Responsive Ad Slot

DC Pherzawl in thawktu hai mani thawkna hmun senga um dingin a ngen

Wednesday, May 22, 2019

/ Posted by Simon L Infimate
CCPur, May 21, 2019 (HT): May 20, 2019, 11AM khan CMO Conference Hall, CMO Complex, IB Road, CCPur-ah Pherzawl District puol bika dingin District Health Society, National Health Mission, Pherzawl District huoihawtnain One Day District/ Block Training on Intensified Diarrhoea Control Fortnight (ICDF) nei a nih.

Hi huna hin Ms Mannuamching, IAS, DC, Pherzawl district Chief guest in a ṭhang a, training hunah Dr Baby, DNO, Child Health; Dr Tongzakai, Paediatrician, District Hospital; Dr Ramneithieng, Zenngaihlun, DPM Pherzawl hai resource person-a ṭhangin ICDF chungchang hrilhrietna an nei a, Dr Baby inrawinain discussion hun hmang a ni bawk.

Chief Guest Mannuamching chun, Pherzawl District hi hriselna le inchukna tiengpangah hmangruo le thawktu tlaksamna nasa tak a um leiin a hnufuol hle thu a hril a. Thawktu hai chu hriselna ngaipawimaw a, mani sin le mawphurna a ni ding ang taka sukpuitling le phursuok seng dingin a fiel a. Medical teamin khaw tin an sir kim vawng theinaw leiin, a hmuna um Anganwadi le ASHA worker bakah naupang enkawltu School hai khawmin a hlawtlingna dingin mawphurna lien tak an nei thu hrilin, chu ding thun theitawp suo seng dingin a fiel a. Thawktu hai mani thawkna hmun senga um dingin a ngen.

A hril peinaah, Pherzawl District-ah inchukna tieng siemṭhatna dingin education department in theitawpin hma a lak zing a. School hai ṭha taka a function theina dingin ZEO, CCPur le State a inthawk team khat Pherzawl District-ah School campaign nei dingin zanikhan CCPur suoksanin Pherzawl an pan niin DC, Pherzawl chun a hril a.

District sunga hriselna tiengpanga dingin trainee hai Master trainee an ni leiin, training hmang ṭangkai ngei tum seng dingin a fiel a, mani mawphurna chitah midang hrilsawng thei ding khawpin hrila um hai ṭha taka ngaithla dingin a hril a, India sawrkarin hriselna dinga programme an duong anga a puitling ngei theina dingin mitin ṭhahnemngai taka sin thaw dingin a fiel.

Dr Baby chun, India ram sunga naupang kum 5 le a hnuoitieng hai thi tamna tak Diarrhoea a ni leiin sawrkarin a ngaipawimaw a, kum 6 liemtaa inthawk naupang hai lai Diarrhoea leia thina tlung hlak suktawp/ suktlawm a ni theina dinga IDCF programme hi a hung ṭan a nih tiin a hril a. Tukum hi natna leia thina tuok an um nawna dingin Zero Child Death due to Childhood Diarrhoea ti thupui hmanga hmang a ni dign thu a hril.


Diarrhea natna laka him theina dingin medical team chau ni loin mitinin mawphurna ei nei seng  tia hrilin, fai le thienghlimna hi hriselna lampui a ni leiin ei kawl le kieng hai fai taka enkawl a, fak le dawn bakah taksa enkawl thienghlim ding a nih tiin a hril.

Training a hin Pherzawl District sunga Education Department, AI Thanlon, PHC a Medical Officers, MO CMO Poll, Staff Nurse, ASHA, ICDS Supervisor, BFFM hai an ṭhang tawl. Chief Guest Mannuamching chun, hi huna hin Pherzawl district sunga Anganwadi Centre, PHC le School tum tum haia tar ding ICDF poster a tlangzar. 
Don't Miss
© all rights reserved
made with by Simon L Infimate