Shillong, February 15, 2019, Virthli (ONP): English Hmar Dictionary mobile application hmasatak ding chu zanikhan Shillong hmuna tlangzar/launch a lo ni tah. Hi English Hmar Dictionary mobile application hi English Hmar Dictionary hmasatak Rev. Dr. H.S. Thanglung in a siem a mi kha ani a, a copyright neitu Upa Dr. Crossthang Sanate, Secretary, Hmar Literature Society, Meghalaya Region ni bawk chun tlangzarna a nei.
Hi tlangzarna hun a hin Revised Edition vawi 4 lai zet lo published tu Pu (L) H.S Dokhum a nuhmei Pi Dartinhnem chun an pate Rev. Dr. Thanglung kuthnung sunzawm pei an nuomna leia Revised Edition hai an lo siem thu hai hrilna a nei. Upa Dr. Crossthang Sanate chun tlangzarna hunser a hmanga, hi huna hin an pu Rev. Dr. H.S. Thanglung in 1950 kuma hi dictionary hi a lo sut le insuo, a mimal hlawkna ding hnawta a ziek le a siem ni loin Hmar hnam le inchuklai hai hmakhuo a ngaina lei liu liua a lo siem ani thu a hril.
Upa Dr. Crossthang Sanate chun mobile application dang hai neka a siem khawm a hau intak tak el dictionary application siemna dinga kawng iengkima hma la pektu Virthli Team hai chunga a lawm hle thu a hrila, application a siemtu Pu Simon L Infimate, a hardcopy type dawk pektu Tv. Lalhlimsang Infimate, Tv. Lalringsan Songate le Tv. Lalchansang Khawbung hai chunga lawmthu a hril a. Hi Dictionary Mobile Application hi a ziektu (L) Rev. Dr. H.S Thanglung, a nuhmei (L) Buoli le Revised Edition vawi 4 lai lo siemtu a pa (L) H.S Dokhum hai hrietzingna dingin an hlan a nih. Rev. Lalliensung, PS, Meghalaya West Presbytery, ICI chun Pathien kuoma inhlanna a nei bawk a nih.
Hi link a hin download thei a nih> https://play.google.com/store/apps/details?id=com.hmar.englishdictionary
