Responsive Ad Slot

Patpuihmun Garlanding Day ursun taka hmang

Monday, January 7, 2019

/ Posted by Simon L Infimate
Patpuihmun, January 7, 2019, Virthli (ONP): Hmar Youth Association (HYA) Patpuihmun Branch huoihawtnain January 4, 2019 khan Patpuihmun Community Hall ah ‘ Ei theitawk khawtlang ta dingin’ ti thupuia hmangin Patpuihmun Garlanding Day a khuo mipuiin ursun takin an hmang . Hieng ang hunser hi Patpuihmun khuo chun an khawsunga inchuklai hai, kum tawp examnaa a thaw ṭha bik hai kuoma le lo hmasuok, bu-le-bal tienga bu hautak hai kuoma chawmawina thilpek inhlanna hi an lo thaw hlak hrim a ni a. Patpuihmun Garlanding Day hmang huna hin Kum 2018 a Inchuklai mi iemanizat hai kuomah chawimawina thilpek inhlanna le kum 2018 a Patpuihmun khuoa bu hautak- Pu Lalzirlien khawm chawimawina thilpek inhlanna nei a nih a. Ama hin phur zakhat chuong bu a nei a nih.




Hi huna hin Khuollienin Pu Dr. Chaltonlien Amo, Hon’ble MLA, Tipaimukh A/C a ṭhang a, ama a inthawkin thu ṭha tak tak ngaithlak a nih. Pu Dr. Chaltonlien Amo chun Patpuihmun Garlanding Day a uop zo hnungin January 5, 2019 khan a Pa (L) D.R Thuoma hrietzingna dinga bawl- D.R Thuoma Memorial Hall kanna le hung tlung ding January 15, 2019 a Patpuihmun khuoa Pherzawl district huopa Pherzawl District Sports Association (PDSA)-in D.R Thuoma Memorial Football Tournament an huoihawtna ding hmun le an hmalak dan ding hai hriltlangna le a Nu, Vangai Sumtuk Lalnu- Pi (L) Rodailovi a lungdawna ding hmun hai enfelna a nei a. Hi baka hin Vangai tlang a development work chi tum tum thaw a um mek hai enfelna sin a thaw. Pu Dr. Chaltonlien Amo chun January 15-27, 2019 hun sunga a Pa, Vangai Sumtuk Lal- (L) D.R Thuoma Memorial Trophy le a Nu- Pi (L) Rodailovi Lungdawna ding a hin mitin ṭhang seng dingin ngaina takin a fiel bawk a nih.



Patpuihmun Garlanding Day hmang huna hin khawtlang thuoitu, organization tum tum a ṭhuoitu hai khawma an uop a, local artiste han hla sakin mipui fekhawm an in awi a, hun hlimum tak el hmang a nih.
Don't Miss
© all rights reserved
made with by Simon L Infimate