Kangreng, November 28, 2018, Virthli (ONP):
Zanikhan Kangreng khuo, Pherzawl District ah Go to Village prokram hmang a nih. Hi hun hi Kangreng Jr. High School hmuna hmang niin DC, DO, MDC, ZEO, PHED, Social Welfare, Medical, EVM, Vetenary, Horticulture le department dang dang hai fekhawmin sawrkar a scheme dang dang um hai hrilhrietna le khuo thenkhat thilpek hai inhlanna hunser hmang a nih. Hi huna hin mipui dawr thei dingin department tin haiin an puol chit in table an daw bawk a nih. Sun huna sin bangkhai hai zana la sunzawm nawk a nih. Khuo mipui le khuolrala inthawka fekhawm haiin mani ngeiin office/ Department hai dawra hmasawnna ding scheme tam tak an hriet pha chau ni lovin an khata apply dan ding hai chen hriet phana'n an hmang leiin lawmum an ti tak zet thu an hril. Vawitûk khan DC rawiin Kharkhuplien ah bu hnawt dingin Kangreng khuo an suoksan a, Jiribam ah riek lut an tih.
