Responsive Ad Slot

KAN ZINNA - XVIII

Thursday, March 21, 2019

/ Posted by Simon L Infimate
~ Ramthienghlim Varte

Kohran le Hmar Inpui (Hmar Supreme House) HI khawmpui inruol rupa churachandpur ah programme siem a ni leiin remchanga hmangin venga inzin dingin kan buotsai a. Hieng neka kan thaibuoina hih ka la hriet ngai nawh.

AIRPORT SHUTTLE Meghalaya State Transport Corp. (MSTC) Shillong to Gopinath Bordoloi International Airport service a zing dar 6:00 a suok ding chuh zingkar dar 6:05-in ka hei tho phawt a, lungawi lo deuvin mi lo nghak tawk tawk a, putar inhai ang elin kan hmaw taluo leiin ka Wallet (Pawisa bag) ka thei nghil ti ka hei hriet suok nawk a. A beidawng thlak ngei el. A tlangpuiin Wallet a hin pawisa bakah document pawimaw hieng -I-Card, ATM, Driving License, PAN card le dang dang ei sie hlak hih.

AIRPORT SECURITY :
Tulaia India-Piakistan inkar buoina sosang zuol leiin ni dang nekin ram venghimna sinthaw pawlhai hin hma an lak nasa zuol a, Hmarsak NE India lem chuh thang an lak nasa nawk zuol a nih. Inzin-mi Vuongna a inzinhai ta ding lem chun VVIP/VIP naw chuh Airport huong sunga I-Card bova a lut thei lo ang thluk a nih. Beidawng leia ‘Lalpa…. " tia hei tawngtai ding em khan chuh ka thang a tlawm deu leiin kan vir kuol vel a. Ar that dan chi tuam tuam a lo umve tho leiin Imphal ka hungtlung thei hram chuh a ni khah.

HMAR INPUI ASSEMBLY : 
Umna hmun zirnaw leiin venga hin nuom angin sawt ei um thei ngai naw a. Tu kum chuh  Hmar Inpui Assembly Secretariat ah hotu/thuoituhai ditsakna zarin mawphurna peka ka um anga sukpuitling dingin ka hung thangve a, state dang danga thuoituhai hung khawm ruol U, ruoltha le hotu/thuoitu inzaum tam takhai le inhmu tlangin lung an leng rum rum a, rorel khawm a rek ruk le bangkhai um lovin zo fel theiin a um a, lawm a um hle.

HMAR INPUI ELECTION :
Hmar Christian Leaders Forum (HCLF) ei kohran thiempu inzaum tak takhai inrawina hnuoiah Hmar Inpui 2019-21 sunga thuoitu ding thlangna (election) ei nei khah ka thang vawi khatna a ni a. Hmarhai hih Kohran, khawtlang le organization hrang hrang mipui ai-awtu ding thlangna (election) kawnga hin ring nekin ei la’n hnuoi ka ti khawp el a. Election dan le dun Hmar Inpui (HI) in khirkhan le felfai taka a siemhai dai ner zawnga boruok thanaw a hung vuong lut leiin boruok a suklum  hle a. Hun iemani chen election commission hma lakna suk bahla pha’n a um nghe nghe leiin a pawi em em bakah ei Supreme House hmusitna le inzaumna a suk nep tu a nih. Amiruokchu, election Commission tienga inthawk ramhuoi thilthaw hnawtsuok ngam khawp a huoisen taka an hma lakna zarin Beram le Kel thena dar an hung vuok a. Hall kawtkhar ah Pastor pahni vengtu sunthaw’n intlitfaina ropui a um ta a. Muolpho taka mipui hmaa ngira inpuong a hnawtsuok pawlhai tading lem khan chuh piengtharna khawp zet ni’n ka hriet. Chu zo chun inthlangna a um thei chau a nih. A ropui hem hem hle. Hiengang thil dit umlo tak hih a hung in tanna, an vir suok dan ngaituo a Diebol/suol thlthaw tirdakum le ditum lo tak hih organization danghai khawma hnawl ngam ding le mipui khawmin thei ang anga thangpui tum ei tiu.

ZINGKAR INSAWIZAWI :
Venga ka suok chang Tuithaphai ruom sung hmun hrang hrang fanga mit inlen hih a nih. Kan Zinna IX le XII a khan Tuithaphai hmun dang fanga ka thil hmuhai ka tarlang tah leiin tu tum hin chuh zingkar inzawisawi remchanga hmangin kan veng Khawmawi le a sevel chipchier deuvin kan vak kuol a. Mi thar le hmelthar an pung hrat em em a, pansak-panthlang lo le huona ei nei ram/hmun le kan tleirawl laia kan tuol chaina le Lawi chingna hmun le ram, Aimeiser sitna KIKIM vadung, Ngalpui, Ngallairang khuoi bu zawngna ram hai po po khawthar satin, In ropui le kawtthler mawi tak takin a sip zo tah a. Saidan, Khawmawi le M. Ramthar ti naw chuh khuo le khuo infe pawna lamlien (pucca road) inhawi em emin a um khep khup el tah. Nu tawng hre lo deu vawng an ni leiin hmun danga umhai ding lem chun dawra Kuva takngiel khawm inchawk thei an ta naw deu thaw nih. Hun sawtnawtea chuh mani insunga takngiel khawm inthin dawr dawrin ro ei la rel ding a hawi. A tlangpuiin ei khaw delna hmun danghai khawm hun hungtlung ding pei ngaituo chun a ru inno pawlah ei thang pei ding a ni hih. 

March 8, 2019
Don't Miss
© all rights reserved
made with by Simon L Infimate