Responsive Ad Slot

10th HMAR INPUI GENERAL ASSEMBLY THLIRLETNA

Thursday, March 14, 2019

/ Published by Simon L Infimate
~ Jr Amo

HSA GHQ hotuhai ditsakna zar le Pathien mi țhuoina zarin khawvel pumpuia Hmar nauhai inekawlna khawlpui, Pathien ti loah, hnuoia ding chun a chunghnung le a lien tak, Hmar nau a hmelțha, a hmelsie, a kawi deu le kawi naw deu, a suol le fel hai po po chunga rorelna khawl insang tak Hmar Inpui General Assembly a vawi 10-na chu vangneithlak takin, palai mi aia fe khawm ni lo, dan in a mi phal ang taka Palai indik tak niin (ka pieng a inthawk) a vawikhatna dingin March 4 le 5, 2019 khan ka țhangve thei a, lawmum ka ti a, ropui ka tih. Ka vote hlu tak el indiktak in, mi min fuina țhang der loin thienghlim takin ka thlak nghe nghe. Ka vawikhat țhangna a ni leiin, hmu nuom ka haua, hril nuom khawm ka hau, chuong hai chu Thlirletna tiin ka ziekdawk a nih. A kip a kawiin ka ziek hne naw a, sienkhawm, a pawimaw ka ti zuol hai mipui tiem dinga pholang hi ka mawphurna ah ka ngai leiin ka hung ziek a nih. A țhen ka ziek hai chu, lem harsa met dam a ni el thei, a țhen chu lem inhawi tak dam, tiemtuhai, ei lo pawm thiem ka nuom.


March 4 in rorel țan a ni a, hmun dang danga inthawk palai 200 bawr vel hai chu Hmar hai parliament hall a ei hmang (mek) VTI Auditorium ah bit deu hmur a ințhung in rorelna Professor Vanlalnghak, Assembly Speaker in a chair a, țhenawina țhang loin Agenda 10 (pakhat zieklang loa um leh 11) chu inhnu sie loin tluong takin kan rel zo thei. Hieng laia Inpui thurel pawimaw zuol hai chu Inpui inawp dan siemțhat, Sikpui Ruoi hi December 5 a hmang seng ta ding, Manipur a khawm Assam rama sawrkarin restricted holiday a puong anga in puong tir ve ti hai an nih a. Sikpui Ruoi hi tienlai anga fepui zing thei a ni naw leia Hmar hai Annual Festival anga pawm a kumtin a inser ni ta sien ti chu, remti nawna um chuong si loin thurel anga pawm a ni naw kha chu a pawi ka ti met a. Manipur sawrkar nghak el nek chun pawmthleng a Annual Festival a puong kha a pawina um dingin an lang nawh. Hmar hai hi festival mumal tak nei lo ei ni a, May 16 Martyrs Day hi ei festival ang deuin a um ta lem a, ei hmang letling met a, thlak danglam vat thei dan a um a ni chun ei hmasawnna ding pakhat ni ve in ka hriet. Hi le inzawm pei hin, sawrkar kuoma Sikpui Ruoi campaign na ni fawm nghalin, kum 2019 Sikpui Ruoi dam hi Imphal phairuom a Bhagyachandra Open Air Theatre (BOAT) a vawikhat na na na chu Manipur pumpui a dingin hang huoihawt thei inla, nuom a va um de! Țhuoitu thar hai na ver zawng nisien ei nuom hle. HSA GHQ in Vangai le Parbung SDO Camp Office hai a khar chu Inpui in hma mi la pui raw sen tia ngenna an siem chu, Inpui in ei ram hmasawnna ding chu hnawl loa a pawm kha a ropui a, Inpui le HSA GHQ inthukawp a hnam hmalakna a ni lem ta ding a nih.

Hmar Inpui Assembly Speaker, tawnhriet khawm a lo hau ta ning a ta, a fet ve hle in ka hriet a, ro tan a thiemin a huoisen huntawk thoin ka hmu. Chuong lai zing chun, ei bul țanna infuk rak loa seilien ei ni tawl a ei ni rawi hi, rorelna hun ei hang hmang a, Speaker in Agenda a hung hril a, chu zoah palai haiin hril țan dingin hun a hung hawng a, ei hril ding a ni zing laiin, "Pu Speaker " ti a Speaker inzana address khawm siem hran chuong lo, Agenda putlut tu khawma, ti chuong lo. "A ngir ding dang an um naw ema ka hung ngir el" ti dam rorelna hall a ti chi a ni nawh. Ei thu hril nuom amanih, ei thu putlut dinga hun ei hmang ding chun a bul le a tawp ah Speaker/Chairman address ngei a țha hlak, thu lailung laia address zing khawm hnam le ram hmasawn lem hai chun an thaw hlak a nih.

Thlang ram dang dang hai rorelna Inpui en hlak hai chun hre deu phuor ei ta, an rorelna hall sunga thu an hril a ni chun, an thil hril tlar tin zo deuthaw hin Speaker an address a nih. Chu chu a fe dan deu hlak a nih a, kohrana insawizawi ta sa, rorel a țhang hlak hai chun a awm tawk an thaw thei a, Mizoram tienga um hai rorel huna țawng dan an thiem bawk. Inchuk thei a ni a, hmasawn thei ei nih. Ei rorelna khawlpui hi inza a phu ang huin ei lan za tawk thei naw hi a pawi ka ti met, amiruokchu, a hma neka țhalem beisei pei hlaktuhai ei ni leiin, a țhalem le a mawi lem chu ei la laklut pei ring a um.

Hmar Inpui hin hmun le ram neiin, Office changtlung tak el nei ve ta sienla, rorelna hall hai umin, chu taka chun inkhawm thei ta inla chu duthusam a ni lai zingin ei la hrillang țha ngam naw a nih. Asanchu, term hluia khan Inpui hi a khâwl invir ding angin an vir hne naw deu a, region danga um hai, welfare hai lem chun inhriettirna notice iengkhawm an hmu ngai naw thu chen rorelna hall ah palai hai hriet dingin an hril kha chu a pawi em em. An inhawng naw lem chu a ni naw a, sienkhawm, thupek zawm ding an nei si naw leia an thaw ding awm hai khawm thaw loa um hlak an ni thu an hril a, emergency ni ta sienkhawm, an thei angin chawp le chilin fund hai dam an la submit a nih. Hmabak a chu, communication gap amanih problem amani hi inkieng thei ta sien nuom a um. Chun, ka hrietsuol chun (mi hung sukdik hai sien), ka hriet hi andik ka ring a, tuta Inpui Assembly kha dan ang taka thaw ding nisienla chu, welfare fund submit mumal an um naw leiin rorelna kha a um thei naw ding a nih. Amiruokchu, a pawimaw si a, dan hraw lova rorelna kha fethleng el a ni ta lem. Hi lei hin, Inpui khawma a mawphurna innghil ta naw sien, mipui hai le khawtlang hai khawma ei thaw ding ei thaw ve ngei nuom a um.

A bula ka hril ta angin, a reng a ram chun ka ziek hne naw ding leiin a pawimaw zuola ka ngai hai po ka hung thaidawk a nih.

A ni hnina March 5, 2019 kha mimal thil leiin minute tlawmte in kan hnu met a chu, an mi lo țan san nawh, a hunbi tiema um hnawt phak naw lang khawm kan hnu nawh. Hi ni hi a hmun ka zuk tlung meu chun a zani rorelna palai a țhang neka a let hni bawr vel vanga tam mihriem an lo um el ta chu, sapțawng takin an ti hlak "I was taken aback." Mak ka ti a, mithienghlim lawr a tlung dim an ta aw ka ti nuom hiel el. Hieng mihriem an hung tam huk el ta hi, a san ieng dang khawm a ni naw a, Hmar Inpui term thara țhuoitu ding hai inthlangna a um ding leia mihriem an tam kha a lo ni ta zing el! A zani khan khawlam an lo inrel hmang tâwl ruok chu, ka hriet thil an naw leiin ka zieksa ta chuong kher naw a nih. Hi hi ringawt hin ei mizie, ei nunphung ditumlo chu a suklang a nih.

Mi dang hai khawmin an thaw ve seng laiin term hluia Jt. Secy. le Media ic.cheltu hi sâm țhel chi niin ka hriet naw, ama kha um naw sien chu Hmar Inpui General Assembly kha a puitling ka ring naw bawk. A buoipui nasa hle a nih, chuong lai zing chun, a sinthawtu an indai naw leiin inthlang ding chu inzo zap hne nawna um met chu palai haiin kan nghak met a nih. Inthlang ding ti a Hmar Christian Leaders Forum haiin an thaw ding thaw țan dinga hun an hung lak chun, proxy vote thaw ding mihriem iemani zat zet an lo hung inrawl lut chu, hrietsuok a hung ni a, HCLF hai Election Commission na hnuoia ah inthlifimna țan a ni a, Pu Ramthienghlim Varte in "KAN ZINNA XVII" a zieknaa "Beram le kêl țhena dar an hung vuok a" a ti ang khan vote zuk thlak el ta loin HCLF hai chun Hmar Inpui executive ti lo po palai inzaum tak tak hai chu inhrethiem a Assembly hall mi la suoksan pek phawt ding a thu an mi pek dungzuiin Assembly hall a inthawk chun kan suok huol huol a. Palai list hai en țha in, iemani chen kan nghak hnungin a pawl pawlin a hranpa in an mi ko lut nawk tah a nih. Rorelna a țhang Palai reng ni lo, mi aia vote thlak ding, Hmar Inpui inawp dan lo anga mani vote nei thei ding bituk zat neka tama lo hung infen lut dam, kum tlinglo vote thlak ding a hung țhuoilut hai dam (Tirdawk/insuoktir an nih), ei Hmar Inpui rorelna insangtak kha ei va zuk inza naw lawm lawm! Ieng leia hieng lawm lawm a election boruok hrim hrim hi ei zo hlawl naw am ni tang a ta ti chu ngaituona a them inthuk hle a nih. Khang ang thil indiklo kha a thawtu chu inhre ngei a tih, a mihriem hai khawm a ei zir nawh, ei depde, ei lepchie hle a nih ti bak hi chu hang tuoinam rak dan khawm a um hran nawh. Mihriem ditzawng inang lo ei ni a, ei țha ti zawng dam ti naw zawng dam an tling an tling naw ding leia ei hnam hmusit taka hieng anga thil indik naw thawna hmuna Inpui Assembly ei hmang hi chu a tu mihriem khawm ni inla thaw zawngsak chi niin ka hriet nawh. HCLF hai Pathienin a umpui a, huoisenna le indikna an dit leiin, sel le pa takin inthlang an mi zo pui thei kha lawmna an sâng.

Lee Kuan Yew, ei hriet tawl ka ring. Thlierkar chite, rambung pasie em em, fak le dawn le inchukna kawnga hnufuol em em Singapore ram vawisuna Metropolitan cities a hlangkaitu a nih. A thupui chu "Meritocracy" a nih, mani thiemna le theina izir a sin chel, mawphurna chang ti a nih. A thiem am, a thei am, ieng ang mihriem am ti ngaisak loa inditsakna rama, ram a dingchang ngai nawh. Vawisun hin, Lee Kuan Yew lo inlal naw sien chu Singapore khawm a hmel put danglam hleng a tih. Ei ni khawm, inthlangna hrim hrima hai, mi an thilthaw dungzuiin in ditsak tum ta lem ei tiu tuta inthawk chu! Lee Kuan Yew a țawngbau bawk chun, "hi hi ei thilthaw hi lekhapawi indeng ang mei mei a ni nawh, nang le kei ei hringna a nih" ti hi.

Hmar hnam țhuoitu chun thir kuttum leh, hmasawn lem, huoisen lemin mi țhuoi mawl raw sen!

Camp: Fox Journal Street, Sielmat
Don't Miss
© all rights reserved
made with by Simon L Infimate