Responsive Ad Slot

ADVENT OR ADVANCE CHRISTMAS?

Sunday, December 16, 2018

/ Posted by Simon L Infimate
~ Zadinlien Hmar

Kristien haiin Kumtin Krismas ei hmanga, ei hmang hun le ni ruok chu ei umna zirin an ang tawl kher nawh. Chuong laia eini tlangmi haiin ei uor em em chu Advent/Advance Christmas hmang hi a nih.

Amiruokchu, Advent le Advance chungchanga hin a ieng lem am hmang ding ti inselna le ngaidan hrang hrang a um. A ṭhenin Advent Christmas hi indik lem dinga an ngaia, a ṭhen ruok chun Advance Christmas tiin an hmang ve thung. Ieng po khawm nisien ei hun hmang Kona hming dinga ei dit dan ani chun andik nawh tia sel el chi chu ni chuong kher naw nih.

Awle, hieng English thumal pahni hai hi ṭawngbula inthawka suiin zuk hrilfie tum ei tih.

ADVENT: Advent ti thumal hi Greek ṭawng ‘parousia’ tia inthawk lasuokin Latin ṭawng chun Adventus ti ani a, chu chu Sapṭawngin Advent ti niin a umzie chu ‘Hung tlung’ (Coming) tina a nih. Christmas le inkungkaina a nei nawh.

Mithiem hai sui dan chun Kum zabi 4 & 5 vel khan Spain le Gaul a chun Khawsak mivarhai kuoma Krista inlar chawimawina Kut January 6 hin hmang hlak ani a, hi ni hin ringthar hai Baptisma pekin an um hlak. Chu Ni hmangna dinga an lo inbuotsaina hun chu Advent tiin an lo inbuk a nih. Ni 40 sung Pathien kuoma inhlan tharna, Bunghei le ṭawngtaiin hun an lo hmang hlak. Krismas le inhnaina tak chu a nei.

Kum zabi 6 anthawk khan Rom Kristien hai chun Advent ti chu Krista hung nawkna (Second coming) dinga an lo inbuotsaina leh an hung hmang kawp nawk a, Middle Age anthawk chau khan Isu Krista Bethlehem-a a hung pieng lawmna dinga an lo inbuotsaina hun chu Advent ti a hung nih.

Advent hun sung hi Krismas hma Chawlkar 4 sung (Krismas hma December Ni 24 anthawk tiem kirin Pathien ni vawi 4na char anthawkin) hmang hlak ani a, chu Pathienni hmasatak chu Advent Sunday an ti bawk. A tlangpuiin November 27 le December 3 inkar hi Advent season inṭanna ana, Tukum 2018 ruok chu December 2 in anṭan ve thung. Hi hun sung hin Krismas hlim taka hmang ani theina dingin Taksa le Thlarauva lo intuoi tharna dingin Ṭawngṭai,Bunghei le Inhlan tharna hunin an hmang hlak. Krismas hma Chawlkar li sung hi Advent Season chu a nih.

ADVANCE: Advance ti thumal hi Sapṭawng (English) niin Old French ‘Avancir’/Modern French ‘Avancer’ anthawka laksuok a ni a, a umzie chu Hmasawn/Hmatieng pan tina a nih. Kristien na leh inkungkaina a nei nawh.

A chunga Advent le Advance ei hrilfie ta ang khin a ieng hi’m Krismas leh hmang kawp inla indik thei lem ata ti chu ngaituona a suk buoi el thei.

Advent Christmas chu iem? Mi ṭhenkhat, Pawl ṭhenkatin Advent Christmas tiin Program phuisui taka induongin an hmang hlaka, Chu chu Thlarau le taksa lo intuoitharna, lungril Krismas tieng a lo awn theina dinga an hmang hlak a nih. Krismas hma chawlkar li sung popo inbuotsai nekin Zankhat/nikhat program siemin an lo hmang hlak.

Advance Christmas chu iem? A hung inṭtanna sei tak sui ding ka hriet nawh.(Mithiem hai hril zawm dinga sie inla) School/College/Office le institution dang danga ruolcham kumtluona khawsa hmunkhat, Krismas hmunkhata hmang chak em em le hmang thei si lo ding haiin Advance Christmas tiin hun an hmang hlak. Hi huna hin thilpek inpe tawnin (Gift exchange) hlim taka hun hmangin hmunkhata Krismas hmang anga inngaina an nei hlak. Kohran/Pawl/Department le a dang dang hai, hmunkhata hmang ding si hai tading chun Advance Christmas hi hmang a ṭul kher nawh.

Hieng thumal pahni hai lakkawp (Advent+Christmas Or Advance+Christmas) hai hin literature tak chun umzie indiktak a kawk thei naw ve ve in ka hriet. A ieng lem lem khawm hmang inla a chunga ei tarlang ta ang khin, ei hun hmang Kona hming dinga ei ditzawng ani phawt chun ka dem naw ve ve a, ei hun hmang nuom dan/dit dan izirin a Kona hming ruok chu thlang thiem inla a mawi lem hmel. Advance Christmas hmang hin chu a thlarau tieng ngaituo bek lova Nunghak, Tlangval le ruolcham haiin Taksa hlimna hnawta an hmang hlak nisien a hawi vieu. Chuonglai zing chun Advent hmang hai chun Thlarau tieng lo intuoitharna hun hmang nuom leia hun hmang hlak nisien a kawk deu tak.

(Hi hi ka lo ngaidan el ani a, a'ndik tak ka tina ani chuong kher nawh. Inselna tam tak a um hlak leiin ka lo fepui dan ka hung zieksuok ve el chau a nih)
Don't Miss
© all rights reserved
made with by Simon L Infimate