Responsive Ad Slot

HSA in CEM, NCHAC lawmpuina hun hmangin Memorandum an pek

Tuesday, June 18, 2019

/ Posted by Simon L Infimate
Muolhoi, June 18, 2019, Virthli (ONPO: uolhoi khan HSA Assam Hills Joint Headquarters thuoitu hai chun Pu Debolal Gorlosa, CEM, NCHAC chu a chengna inah MAC le CEM tum hni thlangtlinga a um chu lawmpuina an nei. Hi huna hin NC Hills a Hmar nauhai harsat zuolna thenkhat haia hma la dinga ngenna memorandum an pek.


HSA Memorandum a hin hieng hai hi hni le ngen a nih-

1. NCHAC, CEM hmasatak Pu CH Khawthlang a Statue (lung a ker lim) Haflong khawpuia inthut ding.

2.  Boro Arkap, Jinam Valley a Police Sation siem ding.

3. Jinam Valley Development Block siem ding.

4. Hmar MIL Teacher Sanction Post, College, Higher Secondary, High School, le Upper Primary School a hai pek ding.

5. Upper Primary (ME) School a Hmar MIL sie ding.

6.   HSLC Exam Centre, Boro Arkap High School a siem ding.

7. Muolhoi High School, Muolhoi hi Higher Secondary School a hlankai ding.

8. Autonomous Council Constituency the ding.

9.  HSA ram ding le Office building ding pe dinga hnina.

CEM chun thilpek an inhlan hai chu a lawm hle thu a hril a, inchukna le development hi a ngai pawimaw em em thu le harsatna HSA’n an hang intlun hi a lawm hle thu a hril. Hieng memorandum a zieklanga um hai hi chipchier tak le lunglut taka hriltlang ani a, HSA thil hni hai hi theitawp suoa, bawzui a sukpuitling a ni ngei ding thu a lo intiem.

CH Khawthlang Statue hi ama khat el a thu a suktluk theinaw thu a hril a, amiruokchu thil theinaw chu ani naw thu hrilin Jinam Valley a Police Station um hi makmaw a ni thu le development fe peina dinga pawimaw hmasatak a ni thu hai a hril a, an rang thei ang taka thangtlang a sukpuitling dingin a tiem a nih. MIL Teacher Post hai khawm hi thaw ngei dingin an tiem a, Exam Centre khawm hi a pawimawna ang taka sukpuitling ani ding thu an tiem. Muolhoi High School khawm hi sawrkar in Higher Secondary School dinga hlankai dinga riruong alo nei laia mi ani leiin hihi chu sukpuitling ani ngei ding thu a tiem bawk a nih. Autonomous Constituency the chungthu khawm hi thil harsa ani naw thu le ala hung um ngei dinga ngaimuong taka um dingin HSA thuoitu hai chu a tiem a nih.

HSA ram ding an ditna hmun tak enkai a, ram lekha siem chu a mawphurna a sie ding le a bawl man ding chen ama’n a hung ngaituo vawng dingin an tiem bawk a nih. Hi baka hin Cultural le inzawma Project hai HSA Assam Hills in NGO a nei Hmar Cultural Organisation (HCO) hminga thaw dinga ngenna chu sukpuitling dingin a hril nghal a nih.


Hun an nei chang chang pan zie dingin HSA hai chu CEM hin ditsak takin a fiel a, inlaichinna thatak neia inkuongruol taka ei hmasawnna ding hai ngaituo a, thil tul le mamaw hai chu inphalam loa ienglai khawm a kuoma intlun el hlak dingin CEM chun a ngen a, HSA thuoitu hai chu Pu Debolal Gorlosa chungah hin a thil intiem hai le an phalna leiin an lawm hle a nih.

CEM hmu zo hin Pu Ngamrothang Hmar EM, chu NCHAC Secretariat chamber-ah inhmupui a ni a, Memorandum copy hai pein file bawzui dan ding le HSA hmalak dan ding hai hriltlangna nei a nih. Chun hi huna hin Pu Lalremsiama Darnei EM i/c Education, NCHAC khawm memorandum copy hi pek a ni a, atul anga bawzui ding le hma lak dan ding hai la hriltlang dinga ti a nih.

HSA JHQ thuoitu hai chu Pu Isak Faihriem, General Secretary, Hill Tribes Students’ Association (HTSA) chungah CEM appointment a lakna leiin an lawm hle a, Pu Ngamrothang Hmar chungah khawm fak le dawn inhnik tak a chamberah an faktir leiin an lawm hle a nih. 
Don't Miss
© all rights reserved
made with by Simon L Infimate