Responsive Ad Slot

DC office tuol ah protest nei, Joint Memorandum pek

Wednesday, December 19, 2018

/ Posted by Simon L Infimate
Silchar, December 19, 2018, Virthli (ONP): November 24 nia Silchar a Hmar nupui hai chunga kutthlakna le inzawmin vawisun khan Cachar Deputy Commissioner office tuola protest nei a nih.

Hi huna hin Barak Valley Hmar Students’ Association, Hmar Students' Association, Silchar Branch, Manipuri Youths’ Front Assam, Dimasa Students’ Union, All Assam Manipuri Students’ Union, Cachar Hindi Bhashi Chatra Parishad, Stand for People’s Group, kut tuor laia thang Pi Lalmuongpui, Pi Gracy a sunghai, Silchar Hmar Welfare thuoitu le Hmakhawlien anthawk mi tlawmngai iemanizat an thang.

DC office tuol a hin placard hai chawiin “We Want Justice for Gracy Hmar”, “We Want Justice for Lalmounpui Hmar” ti hai an khek pui. Hun iemanichen khek ani hnungin DC chu a office ah inhmupui a ni a,  DC bula thiltlung dan hai iengkim hril fai vawng ani a, kut tuortu hai khawmin DC bula anni ngeiin an thil tuok dan hai an hril bawk a nih.


HSA Vice President Tv. Lalsiemthar Hmar chun darkar 24 sunga man anni naw chun road blockade le nuorna lien lem hai chen an nei ding thu a hril. Hi huna hin DC kuoma Joint Memorandum an pek bawk a nih. DC chun an rang thei anga pawitawktu hai chu man dingin an tiem baka Medical report tuchena la suok lo chu Medical Superintendent chu an hma tienga suk suok dingin a hril bawk a nih.

Silchar MLA Pu Dilip Kumar Paul khawmin thil umdan hai DC bula hin a hrila, DC le SP hai chu an rang thei anga hma la dingin a vau nghe nghe a nih.

Hi hun hi Regional le National level chena media hai umin video coverage chen hai an thawa, hi chanchin hi TV Channel a hai khawm puongdar a ni tah.


Don't Miss
© all rights reserved
made with by Simon L Infimate