Responsive Ad Slot

NC Hills le Karbi Anglong ah Sikpui Ruoi ursun taka hmang, Muolhoi ah Silver Jubilee lawmna nei

Thursday, December 6, 2018

/ Posted by Simon L Infimate
Muolhoi, December 06, 2018, Virthli (ONP): North Cachar Hills (Dima Hasao) le Karbi Anglong hai a zanikhan Sikpui Ruoi chu Hmar khuo tin deu thawin ursun takin an hmang. Hmun ṭhenkhata ran thatin ruoi hai ṭhe ani baka Lung phun/dawna hai nei a nih.

Assam rama Hmar nauhai bubitna khuo Muolhoi ah Kum 1993 a N. C Hills Autonomous Council in 5th December chu Local Holiday a lo puongna (Declared) a kum 25-na (Silver Jubilee) puol bikin Muolhoi Village Committee huoihawtna hnuoiah Muolhoi Public ground ah mipui sangtel pungkhawmin ropui taka hmang a nih. Hi huna hin Chief Guest in Pu Sum Ronghang, Minister of Hills Area Development & Mines & minerals, Govt of Assam, Guest of Honour in Pu Debolal Gorlosa, Chief Executive Member, NC Hills Autonomous Council, Chief Host in Pu Hlima Keivom, MAC NCHAC le Sikpui Pa Upa Hlithang Hrangate hai hmang an nih. Hi hun hi Dima Hasao Deputy Commissioner, Pu Amitabh Rajkhowa,  Executive Members, NCHAC Pu Kulendra Daulagupu, Pu S T Jen Hrangkhol, sawrkar tienga pawimawi le hnam dang ṭhuoitu tam takin an uop bawk.


Hun hmasatakah Jubilee lung (NCHAC in Local Holiday a puong a kum 25 na) hawngna chu Chief Guest Pu Sum Ronghang in a neia, Hall ah Sikpui Pa zawnlutna nei zoin hun tan a nih. Upa H.L Sanga Neingaite, President, Muolhoi Village in Khuollien le mipuihai lawmlutna neiin  Kum 1993 a NC Hills Autonomous Council in December 5 chu Local Holiday a lo puongna thuah le tulai el a Assam sawrkarin Sikpui Ruoi - 5th December chu Restricted Holiday a puongna le inzawmin Assam sawrkar chungah lawmthu a hril bawk. Sikpui Dar vuokna nei zoin HSA choir in thiem takin mipui hla in an in awi bakah hlasakthiem tak tak haiin mipui an in awi bawk. Chun Hmar Cultural Troupe anthawk le unau Dimasa, Kuki le Nepali hai anthawk Cultural dance hmu nuom um tak tak en ani bakah Fashion Parade nunghak hmelṭha le pieng nal tak tak haiin an nei bawk.

Hi huna hin Khuollien le Khuol inzaum hai anthawk thu ngaithlakna nei ani a, Chief Guest Pu Sum Ronghang chun a pienga inthawka Sikpui Ruoi a vawi khat hmangna a ni thu, Hmar hai chu abikin Literature tieng in insanga, hnam tam lem hai nei phak lo Assam University chenah Hmar MIL innei dam hi entawntlak tak in nih a tia, a theina naah Hmar hai thangpui dingin an tiem bawk.

Guest of Honour Pu Debolal Gorlosa chun Dima Hasao District sunga khuo lientak Muolhoi chu inchukna tieng in insanga, tuta ṭuma APSC hlawtlingna chang ST (H) ah a hmu rawntak chu Muolhoi in nia, PWD hnuoiah Muolhoi khawsung lampuihai siemṭhatna nasa nawk zuola aum theina dingin hma a lak zing thu, kawng dang dangah Muolhoi chu ṭhangpui dingin an tiem bawk. Pu Debolal Gorlosa in Sikpui Ruoi Silver Jubilee Souvenir tlangzarna a nei zoin Muolhoi Village Committee anthawk le HSA Assam Hills JHQ anthawk Chief Guest le Guest of Honour hai kuomah Memorandum pekna nei a nih. Memorandum a hin Hnam tading le khawsung tading thil tha tam tak hieng Hmar MIL Teacher sanctioned post le NCHAC a CEM hmasatak Pu C.H. Khawtlang Memorial statue inthut ding dam le a dang dang zieklangin ngen a nih.

Literature tienga thawtha bik zuol hai hieng Rev. Dr. VL Tluonga Bapui, Rev. Dr. Hrilrokhum Ṭhiek le Pu L Changtho Hmar hai kuomah Chawimawina inhlanna nei a nih.

Sun hunah Sikpui ruoi thingpui kil tlang ani a, chu zoah Pi Dr. Lalṭhakim Hmar anthawk Intodel (Self Dependency) ti thupuia hmangin thu ropui tak ngaitlak a nih. Zan hun chu PubliC Worship Service a hmang niin Rev. Samuel Lalringum Ṭhiek in thuhrilna a neia, Kohran dang dang KTP haia inthawk hlapawl ngaithlak a nih.

Karbi Anglong District Level Sikpui Ruoi chu CHS Campus, Hebron, Diphu hmuna hmang ve a nia, hi huna hin Sikpui Pa Rev. L. Varte hmang niin, Chief Guest in Pu Romeo Hmar, Khuol Chawngpu in Dr. Paul B. Chonzik hmang a nih. Sun huna Guest haiin thuhrilna hun an nei a, en nuomum tak tak cultural dance le special items hai en ani a, Ruoi inhnik tawk taka ṭhe ani bawk a nih. Zan hun hi hla hlasakthiem tak tak haiin hla ruoi ṭhein mipui an inawi a nih.

Don't Miss
© all rights reserved
made with by Simon L Infimate