Responsive Ad Slot

1st Knock-Out Football Tournament (in aid of Hmar MIL) 2019 zofel

Thursday, August 29, 2019

/ Posted by Simon L Infimate
Harangajao, August 29, 2019, Virthli (ONP): Hmar Students’ Association (HSA) Harangajao Block in Hmar MIL le inzawma hmang ding sum lamsuokna dinga a huoihawt “1st Knock-Out Football Tournament (in aid of MIL Fund) 2019 chu Dt. 28.08.2019 (Nilaini) khan Huonveng Harangajao field-ah hlawtling taka zofel a nih. Tarik 12.08.2019 a inkhel tan ani a, hi tournament a hin team 28 an thang bawk a nih.


Closing Ceremony a hin Pu Ngamrothang Hmar, Executive Member, NCHAC chu khuollien ani a, Pu John Mark Pena, President HSA Assam Hills JHQ chu khuol inzaum a nih. Pu Lalrothan Vankal, Chairman HSATOB in hunser hi a keihruoi a, Pu Lalnghatsang Lungtau, President, HSA Harangajao Block in lawmlutna thu a hril. Hi hun hi Pu Lalhmarthang Tuolor, Chairman, MIL Monitoring Committee NCH&KA, Pu Josef V Tuolor, Gen. Secretary, HSA GHQ, Tv. James Selate, Gen. Secretary, HSA Assam Hills JHQ le mi pawimaw dang dang haiin an uop a nih. 



Pu John Mark Pena, President HSA Assam Hills chun a thuhrilna-ah HSA Harangajao Block in hieng anga Harangajao ruom sunga Hmar MIL ta ding sum lamsuokna dinga tournament an huoihawt hi lawmum a ti thu le thahnemngai an ngaina thuah HSA Harangajao Block le Unit tin hai hmalakna chu ropui a ti hle thu a hril. Hnam ta dinga inchuklaihai pawimaw zie le hma lak nasat a tul zie hai hrilin final inkeltu ding hai ditsakna inhlanin a hun a hmang.


Pu Ngamrothang Hmar, EM, NCHAC chun a thuhrilnaah, HSA Harangajao Block hmalakna thil dang dang hai lawmum a ti hle thu a hril a, iengtiklai khawma biel mipui ta dinga an pek ruok thak ngam zing thu a hril. Football Tournament hoihawt a aum khawm hi lungril takin a lawm a MIL ta dinga ama khawmin theitawp a lo suo vena thu hai le Council (sawrkar) anthawka Teacher Post ding nasa taka alo buoipui ve thu hai a hril. Haflong Govt. College a Hmar MIL Teacher contractual Teacher pahni council in a pek dinga hin ama hi nasa taka hma latu ani ve a nih. A pakhatna le pahnina hai dawng ding cash Prize a tum sa veve a, a ropui bek bek chu Harangajao ruom sunga MIL Teacher Pahni (2) hai kum hni (2) hlaw pe dingin an tiem a nih.


Fielbik iemani zat HSA Harangajao Block hin a neia, hieng hai hi MIL ta dinga thahnem lo ngai mi hai le mi pawimaw an ni a, anni hai chawimawina neiin mipui lai MIL Fund dawl a ni a, hlasakthiem Tv. B. Lalsanglien Inbuon in mipui fekhawmhai hla mawitak takin an awi bawk a nih.  Programme zo hin HSA thuoitu hai chun fiel a um mi pawimaw hotuhai bu fakpuina neiin hun himumtak an hmang bawk a nih.


Tournament Result –
Winner – PPFC (Pasaltha Petthiem Football Club)

Runner Up – Ngaibantlang Presbytery High School

Best Keeper – Tv Mathew (PPFC)

Man of the Tournament – Lalthanzam (PPFC)

Young Emerging Player – Lalsiemthar Inbuon (Huonveng Jr.)

Top Scorers -    Edward (PPFC)

Best Discipline Team – AC Hmunthazau

Pakhatna hin lawmman Trophy, Certificate le sumfai Rs. 14,000/- an dawng a pahnina hin Trophy, Certificate le sumfai Rs. 7,500/- an dawng a nih.









Don't Miss
© all rights reserved
made with by Simon L Infimate