Responsive Ad Slot

Directorate of Education (S) Manipur Team le ZEO Pherzawl Team ha'n Pherzawl Dist sunga Schoolhai an kan

Tuesday, May 21, 2019

/ Posted by Simon L Infimate
Parbung, May 21, 2019, Virthli (ONP): Dr. Geetchandra Sharma, Addl Director School, GoM chun Pherzawl Dist sunga Govt. school le feeder school thenkhat hieng Thanlon, Pherzawl, Taithu le Parbung a umhai kanna a nei hunah Parbung khuoa Govt. Hr. Sec. School, Jubilee Standard School le PM Jr. High School naupanghai le mipuiha'n an lo hmuok. Ama ruol hin Pi Lalhminglien, ZEO, Pherzawl Dist., Pu Lalhmasawn, DI of Schools, T Jeeban Khuman, OSD, Planning Unit, Th. Imobi Singh, OSD, Admin Unit, Kimboi Buhril, PT, SSA Assisting ZEO, Pherzawl, L Bijen Singh, Lecturer, Borobekar Hr Sec School, T Rajesh Singh, Off Asst. le Pu Lalruot Ralsun, Principle Parbung Govt Hr Sec hai khawm an thang ve.


Hi huna hin Addl. Director (S) Planning kuoma, khuosung VA, HWA le Val-upa ha'n Jt. Memorandum an pekna a chun Lecturer ding mi 7 Parbung Hr. Sec School a pek dinga an ngenna chu dawn in, Lecturer mi 18 sanction dingin an tiem a. Hi Hr. Sec. hi a puitlingna ding chun khawtlangin hma nasataka lak a tul thu le kum 2 sung ensin phawt a ni ding ana, chu khela naupang awmtawk Sorkar in a mi bitliek pek zat an um naw chun phawi a ni ding thuhai a hril. Hon'ble CM le Education Minister hai khawmin tulai hnai el khan Schoolhai dawmsangna di'n Programme thar an induong tah a, thawktu huntawk, hmangruo le buildinghai khawm suk hmasawn ning a ta. Chun, Constituency tinah Govt. School pakhat pei bituk siemin Parbung Govt. School hi thlang a ni thu a hril bawk.

Pi Lalhminglien ZEO khawmin thu a hrila. I khuo hmangai rawh ti thuhai hrilin, State danghai ei thluknaw nasan le unau Naga ha'n Sorkar schoolhai an siemthat danhai a hril a. Chuong anga ei ni mipuiin ei neinaw leia a biel hming phura Directorate a inzakna a tuok hlak thuhai mitthli thlak hiela a hril chu mipui lungril le zirtirtuhai lungril a tawk hle. VA in Addl Director, ZEO, DI le Principle hai an inbiekpuina a chun, a biel mipuihai lecturer ni thei dinga gualified hai chuh Hr Sec a dinghin thahnemngaia hung thawk nghal dingin an hril a. Post Graduate lecturer sin thawthei ding awm hai hi Schoola lo in volunteera hung thawkhai chu awlsam takin recommend pek an ni ding thuhai an hril. Hieng ang lecturer post hluo thei ding awm le thawk nuomhai chun Parbung VA ah June 15 bo hma ngeia hung inhril dingin ngenna an siem nghal bawk a nih.

Education Team -S Manipur ha'n school an kanna pei a hai, study Teaching Learning Materials (TLM) le sports materials chi hrang hrang hai an semsa bawk.(input: Lalruotlien Hmar)
Don't Miss
© all rights reserved
made with by Simon L Infimate