Responsive Ad Slot

Jinam Valley area Electrification sin tan dan ding thua inbiekna nei

Wednesday, November 28, 2018

/ Posted by Simon L Infimate
Mahur, November 28, 2018, Virthli(ONP): Hun sawt tak a'nthawka buoipuia lo um tah, NC Hills tlangram kilkhawr tak tak eini mi chêngna taphawta electric meivar tukum sûng ngei intlung tir vawng dinga ti chu zani 27.11.2018 khan sin ṭan dân ding thua inbiektlangna Mahur IB ah nei a nih. Hi meeting hi Tv. David Keivom, President, NCHISF in a keihruoia, Electrict Department tienga mi pawimaw, contractor hai bâka Pu Johnmark Pena President, HSA Assam JHQ. Tv. Sumneikung Ṭhiek, President, HYA NCH JHQ. hai le Mahur Area a ISF Branch, HSA, KSO, ZSU le khuo tin deuthaw a'nthawk palai an thang baka Thingbung khuo chu in tin pa an thang bawk a nih. Sin hi 28.11.2018 in ṭan nghal dinga riruong siem fel nghâl a ni a, electric post phunna hi kuosûng mi le sa in thawng anta, a tawlna a ding khawm hin a ṭul angin mipuiin ṭhangpui bawk an tih.

Jinam Valley Area a Electrification chungthu a hin HSA JHQ. in hun sawt tak hma alo lâk tah a, amiruokchu khuo ṭhenkhatin HSA hrietpuina ṭhanglo in Solar an lo lâk lem ta lei hin Electric kei lut thei ta naw dinga thu a hung um lem ta leiin hun sawt tak hma lakzawma um ta chu October thla tawp a'nthawk khan GBs Association hai le Jinam valley HSA Block in NCHISF Student inzawmkhawm hai kuta hma la pui nawk dinga an ngênna chu DC kuoma intlun nghal in Joint Meeting hi DC Conference Hall a nei nghâl in a ṭul ang angin Guwahati tieng hai chen fe ṭul le inbiekpui ṭulna hai chu NCHISF haiin an bawzui tah a nih.

Hun sawtnawte zova sin ṭan nghal thei ta dinga um hi mipui an lawm hle a, hieng lai zing hin (Solar Non Grid) lo latu hai hi Electrification a pawm an ni ve leiin tu hri a ding hin chu Grid line an dawng ve naw ding a nih. Hi huna hin Mahur Area a Kanaan khuo khawm a hmun visit na an nei nghâl a electric meivar lût vat dinga beisei a nih. Hi meeting a hin unau kuki khuo electric la lut nawna hai thu hrila um chu hung tlung ding 11 December hin Mahur IB bawka joint meeting nei pui nawk dinga thuthlukna siem ani a KSO hai information petu ding dande ngal an ni a Zeme khuo hai khawm hi ni vek hin thangsa dinga hril an nih.
Don't Miss
© all rights reserved
made with by Simon L Infimate