Responsive Ad Slot

RAMTHAR AH KAN ZIN

Sunday, January 6, 2019

/ Posted by Simon L Infimate
~ Jami Darngawn

Ahmasa'n 2019 kum thar min chuongkaitirtu ei Pathien kuoma lawmthu ka hril a. Chun Virthli fethlenga Rawngbawlna dawkan țha tak mi buotsaipektuhai chunga khawm ka lawmthu ka hung hril bawk a nih.


Hi hun iemani chen a'nthawk khan a bikin ei ni "Hmar nauhai" Online a chanchin a sie, a țha, eiin hrietpawna tak Virthli a hin phunaw hle lang khawm ka thuziek insitumtak hai chu suk suokin a um hlak a, mi țhenkhat ta ding chun nuizatum le nghawkum an chang khawm ka ring a, chulaizing chun mi țhenkhat ruokchun an lo țhangkaipui ka beisei a nih.

Lalpa remruotdan hai hi mak ka ti de aw ! Nov 2, 2013 khan Churachandpur hmun ah "Thlarau mihai inkhawmpui" ti chu Unaunu mi pakhatin a buotsai a, chutaka chun kei khawm țanna hun pekin ka um a, chu ka țanna hun nei ding kha mak takin kei ah thu a hung um tah a, chu chu keiin țanna nei lovin ka ta ding chun mipuiin mi țawngțaipui an ta chutaka chun Lalpa'n țul a ti hai chu hungtir ata, ka lu chunga kut innghatin mi țawngtai pek an ta, chuongchun Lalpa malsawmna ka chunga a hung tlung ding ti a nih (Chuonglaichun ruithei sala intanghai kuoma Lalpa rawng ka bawl lai a nih). Chuongchun, Lalpa ringsanin țanna hun hmang dinga an mi ko khan ka lungrila um ang khan ka hril tah a, chutaka chun Pastor pakhatin ka lu chungah kut innghatin a mi țawngțai peka ka taksa chu sukdanglamin a um a, chu tak a'nthawk chun keia Lalpa Thlarau Thienghlim thilthawtheina chu sukpungin a um a nih!!!

Lalpa ropui raw seh.

Chun, Nupui pakhatin ka lu chungah kut innghatin țawngțaina a mi nei pek nawka chu nu chun hieng hin a hril "Ramthar ah i lut ding ana harsat chu harsa mei a tih, anachu Ramthara chun Bu le Bal a tam ding a nih" tiin a mi hril a nih.

A tawizawngin hril el inla. 2014 May khan khawvel chanchinthar hriet nuomna'n a mi'n an hril Facebook khawvel chu ka hung lutchil tah a, chu khawpui chu a lo mak dangdai khawp ela, kei suilungmawl hin um dan ka thiem hlawr naw leiin thlakhat vel ka um hnung chun suoksan ka tum nawk el tah a, chuonga lungril ka putlai chun Lalpa remruotna chu dang ruol lovin a hung inlang țan tah a nih.

Kan Ruolpa/Zawlpa Pastor pakhat khawm chun khawvel chanchinthar a hriet nuom leiin Facebook khawvel a lo lutchil ve zing kha a lo nih a, a ma khawm khan Facebook khawvel chu a enin mak a tiin a lungril a nat em lei chun Pathien thua dangcharhai tlankhawmna ding hmun "Maicham" ti hmingput chun a lo buotsai/siem ve a, chu hmuna chun kei khawm Ban pakhat ni ve dinga ami fielna chu Lalpa remruota ngaiin thei le thei lovin chutaka chun Ban pakhat ni ve dingin Lalpa ringsanin vawisun chen hin ka um a nih.

Chutaka inthawk chun Lalpa remruot chu a hung inlang ta peia,  "Ramthar" tia nupui pakhatin a mi lo hril lawk kha a mi'n an hril Facebook khawvel hi a lo ni zing a nih ti chu ka lo chieng hle tah a nih. Ani ngei, kei iengmalo thiemna, varna, nei lo țawng thua khawm ziek indik thei naw lang khawm Lalpa ringsanin theitawp ka suo hlaka, harsatna neu neu um hlak sienkhawm, kei tlinglo le tlaklo thuziek hi tiemtu ding dam an lo um hi lawmum ka tiin, i lo tiem leiin i chunga lawmthu ka hril a nih.

Lalpa zar chauvin kum 4/5 lai chu thiem le thiem lovin harsatna dang dang um de sienkhawm, Hmar țawng inchuk zing bawk, Lalpa thu keia hung tlunghai ka lo suklang thei zing bawk hi ropui ka tiin ei Pathien remruot dan hi ka hril nghawk naw a nih.

A hming chu;
Maka, Remruottu, Pathien Hrât,
Chatuon Pa, Remna Lal a nih.
Isai 9:6b.

A tawptaka dingin :
Kumthar hlimumtak ei hmu/tlung ang hin nakie chu ei ta dinga Lalpa'n A mi buotsai pek Ramthar/Vânram chu la hmu/tlung ngei ei tih.
Vânram/Ramthar chu lut dingin inpei zing am le Unau ?

Jan. 5, 2019.
Don't Miss
© all rights reserved
made with by Simon L Infimate