A dang chu a zaia dawn thei a hung ni hlak.

4. Amplify 

Amplification hin mark sawmhni a phur a. Chu chu English mark 6% a nih. 20/300. Chu umzie chu English subject ziek hun sung darkar thuma 10 minutes chau amplify ziekna dingin hun ei nei. Hi hi substance writing a ni a. Rome was not built in a day, All that glitters is not gold ti hai ang a hung suok hlak. Brain exercise theina hun a nih. Time limit hriet zing a tul. Pathum a pakhat thlang thei a nih.

5. Paragraph writing

Paragraph writing hin mark sawm a phur a. Chu chu English mark 3% a nih. 10/300. Chu umzie chu English subject ziek hun sung darkar thuma 5 minutes chau paragraph ziekna dingin hun ei nei. Minutes nga a sentences zieksuok popo kha paragraph a siem a tul. Flow of thought kha indik bawk sien. Topic pathum an mi pek a. Pakhat chau zuk paragraph ding tina a nih. Communal harmony, cultural heritage, sports in India, etc ti vel mei mei an nih.

6. Grammar 

Grammar hin mark sawmnga a phur a. Chu chu English mark 16% a nih. 50/300. Chu umzie chu English subject ziek hun sung darkar thuma 30 minutes chau grammar ziekna dingin hun ei nei.

Grammar a hin questions sawmhni pasari a hung hlak a. Matric Grammar book le ACS/APS question hlui kum sawma mi ei practise kuol a, confidence ei nei thei. Grammar kalhmang conceptual clarity nei haiin harsa an ti nawh.

Grammar a 27 questions hai hi buk sari a the ve thei an nih. Chuong hai chu a hnuoia hin ei hung tarlang:

i. Frame sentences. 6 marks. Questions pathum. Entirnan: Eligible, Illegible; Affect, Effect, etc.

ii. Frame sentences. 10 marks. Questions panga. Entirnan: Once in a blue moon, Above as noun, etc.

iii. Antonymn/Synonymn. 4 marks. Questions pahni. Entirnan: Abstain, etc.

iv. Rewrite the sentences. 10 marks. Questions panga. Entirnan: Voice change, Narration, Simple to Complex sentences, etc.

v. Change the voice. 5 marks. Questions panga.

vi. Change the narration. 5 marks. Questions pahni.

vii. Correct the sentences. 10 marks. Questions panga. Entirnan: Preposition, Question tag, etc.

Grammar hi ka bei hmasatak hlak. 50 marks ah 40-42 hmu ka lo tum hlak. Change from Complex to Simple dawnsuol le Preposition inchuon suol kha kan lau thei a. Ka suksuol zie. Chuleiin hieng grammar topic pahni hai hi en ngun met a tha.

7. Report writing 

Report writing hin mark sawmthum a phur a. Chu chu English mark 10% a nih. 30/300. Chu umzie chu English subject ziek hun sung darkar thuma 20 minutes chau report writing ziekna dingin hun ei nei. Topic hieng human trafficking, flood situation, road condition, communal clash, etc an hung hril phawt a. Chu zova ngirhmun enfie dingin a hmuna tir i lo ni ta a. I va hmu le i thil thaw hai report DC hei thawn tam. Annawle, Chanchinbu mi hai hei hril tam ti damin report writing hi a hung hlak. 250 words in zieksuok ding an ti hlak a chu, ei handwriting speed an ang naw a. Chuleiin 20 minutes sunga ngaituo dawk le ziekdawk hman po kha report writing word limit anga ngai thei ning a tih.

C. Thukharna

Pawlsawm chen kha Grammar lo thaw ei ni tawl a. ACS/APS English Compulsory Paper hi chuonga intak ti ei um ka ring nawh. Amiruokchu, an tak nawh tisia, marks hmu tlawm ni tum naw manih. Ei chem fena zawng a ni chun hi subject hi hmangin building sawngthum Interview ah invirkai tum ei tiu. Vai a tamlem hai i lel subject hi ei dawsawnin hmang tum ei tiu. GS a hun ei pek zat char hun ei pek ve chun English Compulsory ah 220/300 hmu thei ning a tih. GS inchukna in hun ei i pek le ei marks hmu an hme ngai si nawh. English Paper hlui revise ngun ei tiu. HSLC Exam a suok Grammar chawk hlak ei tiu. Nitina suok chanchinbu tiem ve zieng ei tiu.

August 25, 2019 a ACS/APS English Compulsory Paper pe ding hai popo inrengin ditsakna insangtak kan hlan cheu.

~James A. Songate, APS
DySP (Law and Order), Sivasagar, Assam

23.8.2019
Don't Miss
© all rights reserved
made with by Simon L Infimate