Responsive Ad Slot

NUHMEI ṬHA RINGUM CHU TÛN AM HMU THEI A TA?

Sunday, December 2, 2018

/ Posted by Simon L Infimate
~ Jami Darngawn

Thuvarhai 31:
10. Nuhmei ṭha ringum chu tûn am hmu thei a ta? A hlutna chu lungmantamhai nêkin ân sâng dai a. 

"Nuhmei ringum" titak hi a nih, a pawimaw bek bek chuh, nuoma hmelṭhat ringawt le lekhathiem, hausak ringawt hi ani chuong nawa sungtieng/lungril en lemtu Lalpa mita ṭha le mawi chu a nih lungmantamhai neka hlu lem le mantam chuh !


Lungmantam hi ka la nei ngai nawa, a hmel takngiel khawm ka la hmu ngai nawh ti thei a nih. Sienkhawm inhnarna le dit ngawi ngawina ka nei naw hi vangnei kan tih. (Dit hle lang khawm ka nei zo naw ding). Amiruokchu, ei Bible-in Nuhmei ṭha ringum chu lungmantamhai neka a hlut ziet a hril hi ropui ka tih.

Nikhat laikhan nughak pakhatin a mi hung bieka, mobile phone a'nthawkin "U, hril nuom che ka neia lungril sawl em emin ka uma, i mi ṭawngṭaipui ka beisei a nih. Asanchu, ka ngaizawngpa le kan inkar a buoi leiin ka lungril ana hle el a, chuleichun ni 7 sung bungheiin Lalpa kuoma ka ṭawngṭai ding a'na, lunginsiet takin nangkhawma mi lo ṭawngṭaipui rawh aw ?" tiin an chanchin abul a'nthawkin a mi hril a, ni 7 a ṭawngṭai zo chun a mi hung biek nawk a, chu nunghaknu thilthaw chu ropui ka tiin entawn tlaka ka ngai leiin ka hung suklang ve tawp a nih.

Tulai khawvel ei tawng mek a hin ṭhalai tam tak hi an beidawg leiin Lalpa Pathien ah an harsatna hai intlun el lovin thil dang hieng inruithei chitinreng hai hin an lungril sawlnahai an innghat hlak a, a ṭhen lem chun maibi/maiba pathien danghai chen an lo biek pha hlak hi a pawi ei ti bek bek a nih. Ringtuhai chu chuong ding chu an nawa, ei lungril sawlna le beidawngna hai chu Lalpa kuom ah ei intlun hlak ding a nih.

Kum 5 vel liem tah khan mi pakhatin harsatna a nei leiin Pathien thua inpawlpuina a chun hieng hin a hril "Ka ngaizawngnu'n a mi ṭhe leiin rinum ka ti em leiin inruithei ka lo thaw el a nih" tiin a hril a, chu tlangval chu Lalpa zar chauvin a hringnun a siemṭha nawk thei leiin lawm a um hle.

Ṭhalaihai (Nunghak/Tlangval) hai hi nuhmei pasal innei hi fimkhur a ngai hle ding a nih, nuoma zakuo thar nei anga a thar nei nawk el ding ti ang kha chu ani naw ding a nih. Amiruokchu, vangduoi thilthua thawsuol thei ngai chu a nih. chuleichun, iengkima hin Lalpa ah intuklut mawl mawl hi a ṭha tak a nih.

Nuhmei ringum Lalpa ngaia hlutak ei nih a, ei pasalhai ta ding khawma lungmantam neka hlu lem ei ni theina dingin abikin ka nuhmei chanpuihai (nunghakhai) Lalpa Pathien kuoma ei dit zawnghai intlunin Ama ṭhangpuina hni mawl mawl hlak dingin ei infui mawl mawl a nih.

LALPA'N MALSAWM RAW SEN CHE.
Don't Miss
© all rights reserved
made with by Simon L Infimate