Responsive Ad Slot

A THUTIEM AN KHEL NGAI NAWH

Sunday, March 10, 2019

/ Posted by Joyful Thiek
- Jami Darngawn

Sâm 119:88

I hmangai ngilneina ang peiin mi sukhar la, chuongchun i bauva thusuok chu ka zawm ding annawm.

Awleh, kum 10 vel liem tah a khan vawikhat chu kan Biekin ah thuhril dingin ruotin ka um a, ka thuhril lai chun mak takin hienghin ka hung hril suok el a "Hi bau hin țawng dang dangin Pathien thu la hril a tih" tin ka hrilsuok el taha mak hi kan ti taluoa kan zak bawk a nih. Kha hun laia ka thuhril ngaithla hai chun invet an mi sawn hiel ka ring a nih.



Kei țawng thiem dukdak neilo nu hin iengtin am ni thei a ta? Ti chu ka lungrila a um zing a nih. Amiruokchu hun le ni hai a hung fe peia tuhin mak takin țawng dang danga thuziek dinga fielna ka dawng el hi mak ka tiin Lalpa remruot a ni nawh ka ti thei naw a nih.

Lalpa'n ka phu lovin ruolțha a mi pek peia kei țawmkailo nu hi Lalpa zarin thuziek dinga kawt hawngpeka ka um hi inphalam um ka ti laiin ka lawm em em a nih. Tukhawm hin țawng danga thuziek dinga fielna ka dawnga thawnaw/zawmnaw ka tumpo leh kei a hin inhawinawna a um tlat leiin, Lalpa ringsanin thiemnaw hle langkhawm ka thawpei ding chu a ni hih !

Lalpa thu hi an khel ngainaw ziet hi kei telul chunga khawm hmai ruol lovin an lang leiin ei Bible a ei hmu hai lem lem chu iengtin am inkhel te lul a ta ti chu ka lungrilah a thar takin a um a  nih.

Chu lai zing chun, keiin ka taksa bau ngeia thu ka hril dim a ni ka ti laiin hienghin ka lungrila chieng takin a hung inlang nawk a "Pathien bauva thu suokhai khawm ziek suoka um Bible a chuonghai hi a nih" ti a nih. Chu lei chun fesuokin ka taksa bau ngeia hrilnaw lang khawm ka tapte bul a'nthawka Lalpa mi pek ang anga ka ziek suokhai hi a lo ni zing a nih ti chu ka chieng hle a nih.

Amiruokchu tapte bul ie ti lo chun hi ka rawngbawlna a hin kei ka tawk tawkin harsatna ka tuok ve bawk hlak chutie, kei kan inen pha chun  kan sik ngawi ngawia Peter tuichunga a lawn ang khan ka tlu duoi duoi el hlak a nih. Amiruokchu Lal lsu ka en pha ruok chun huoisen takin ka fe/thaw ngam nawk hlak a nih. Thlemna thlipui le tufawnhai hung hrang hlakin mi chimpil tum hlak sienkhawm  "Lalpa mi kei tho raw aw" ti chu ka thupui a ni hlak a nih.

Ani ngei Lalpa rawng ei bawlna a hin khawvel thlipui le tuifawn hai chun nasa takin mi hung chimpil tum hlak khawm a ni thei ie, hi khawvel eiin zinna ram a hin tum harsatna tuok lo ding? Harsatna le beidawngna hai hi ei tuok ding reng a nih. Sienkhawm ei en ding tak Lalpa lsu ei ena A țhangpuina ei ngen mawl mawl a ni chun  Aman a kut changtiengin Ami kei tho hlak a nih.

Unau dit um tak Lalpa'n khawvel tuifawn le thlipui a'nthawkin keitho mawl raw sen che. Amen.
Don't Miss
© all rights reserved
made with by Simon L Infimate