~ Jami Darngawn
January 27, 2019 Sunday khan nupui le papui iemani zat kan inṭhungkhawmna a chun mobile phone pakhat ka kuoma a uma, kei khawm chun a neitu ding awm ka hriet el naw leiin ka kuoma chun a um pangngaiin a um zinga, a hnung met chun mi pakhat kuomah "Hi i mobile an naw maw" Ka ti a'n leh, ama khawm chun "Aw a ni ngei hi tie" ti malam chun a laka, kei khawm chun fiemthu titak chun "Ka lo inrûk vang a ni kha " ka tia, ami dawn nawkna kha ka lungrilah a cham zinga, ngaituona tam tak ka nei pha hiel a nih.
Ami dawnna chu "Inrûk chu ka ring naw tawp el" ami ti a nih. Ka lungril chun "Chu pa chun a mi va ringzo em em de" ka ti laizing chun a lungril taka a hril chie a ni di'm chu ka ti nawk a. A iengpo khawm nisien, mi hai mi ringzo thei dingin ka um am aw? ti chu ka lungrila kei le kei kan zawna pawimawtak chu a nih.
Ani ngei el, tulai ei khawvel tawng/hmang mek hi ringumna/ringzona hi ei tlasam ta em em niin an lang. Nikhat lai khawm khan ka unauhai in pakhat ah rûkru lo lutin pawisa le an thil neihai iemanizat chu an lo inrûk peka ka tuorpui hle a chu thaw ngaina a um si nawh, an rutuhai khawm chu ringdanin mi fel tak le mi ringum an ni naw phawt a, chu nek chun ruithei sala intanghai thaw/rawk niin anlang a nih.
Tienlai ei Pi le Puhai hun lai ringtu hmasahai hun lai khan lo/ram ah an fe chang khawm an in kawtkharhai kha tala/chabi an inbuk/kal ngai nawh a chu an thuomhnawhai a him em em hlak kha ana, tulai eini za a za Kristien intihai huna hin iem ata ei in hai tala/chabi an buk ferfur khawma ei in hai a him ngai naw ning a ta le?
Ngaituo tham a tling a nih.
Hi ṭuma nupui le papui kan umkhawm nasan chu naupang sande sikul inkhawmpuia ṭhang kan nih a, naupang inkhawmpuia ṭhanghai kha ka enin an la hung inṭhanglien pei dan ding hai ka ngaituoin kei a tawk tawk chun ka lungril a lo sawl ve em ema 'lengtin takin am khawvel tuipui an hung inhlieu tawl ding' ti chu ka lungrilah a um a nih.
Kei khawm Lalpa zarin nau pasal pahni ka nei vea, a upa lem hi kum 17 hmel a hmu vang ta a chu taksa ram taka chun beisei ding um naw sienkhawm, Pathien nau duot a ni leiin ka lung a awi em ema, ka thla khawm a muong hle a nih. Amiruokchu, a naupang lem hi kum 9 a hung ni ve tah a, ka lungril hi a sawl thei em em a nih, asanchu Lalpa ditdanin ka naupa hi ka enkhawl thei dim? Ti chu a nih.
Awleh, mihriemin rûkru le mi indiknawhai chu ei theida em ema, khawvel sukrinumtu/inhawinawtirtu hielin ei ngai hlak an ni bawk a nih. Ani ngei, eini khawma rûkru le indiknaw taka um hai chu ei theida ang bawkin ei Pa Vâna mi khawmin A nauhai rûk inrûk le indiknaw taka umhai hi mi theida em em a tih ti chu hriet theiin a um a nih.
Malaki 3:
8. Mihriemin Pathien chu ân rûk pêk ding am a ni? Nangni chun in mi lân rûk pêk rawp el hi ! Nisienlakhawm, nangni chun, 'Ieng âm kan inrûk pêk che a?’ in ta. Sawmapakhathai le thilinhlânahai hin a nih.
9. Ṭawngsie chun ṭawngsie inphur in na; ln mîn rûk pêk si a,
Hi hnam pumpui el hin.
10. Siekhawmna ina chun sawmapakhat po po chu hung la unla, Ka ina chun bu a um theina dingin, Hitaka hin mi fie ro,” Sipaihai LALPA chun a tih,
“Vân tukverhai hung hawngin, Malsawmna chu ka hung bur pêk naw hrim cheu am,
A siena ding um naw khawp rauvin.
Sawmapakhat le Lalpa ta dinga thil inhlân hi ei lo thaw naw a ni chun rûkru ei nih ti chu a chieng hle a, ka ngaituoa sawmapakhat le Lalpa ta dinga thil inhlân a ni ding angin hang thaw indik thlap inla chu Lalpa'n mal mi sawm ngei a tih ti chu ka lungrila a um a, ka naupa ka enkawl thei naw /thiemnaw em em khawm Lalpa thu ka zawma Ama ditdan anga ka um chun Aman ka naupa chu mi enkawl pek/pui ngei a tih. Ti chu ka lungrila a um a nih.
Kei hi pawisa lamsuok ka nei naw leiin sawmapakhat pawisa pek ding chu ka nei naw ngeia, sienkhawm hun iemanichen a'nthawk khan (Kum 5 vel chu an tah) Lalpa ta dingin nikhata ka hun hmasatak kan hlan hlak a (Zingtieng bu fa lovin Lalpa kuoma ka ṭawngṭai hlak a nih). Amiruokchu, a changchun harsa ka ti leiin bu ka fak el hlak a, chuonga ka thaw/fak el hlak lei am ani ding chu kei a hin inhawinawna rieu a um hlak leiin harsa hle sienkhawm Lalpa hratna ringsanin thaw hram hram ka tum a nih.
Chuonga ka thaw chu Lalpa tadinga thilinhlân ka thaw thei ve sun niin ka hrieta, ka thlarau nun khawm a hlim em em baka Lalpa Thlarau malsawmna khawm ka phu lovin ka dawngpha hlak niin kan hriet a nih. Amiruokchu, ka thaw ding ang taka ka thaw naw pha Lalpa hmu/ena chun rûkru ang char niin kan ngai a nih.
Mihriem hmu/ena rûkru ni nekin Pathien hmu/ena rûkru ni hi ṭi a um lem a nih. Chuleichun, Lalpa thil hi inru naw phawt inla chuongchun Ama chun ei ta dingin iengkim a phal a nih.
Lalpa malsawmna ei nauhaiin an dawng theina ding chun indik takin Lalpa chanpuol pe inla, Lalpa thil hi inru naw phawt inla, chuongchun Ama chun ei nauhai le ei khawsak dan ding chu mi rel fel pek ngei a tih ti chu lungrila sipliem ka hung suklang hi tiemtuhai lungrila chieng lem le fel lemin Lalpa'n thu hril lem raw seh.
