Responsive Ad Slot

Guwahati ah Sikpui Ruoi 2018 ropui taka hmang a nih

Thursday, December 6, 2018

/ Published by Simon L Infimate
Guwahati, December 06, 2018, Virthli (ONP): Zani (5th December) khan Hmar Welfare Society, Guwahati (HWSG) keihruoina hnuoia indin Sikpui Ruoi Organising Committee (SROC) hai huoihawtna hnuoiah Sikpui Ruoi 2018 chu 'Progress with God' ti thupuia hmangin ropui takin Parish Community Hall, Catholic Church, Rukminigaon, Guwahati hmuna hmang a nih. Hi huna hin Khuollien (Chief Guest) in Smt. L.S. Changsan, IAS, Principal Secretary, Home &  Political Department, Government of Assam hmang ani a, Sikpui Pa in Shri. Darzakhum Songate, IRS Commissioner of Income Tax (Appeals), Shillong, Ministry of Finance, Govt. of India chu hmang a nih.

Hi hunser hi Tv. Laldinsang Tuolor le Nk. Maryjone Lalengvar haan keihruoiin, hun hmasa tieng mipuiin “Hmar Puonzar” ti hla an saka, hun hawng á¹­awngá¹­aina Pastor Lalmuongthang Ṭhiek in a nei zoin Pu Lalremthang Khawzawl, Chairman, SROC in lawmlutna thucha hrilna hun a hmang.


Sikpui Pa Pu Darzakhum Songate, IRS in darkhuong vuoin Sikpui hawngna a neia, a thu hrilna a chun inchukna hi changkangna le hmasawnna dinga bulpui ani a, chuong ang bawkin thalai hai an pawimawa, mani theina kawng seng ah hnam le khawtlang tadingin sinthaw le inhmang ding a nih ti hai a hrila, changkangna le hmasawnna ei hnawtna lampui a mani iná¹­anna bul, nundan, pi le pu dan hai vawng tlat le humhim a pawimaw zie hai a hril.

Sikpui Choir in hnam hla thiem le mawi takin mipui an inawi zoin Secretarial Report Pu Joshua Neitham, Secretary, HWSG in a nei a, hi zo hin Hlaphuok in elna result puong niin, lawmman chu Nk. Vesty Lalparmawi in a dawng a nih. Nunghak le tlangval han Skit mawi tak, Tienlai Sikpui ruoi hmang dan le chanchiná¹­ha ei dawng hnunga ei hung hmang pei dan an inentira mipui mit a suk thlei hle a nih. Pu James L. Neingaite, Coordinator, BDC in Blood Donors’ Club Campaign na mipui lai a nei zoin tukum sunga Guwahati sunga tlawmngai thisen pe (Blood Donors) hai chawimawina inhlanna nei ani a, anni hai tadinga á¹­awngá¹­ai pekna hun Rev. (Dr.) H.M. Songate in a nei bawk a nih.

Chief Guest Smt. L.S. Changsan chu mipuiin lawmlutna hun hmang ani a, Hmar Welfare Society, Guwahati in Hmarpuon inbietirna le ei unaunu ani ti inentirna in Vawk mal pek ani bawk a nih. Chawimawina hun hmang zoin thuhrilna a nei zawm nghal a, hun khata chengtlangna hun chu digital age hi ani tah a, khawvel changkangna ei hnawt zing laiin ei insiengna, nunphung hai hi theinghil lo ding a nih tiin a hril. Chun, ei festival hieng Sikpui Ruoi hai dam hi sunzawm peia vawnghim tlat ding a ni thu hai hrilin, hlawtling ding chun iengtik huna khawm Pathien le inzawm tlat a pawimaw zie a hrilsa bawk.

Hi huna hin tukuma APSC exam a hlawtlingna chang mi 6 hai chawimawina hun hmang ani a, hi huna hin Dr Robert Tuolor, Nk. Ruthi Sellate le Joy Cristina Ngamlai hai chu Thangsuopuon le lawmpuina Certificate inhlan an nih. A dang hai ruok chu buoina dang dang an nei leiin hi hun hi an hung hmang thei naw a nih.

Cultural Show mawi tak el Nupui Pawlin tienlai ei Pi le Pu hai lo khawsak dan le hnampuon mawi tak tak mipui inentirna hai nei ani a, Pu Thanghlun Hmar, IRS, Chairman, HWSG in thuhrilna a nei zoin Mrs and Miss Sikpuiruoi 2018 result puongna hun nei sunzawm a nih. Tukum 2018 Sikpui Ruoi Mr and Miss dingin Tv. Lalramvulzing le Nk. Dorothy hai thlang an nih. Mr and Miss thlangdan hi tukum 2018 Guwahati sunga Hmar hnam tadinga tlawmngai bik, damnaw buoipui ngai hai buoipui, Kohran tienga inhmang em em hai nuhmei 3 le Pasal 3 thlang suok anni a, chuhai hai laia mi chu thlang an nih.

Hmar Inpui, GHQ in an aiaw ding hung tirin Sikpui Ruoi Restricted Holiday a Assam sawrkar in a puongna le inzawmin Pi Sweety Changsan kuoma lawmthu hrilna le Thangsuopuon insiltirna an nei.

Hun karlak a hai hieng The Pirates (Band), Tv. Lalthutlung Zate, Nk. Maryjone, Nk. Tabitha Lalnunnem, Nk. Angela Traite, Tv. Jehova Vankal, Tv. Patrick Changsan, Tv. Stanley Joute le Tv. John Mac haiin mipui hla in an awi bawk a nih.

Votes of Thanks Pu Solomon Hmar Secretary, SROC in anei a, Closing Song 'Aw Kan Hmar ram' ti mipuiin an sak zoin Pastor Vanlalsang Khuptong in tawngtaina in Sikpui Ruoi hun kharna a nei zoin Ruoi inhnik tak el kil tlang a nih.

Upa Chawisang Infimate, Programme Director, Doordarshan Kendra Guwahati hmalakna zarin Guwahati Sikpui Ruoi hi Doordarshan a Live a pek ani nghe nghe a nih.

Hi hun hi Hmar hnam sunga hnam thuoitu hai bakah hnam dang hieng Kuki, Kom, Aimol, Vaiphei le Zomi hai khawmin an hung uop a nih.


Photo Credit: Siesang Puruolte Hmar & Hanson Varte

Don't Miss
© all rights reserved
made with by Simon L Infimate