Responsive Ad Slot

KHAWVEL l HRIET I NI AM?

Sunday, March 3, 2019

/ Posted by Simon L Infimate
~ Jami Darngawn

Khawvel a um mihriem popo hi ei ngirhmun/nina ei inang tawl naw êm êm a, mi ṭhenkhat chu langsar/inlar êm êm, mi ṭhenkhat ruok chu langsar lo êm êm le mi hriet khawp lova um ei tam hle a nih.

Vawikhat chu nuhmeipawlhai inkantuo ding veng dang kan danga kan felai chun, lampui kan inhmang hlau el tah a, ruo a sur nasa bawk leh zan inthim hnuoia chun kan motor khaltu khan lampui a lo hriet bek naw bawk leh, keini motor sunga umhai khawm chun lampui hrie bawk lo. Chuongchun, kan ruol danghai leh kan inbiek (Phone call) tawla kan inkhawmna hun (Time) hlak kha a hun a tlung ding an ta bawk si, kan chuongna motor sunga chun Speaker ding Pastornu kan phur bawk si, kan va buoi ngei de. Ka beidawngin ka lungrila chun ka ṭawngṭai ve tawp tah a nih.


Lalpa kuoma chun "Lalpa, lam kan inhmang a nih, lampui mi hril rawh, hril nuom i nei chun mi hril bawk la aw ?" tia lungrila ka ṭawngṭai zo chun ka hang meng chu kan kuom hnaia nuhmei pakhat thlalak lien deu ka hmu tah a, kan ruolha'n "In umna hmun hung hril ro hung ṭhuoi ka ti cheu" tiin an hung call nawk a, chutaka chun kan umna hmun chu chieng takin ka hang hril thei tah a nih.

Kan motor tukver a'nthawk chun ruosur ser ser lai chun khawvelin a i hriet êm êm a min an hril ka nuhmei chanpui ka lo suong ve êm êm Mary Kom lim chu lientaka a in compuond sunga a tar chu kan hmu thei ta lei chun kan umna hmun chu hriet theiin a um pha tah a nih. Chuongchun kan inkhawmna ding hmun chu mi hung zawngtuhan awlsam takin an mi hung ṭhuoi pha thei tah a ni chuh. 

Awleh, Mary Kom chu mi inlar khawvel i hriet a nih a, ka lungril chun "Mihriem seng seng ei inang naw ziet hi aw Mary chu khawvel i hriet a ni bik a" tia ka ngaituo lai chun ka lungrila chieng êm êmin "Nang chu khawvel Siemtu I hriet i nih" tia mi hung hriltu um angin ka uma, ka va hlim ngei de aw! Kan inkhawmna a ka ruolhai kuoma khawm ka hril nghe nghe a nih.

Unau ditumtak, khawvel i hriet khawp lo khawm i lo ni thei ie, sienkhawm khawvel le a sunga thil um popo Siemtu le Neitu duot ngawi ngawi ei ni leiin inngaisie el ding ei ni nawh.

Bible a khawm Pathien rawngbawltu tam tak hming zieklang/suklangin a um a, sienkhawm Biblein a hming khawm a suklang ve lo nuhmeite pakhat sal nawk nghal Pathien ditdana rawngbawltu Israel nuhmeite hi ngaisang um ka va ti de aw !

2 Lalhai 5 :
2. Chun Suria mihai chu râl rûna an fe laiin, Israel rama inthawkin sal nuhmeite pakhat hi an hung ṭhuoi a. Chun ama chun Naaman nuhmei rawng chu a bawl hlak a.
3. Chun a hotunu kuoma chun, “Ka pu hi Samaria-a zawlnei kuomah um sien chu aw! Ama chun ân phârna hi a sukdam el ding bah,” a ti hlak a.

Hi thu hi mi tam tak chun March 3, 2019 hin Sunday sikula ei inchuk ka ringa (Kei ni khawm kan inchuk mek) hi sal nuhmeite inpek zona hi entawn tlak a tling hle. Israelhai Pathien thilthawtheina chu a suong êm êm baka, mihai damna ding chun inzak inphak khawm dawn lovin a hril tawp el na hi entawn tlak a nih.

Nang le kei khawm hi Israel sal nuhmeitenu anga ei Pathien Israelhai Pathien thilthawthei ziet le, Sukdamtu ropui a ni ziet hi ringbawtuhai laia inzak inphak dawn lova ei hril/thaw pei a ni chun khawvelin mi hrie naw sienkhawm Lalpa Pathienin Ami hrietpui eini chun lungngai ding a um nawh. Lawm êm êm ding ei nih, Pathien mi hriet ei ni leiin.

PATHIEN MIHRIET EI NINA HI LAWM ÊM ÊM DING EI NIH.
Don't Miss
© all rights reserved
made with by Simon L Infimate