Imphal, February 26, 2019, Virthli (ONP): 7th Session of 11th Manipur Legislative Assembly nei mek ah Pu Dr. Chaltonlien Amo, MLA, 55-Tipaimukh A/C chun a biel-in harsatna a tuok mek hai hrein February 26, 2019 khan Assembly Hall ah Tipaimukh biel a meivar (electrification) le lampui (Tipaimukh road) chungchang putlutin development work thawa um mek hai zo vat a ni theina dingin Power Minister le Work Minister hai a phut . Dr. Amo chun a biel sunga meivar (electric) um nawna khuo hai meivar um anga khel hrila record thawtuhai chungah a lungsen thu a hril bawk. Hi huna hin Tipaimukh MLA chun NH-2 (Tipaimukh road) siemtu NHIDCL hai an sin thawna zo vat a ni theina dingin hma la dingin Work Minister a hril a. Pu Amo chun Tipaimuk biela electric a la var nawna khuo hai meivar an hmu vat theina dinga hma la dingin Power Minister a hril bawk. Hi huna hin Dr. Amo chun Forest and Environment chungchang ah Shifting cultivation in environment a suksiet dan hai le Forest Policy thar siem a tul zie hrilin, policy thar siem a la ni naw chun siem ni sien ti thu a hril bawk. February 27, 2019 hin Tipaimukh biel in sawrkar bufai an dit khawp naw thu, sawrkar in a supply hne naw thu le a tlung kim naw thu hai Assembly ah a khek pui nawk ding thu dawng a nih.
