Tuithaphai, February 24, 2019, Virthli (ONP): Hmar National Union (HNU) General Headquarters chun February 23, 2019 dar 1:30 PM khan HNU a Vice- President le EWC members ni lai mek- Pu Lalhrillien Zote, MDC Saikot le Pu Lalditsang Pulamte, MDC Senvon hai Churachandpur ADC a Executive Members an tlingna le inzawmin Pu L. Thanzam Pulamte, Gen. Secy., HNU a chengna In, Zote veng, Rengkai ah lawmpuina le bufakpuina an nei. Hi huna hin Pu Dr. Chaltonlien Amo, Gen. President, HNU in thuhrilna neiin EM thar hai a lawmpui thu le January 24, 2019 a Patpuihmun-a 58th HNU General Assembly nei a ni huna HNU in an thurel le an thu pasihai bawizui mek an ni thu hrilin ram le hnam ta dinga rawng an bawl tlangna a hai thei tawp suo a thang tlang dingin EM thar hai a fiel. Rev. Dr. Lalhmuoklien in EM tling thar hai tawngtaipekna le ruoi inhlanna a nei zoin hma tienga an hma lak dan ding hai HNU EWC members han hriltlangna neiin zantieng ruoi kiltlang a nih.
