Responsive Ad Slot

Vangaisumtuk Lalnu Pi Rodailovi a huon-ah Prayer Hall bawl tum

Saturday, February 2, 2019

/ Posted by Unknown
Patpuihmun, February 2, 2019, Virthli (ONP): Pu Dr. Chaltonlien Amo, Hon’ble MLA, Tipaimukh A/C hai nupa chun tulai hin an nu- Pi (L) Rodailovi, Vangaisumtuk Lalnu a huon ah Prayer Hall bawl tumin a hmun ding sukfaina le nawr zawlna sin an thaw mek. Prayer Hall bawlna ding hmun a hin January 30, 2019 khan Pi Lalramsang Amo inrawina hnuoiah Patpuihmun khuo huopin nuhmei pawl han Lalnu huon sukfaina neiin ṭawngṭaina an lo nei ta bawk. Prayer Hall hi Lalnu Pi Rodailovi-in a dam laia a huon siem, a ṭu hmun ngei ah bawl a ni ding a nih, a ṭu hmun a hin a dam laia a kut hnung lung hmanga a kaiṭen siem hai hmu theiin a la um. Vangaisumtuk Lalnu Pi Rodailovi a huon hi hmun inhawi tak el a ni a, hmun dang dang thlirna ding khawma hmun remchang tak el a ni a. Hi hmuna inthawk hin Kailam rawl, Hmarbiel tlangdung, Cachar phaizawl, Mizoram tlangdung, Tuiruong le hmun dang dang hai thlir thei ani a, a huon sunga le a kawl el a hin Lalnu Pi Rodailovi hrietzingna Lungdaw le Waiting Shed a um a, Pu Lalruong Lungkap khawm a um bawk a nih.

Prayer Hall bawl zo ani huna hin ṭawngṭaina ding Cabin khawm bawl sa pei a ni ding thu, Lalnu Pi Rodailovi a huon hi hmun thienghlim, abikin Vangaitlang mipui le hmun dang dang a um a nuom taphawt hai ta dinga ṭawngṭaina hmun ding le hmun pawimaw a siem an tum thu, hmun inhawi le khuolzinmihai ta dinga hmun hmu nuom um a la hung ni ngei a beisei thu Pi Lalramsang Amo chun Virthli Palai a hril.






Don't Miss
© all rights reserved
made with by Simon L Infimate