Pu Rajdeep Goala, local MLA in Pi Gracy le Pi Lalmuonpui hai kanna a nei

Hmarkhawlien, January 04, 2019, Virthli (ONP): Zanikhan Pu Rajdeep Goala, local MLA chun date 24/11/2018 nia Silchar hmuna kut tuortu Pi Gracy le Pi Lalmuonpui hai chu an chengna in Hmarkhawlien Vengsak ah kanna a nei. Ama ruol hin chanchinbumihai, Congress thuoitu Pu Pradeep Dey le Congress thuoitu dang dang hai baka Stand for People hai hotu Pu Loknath, Advocate le HSA Barak Valley thuoitu hai bakah organization dang dang anthawka thuoitu le mipui iemanizat zet fe khawm a nih. Pu Rajdeep hin cheng 5000/- ve ve pein kanna anei a, thiltlung le inzawma a tuorpui thu dam, pawi ati thu dam hrilna neiin a thlamuong el khela zinga (5/01/2019 ) Silchar DC le SP office tuola lungawinawna suklangna dinga hin ama ngei khawm a hmuna fein hmalatuhai a thlawp tum thu a hril langsa bawk. Tv Lalsiemthar Hmar, Vice-President HSABV chun MLA in an in hmun ngeia kut tuortuhai kanna a hung nei chu lawmum a ti thu lawmthuhrilna a nei bawk. Thiltlung le inzawma a hril peina a chun July 2018 laia Silchar hmuna rengthei zawrtu Pi Remkim w/o Pu Rema in chemte a sun a tuokna le inzawma FIR peklut nisienkhawm hmalakna iengkhawm a um naw leiin hi thil ditumlo tak hi a tlung rawp ta naw na dinga, tuta thiltlung le inzawma hmalakna hi a pawimawa chun hun la hung um pei dinga a biekin tribal mipuihai him tawkna thua hieng thil ditumlo tak hi a tlung nawk ta naw na dingin  theitawpa hmalak a nih ti thuhai a hril bawk.

Hi thiltlung le inzawma pawitawktu pakhat Priya Mazumber chu December 21, 2018 khan Kalimohon Road, Silchar hmuna man a lo ni tah a, pahni dang Durba Paul le Sagnick Gupta hai ruokchu man an la ni naw zing a nih. Hienglai zing hin Durba Paul chun Gauhati High Court ah Anticipatory Bail a lo lak tah thu dawng ani bawk a nih.

Zinga Silchar hmuna DC le SP Office tuola nuorna le lungawinawna suklangna nei ding a hin mitin a tam thei ang fe dingin HSABV chun fielna a siem a nih.