(A constructive Criticism on HAA Performance Award)
Hmar Artiste Association ṭhuoitu hai le Committee members hai inzana chibai ka buk cheu. HAA ka hrietphut tira inthawk le tuchena ka hmudan chun ei changkang ta hlein ka hrieta, a khawvel inlumlet dan le technology ah hma ei sawnna le inmila hma in hung lak pei na hi a ropui ka tiin in thaw ṭha ka tih. Hieng anga hmasawn pei ding le ei hnam RIMAWI suk changkangna lampuia hin mawphurna pawimawtak in nei ve ani leiin ṭhang hung la thar pei dingin ditsakna insangtak kan hlan cheu.
Hi article annawleh thuziek ka hung siem hi HAA hai hmalakna kalna annawleh a ṭhanaw tina niloin, a thupuia ziek ang khin SAWISELNA nisi in a ṭhatlem ditna leia sawiselna ani lem anih. HAA Performance Award ei lo hmang zo char le inzawma ka mimal le mipui hai hmudan thlirin ka ngaidan tlawmte ka hung thairang ve ding ania, ka thuzieka lungawilo ei um chun CHANGE (INTHLAKTHLENGNA) ditlo le mani hmasiel ah ngai ka ti cheu.Chun, ka ngaidan hi andik ka ti vawng kher nawa, a ṭhatak ka ti chuong kher nawh. Amiruokchu, hi neka ṭhalem le mawilem, insanglem le fel lem, changkang lem le ngaihlut um lem theina ding ngaituo tlang inla ei nuom lei anih.
Awleh! HAA Performance Award category ei siem hai kha ei hei en chun fimkhurnaw na lei amani annawleh ngaithana lei amani spelling mistake le thumal chienglo a tam em emin ka hmua pawi ka ti hle anih. Hnam tamtak karah cheng ei ni lei hin hieng thil chite te hai hi ei ngaipawimaw ding pakhat chu ani ve naw dim anih? Hieng a hnuoia ang hin category ei siem hai a ziekdan mawi ka ti lem dan a um hai hung suklang ka tih -
1) Best Artiste Gospel: Choir - Best Gospel Artiste (Choir)
2) Best Artiste G (Single): Female – Best Gospel Single Artiste (Female)
3) Best Artiste G (Single): Male – Best Gospel Single Artiste (Male)
4) Best Artiste SL: Female – Best Secular Single Artiste (Female)
5) Best Artiste SL: Male – Best Secular Single Artiste (Male)
6) Best VDO SL – Best Secular Music Video
7) Best VDO G – Best Gospel Music Video
8) Most Promising G:Male – Most Promising Gospel Artiste (Male)
9) Most promosing Gospel:Female – Most Promising Gospel Artiste (Female)
10) Most Promising Artiste SL:Male – Most Promising Secular Artiste (Male)
11) Most Promising Artiste SL:Female – Most Promising Secular Artiste (Female)
12) BS sl: - Best Secular Songwriter
13) Best Songwritter:Gospel – Best Gospel Songwriter
14) Best Music:Modern – Best Music Arrangement (Modern) –
15) Best Music:Traditional – Best Music Arrangement (Traditional)
16) Most viewed:Gospel – Most Viewed Gospel Music Video (YouTube)
17) Most Viewed:Saihla/Lenglawng – Most viewed Secular Music Video (YouTube)
18) Best Actor:Female – Best Music Video Appearance(Female) or Best Actress
19) Best Actor:Male – Best Music Video Appearance(Male) or Best Actor
20) Best Artist – Hi hi chu a tha ie anachu a category hi a vast khawp el.
21) Best Dancer – Best Choreography
22) Best Videography – hi hi chu a tha ie anachu a VIDEO HMING suklang nisien
23) Most Entertainer – Hi hi ka hriethiem lo anih. Most entertainer ei ti hin, entertainment program a nei rawn tak ei ti na ning a ti? Annawleh Best Entertainer ti ding kha Most Entertainer tia Typing fault a um lei amani ding. Best entertainer chu nisien mawi hle’ng a tih.
Hieng Category ei siem hai hi abiktakin Music Video/Movie/Film appearance nei hai cho la thei bawk inla, ani sin aw chun Teachers Day or Event pakhata an perform na hai ei lak sa chun a hmu lo le a hrelo an tam el khela VOTING a hin sungkhat laina leia lawmman la thei vawng ei ni tlat.
Voting ei hril kai ta leiin, HAA haiin voting system inthaw dan iengkhawm ka hriet nawa chu thawdan dinga tha ka ti hung hril ve lang – Category tinah hin Selection Board (A category ah Professional line or Experience level lo nei ta) mi pathum pei thlang inla, chuonghai chun mipui voting le 50/50 vote nei v eve hai sien la, ani sin aw chun mipui vote 100 in a fe chun E KHAI! Ruoltha, sungkhat laina le mi pawlthiem hai chu vote an hmu rawn ding anih. Chun Selection Board haiin voting result dungzuiin decision la bawk hai sien la. Ei ngaidan meimei chu ani ie.
A tawptienga, HAA Program hmang dan hi a that zing laiin ei AWARD hai hi neka a hlutlem theina dingin HAA Performance Award 2019 (Gospel) leh HAA Performance Award 2019 (Secular) hi a program hran hran nisien la hieng nek hin a hlu lem ka ring tlat chu ti. Hieng anga program ei the thei chun a program ah perform tuhai ta ding khawma inhawi lem a ta, a mipui fe khawm tam lem veve thei bawk ei ti tihi ka ngaituona a um tlat chu ti. In ti ve naw ani chun hril thei lem chu ka nei naw ie.
Chuleiin, HAA hma ei lakna hai a tha ve zing laiin ei lekhapuon hai thleng inla, ei ngaidan hai suklien inla, critics hai hi lawm inla, a thalem na dingin ei lungril hai hawng inla ei nuom anih.
A tawptaka, HAA hai hmalakna hieng lawm lawma changkang le ropui ta hi an sawlzie le an inrimzie ngaituo tham anih. Mipui hai hin iem ei thaw vea, sum le pai innghatna bekbek nei lo fund zawng fawma an inrimpui ani ti hi ei hriet a pawimaw hle. An sawlna le an inrimna hai hrea sum le pai amani ei theitawpa thang ve ding chu ei ni annawm ie. Hieng hai popo lei hi annawm HAA thuoitu hai inpak an um na tak, hieng sa sa khawm hin program puithu tak el an mi la hang hmangpui thei hi lawm a um hle anih. HMAR mipuihai, mawphurna ei nei ve… HAA hung hrat pei sienla HMAR hnam puonzar hi ansanglem le hratlemin inkhai tung pei raw se.
