Responsive Ad Slot

BELTE PHUL !

Sunday, April 28, 2019

/ Posted by Simon L Infimate
~ Jami Darngawn

Belte-a thil ei suong chun a phul awl em ema enkai zing a ṭula, belpuia thlai ei suong ruok chun ringzo a uma enkai bek bek khawm a ngai nawh ti thei a nih. "Belte phul" ti umzie chu hmusitna ṭawngkam ei ti dim?  Annaw khawma ringzo um lo, puitling tak tak lo ding tina ang niin kei chun ka lo ngai hlak a.


2007 kum tawp tieng khan mi pakhatin hieng hin a mi tih a "l hlimna le lawmna hi belte phul ang ning i ti aw ! " a mi tia, kei chun "Chuong el a ka hlimna le lawmna hi tawp el ding kan ta nawh, Lalpa'n A Rawngbawl dinga a mi ti dan ang peiin hlim le lawm takin ka damsungin ka thaw pei ding a nih" tiin ka lo dawn a nih. Chuonga mi titu chu tuhin hi khawvel a lo suoksan tah a nih.

Ani ngei, khang hun lai khan Lalpa'n A Rawngbawl dinga a mi ko suok hlim kha ka na, ka thei ang angin Lalpa Thlarauvin Amin hriettir dan ang pei khan ka uma ka hlim thei em em a nih. Belte phul lep lep ang ka lo ni ngei ning a tih. Amiruokchu, hun le ni hai a hung fe peia keikhawm Lalpa'n ka thei ang tawka A mi hmangnahai kha lungawi takin ka thaw peia a changchun mihriem ena mawi lo le insit um changkhawm a um ve bawk hlaka chu, thei tawp ka lo insuonahai chu Lalpa'n Ami hriezingna hi ropui ka va ti de !

Pasal pakhatin belte phul ang mei meia Lalpa Rawngbawl dinga a mi lo tina/ringna kha a hun lai khan chu hmusit ṭawngkam angin ka lo ngai hiel a, amiruokchu tu tieng tienga ka ngaituo kir chang chun ka thlarau chau le nguia ka um changa mi sukhrattu ṭawngkam laia ṭhang hmangruo ropui tak pakhat a lo ni zing a nih.

Khang hun lai khan thuziek hi ka la thaw/ziek ngai nawh a, ziek ding tina khawm ka lo tin ngai nawh. Turuok hin chu khang hun laia ka um dan ang kha nuom hle langkhawm ka um thei nawk ta naw a. Lalpa'n ka um hmun a'nthawkin ka tawnhriethai Ama ropuina dingin A min ziektir/puongtir lem tah a nih. Lalpa'n hun ṭha le damna Ami pek chun a ṭul ang peia Ama rawngbawl hi ka tum le ka damsan chu a nih.

Tiemtu ditum nangkhawm i thei ang anga Lalpa rawng i bawl kha a ropui a nih. Mihriem endan/inkhidan le ei Pa Pathien mi endan/inkhidan chu an ang naw ding a nih ti hriezingin hmatieng pan hram hram hlak ei tiu.


Filippi 3:
12. Hmu ta zing inti kan naw a, famkim ta zing inti khawm ka ni bawk nawh, Krista mi manna san chu ka man thei duoiin, ti'n a hnawtin ka hnawt lem a nih.
Don't Miss
© all rights reserved
made with by Simon L Infimate