12th NCHAC election ding le inzawmin HSA Assam Hills JHQ in thupuong a siem

Muolhoi, January 3, 2019, Virthli (ONP): HSA Assam Hills Joint Headquarters chun 12th N.C. Hills Autonomous Council election um ding le inzawmin thupuong a siem a, candidate hai popo ditsakna anhlan bakah felfai tak le thienghlim taka nei theina dingin tharum hmang lo ding le HSA a nina nei hai hrim hrim chu HSA hming le pawl hminga boruok siem a hnuoia an thupuong chun a khap.

THUPUONG

Ahmasatakin kum thar chibai kan hung buk cheu.

Ei hma 12th N.C. Hills Autonomous Council election um ding le inzawmin HSA chun candidate hai popo ditsakna insangtak an hlan. HSA Assam Hills Joint Headquarters Conference vawi 21 na, tarik 18 October 2018, Muolhoi, Haflong hmuna a lo rel ta angin, ei hmaa N.C Hills Autonomous Council election ding le inzawm hin HSA chun tu khawm tan bik le ditsak bik anei naw thu mipui hrietin a puong. Chun fel fai tak le thienghlim taka election a um theina dingin mi tuelkhawm tharum hmanga buoina siem zawng le pawl le pawl kar le hnam hming suksiet thei zawnga um lo dingin mitin fimkhur seng dingin a ngen.

Chun HSA a nina nei hrim hrim chu HSA hming am ani pawl hming am ani a boruok siem a khap tlat a nih. Hi thusuok hi inza taka lo zawm seng dingin HSA chun a ngen. India danpui in zalenna a mi pek angin mani mimal zalenna le chanvo hrie a mani vote hlutak thlak dingin ei inngen.

Hnama in rawngbawlpui.


Sd/-
John Mark Pena
President

Sd/-
James Selate
Secretary

HSA ASSAM HILLS JOINT HEADQUARTERS